2019 جىلعى 28 مامىردا ورتالىق كوممۋنيكاسيالار قىزمەتىندە قازاقستان رەسپۋبليكاسى ىشكى ىستەر ءمينيسترىنىڭ ورىنباسارى يۋ. ۆ. ءيليننىڭ قاتىسۋىمەن «2019 جىلعى شومىلۋ ماۋسىمىن وتكىزۋگە دايىندىق تۋرالى»تاقىرىبىندا بريفينگ ءوتتى دەپ حابارلايدى Qamshy.kz اقپارات اگەنتتىگى ق ر ءىىم تجك باسپا ءسوز قىزمەتىنە سىلتەمە جاساپ.
ەلىمىزدىڭ سۋ ايدىندارىندا قاۋىپسىزدىكتى قامتاماسىز ەتۋ ماقساتىندا تجك بولىمشەلەرى پوليسيا دەپارتامەنتىمەن جانە جەرگىلىكتى اتقارۋشى ورگاندارمەن بىرلەسىپ پراكتيكالىق جانە پروفيلاكتيكالىق ءىس-شارالار كەشەنىن جۇرگىزۋدە.
بۇگىنگى تاڭدا ەلىمىزدە 107 قالالىق جانە 500 جەكە جاعاجاي سۋعا شومىلۋ ءۇشىن بەلگىلەنگەن. سۋعا شومىلۋعا تىيىم سالىنعان 1 مىڭنان استام ورىن بەلگىلەندى، ول جەرلەردە 1510 ەسكەرتۋ بەلگىلەرى جانە ادامداردىڭ قازا بولۋ فاكتىلەرى، سەبەپتەرى مەن وعان ىقپال ەتكەن جاعدايلار جازىلعان 378 كورنەكى ستەندتەر ورناتىلعان.
جەكە جاعاجايلاردا كەزەكشىلىك ەتۋ ءۇشىن تجك بولىمشەلەرىندە ارنايى دايارلىقتان وتكەن قوعامدىق قۇتقارۋشى-جاساقشىلار ەسەبىنەن 114 وبەكتىلىك قۇتقارۋ بەكەتى قۇرىلدى. سۋ ايدىندارىنىڭ ءقاۋىپتى جانە قورعالمايتىن ۋچاسكەلەرىندە (تابيعي جاعاجايلار) جەدەل-قۇتقارۋ جاساقتارى قوسىمشا 53 ءموبيلدى قۇتقارۋ بەكەتتەرىنىڭ كەزەكشىلىگىن ۇيىمداستىردى.
سۋدا ادامداردىڭ قازا بولۋىن الدىن الۋدىڭ نەگىزگى قۇرالدارىنىڭ ءبىرى حالىقپەن اقپاراتتىق جۇمىس بولىپ تابىلادى. جىل باسىنان بەرى وڭىرلەردە 28 بريفينگ وتكىزىلدى، حالىق اراسىندا 65 مىڭنان استام ۇگىت-ناسيحات ونىمدەرى (پاراقشالار، جادىنامالار، بروشيۋرالار) تاراتىلدى.
سۋداعى بالالار ءولىمىنىڭ الدىن الۋ ماسەلەلەرىنە ەرەكشە كوڭىل بولىنەدى.
ەلىمىزدىڭ وقۋ ورىندارىندا جوسپاردان تىس اتا-انالار جينالىسى وتكىزىلدى، وندا اتا-انالارعا سۋ ايدىندارىنداعى قاۋىپسىزدىك شارالارى جەتكىزىلدى. سۋدا قاۋىپسىزدىك بويىنشا 152-دەن استام ينتەراكتيۆتى ساباق ۇيىمداستىرىلىپ، وتكىزىلدى، ونىڭ بارىسىندا 140 مىڭنان اسا وقۋشى قامتىلدى.
سۋ قويمالارىنا جاقىن ورنالاسقان 45 بالالار لاگەرىندە قۇتقارۋشىلار جاعاجايدىڭ ءتۇبىن تەكسەرىپ، قۇتقارۋ جابدىقتارىن تەكسەرىپ، اقپاراتتىق ستەندتەر ورناتتى.
سۋعا شومىلۋ ماۋسىمىنىڭ قىزعان ۋاقىتى ماۋسىم-شىلدە ايلارى (اۋا تەمپەراتۋراسىنىڭ كوتەرىلۋى بايقالادى)، وسى كەزدە ەلىمزىدەگى حالىقتىڭ باسىم بولىگى ەڭبەك دەمالىسىنا، بالالار جازعى دەمالىسقا شىققان ۋاقىت. ول كەزدە ادامدار جاپپاي سۋ ايدىندارىنا بارادى دەپ كۇتىلۋدە.
جىل سايىن ادامداردىڭ سۋدا قازا بولۋىنىڭ نەگىزگى سەبەبى سۋداعى قاراپايىم قاۋىپسىزدىك ەرەجەلەرىن بۇزۋ بولىپ تابىلادى (ءوز كۇشتەرىن جەتە باعالاماۋ، جۇزە الماۋ، ماس كۇيىندە سۋعا ءتۇسۋ)، جۇرگىزىلىپ جاتقان جۇمىسقا قاراماستان، سۋداعى قاۋىپسىزدىك شارالارىن الدىن الۋ بويىنشا ەل حالقى، ارتىق وزىنە-وزى سەنىمدىلىك، ءوز كۇشتەرى مەن مۇمكىندىكتەرىن قايتا باعالاۋ، سۋداعى قاراپايىم ءتارتىپ ەرەجەلەرىن ەلەمەۋ سالدارىنان جىل سايىن سۋ ايدىندارىنداعى وقيعالارعا ۇشىرايدى.
توتەنشە جاعدايلار كوميتەتى ەلىمىزدىڭ ازاماتتارىن سۋداعى قاۋىپسىزدىك ەرەجەلەرىن ساقتاۋعا شاقىرادى.
