اعىمداعى جىلى جامبىل وبلىسىندا مەملەكەتتىك «نۇرلى جەر» باعدارلاماسى بويىنشا 465،4 مىڭ شارشى مەتر تۇرعىن ءۇيدىڭ قۇرىلىسىن جۇرگىزۋ جوسپارلانعان. ونىڭ ىشىندە 140 247  شارشى مەتر كوپپاتەرلى، 325 153 شارشى مەتر جەكە تۇرعىن ءۇي قۇرىلىسىنا جاتادى. سونىمەن قاتار، وڭىردە «نۇرلى جەر» باعدارلاماسى اياسىندا تۇرعىن ۇيلەر جانە ينجەنەرلىك ينفراقۇرىلىممەن قامتاماسىز ەتۋ نىساندارىنا 16،7 ميلليون تەڭگە قارجى قاراستىرىلعان. ال ونىڭ ىشىندە ارەندالىق ۇيلەرگە 5،7 ميلليارد، كرەديتتىك ۇيلەرگە 6،2 ميلليارد، ال جالپى ينفراقۇرىلىمدى دامىتۋعا 4،6 ميلليارد تەڭگە بولىنگەن.

جامبىل وبلىسى بويىنشا بولىنگەن قارجى ەسەبىنەن 30 كوپپاتەرلى تۇرعىن ءۇيدىڭ قۇرىلىسى جۇرگىزىلىپ، 14 ينجەنەرلىك ينفراقۇرىلىم جوبالارى ىسكە اسىرىلادى. جامبىل وبلىسى اكىمدىگى قۇرىلىس باسقارماسىنىڭ باسشىسى جايىقباي شالداروۆتىڭ ايتۋىنشا، اعىمداعى جىلى بيۋدجەت ەسەبىنەن 2095 ادام پاتەرمەن قامتاماسىز ەتىلەدى. ياعني، ساتىپ الۋ مۇمكىندىگىنسىز جالعا بەرىلەتىن تۇرعىن ءۇي سالۋ بويىنشا بيىلعى جىلى 658 پاتەرلى ارەندالىق 9 ءۇيدىڭ قۇرىلىسى جانە قايتا جاڭعىرتۋ جۇمىستارى جۇرگىزىلەتىن بولادى. ماسەلەن، تاراز قالاسىندا 400 پاتەرلى 5 ءۇي، قورداي اۋدانىندا 50 پاتەرلى 1 ءۇي، جامبىل اۋدانىندا 18 پاتەرلى 1 ءۇيدىڭ قۇرىلىسى جۇرگىزىلگەن بولسا، سارىسۋ اۋدانىندا 190 پاتەرلى 2 ۇيگە قايتا جاڭعىرتۋ جۇمىستارى جۇرگىزىلەتىن بولادى. سونىمەن قاتار، 2019 جىلى 1460 پاتەرلى 21 ءۇيدىڭ قۇرىلىسىن اياقتاپ، پايدالانۋعا بەرۋ جوسپارلانىپ وتىر ەكەن.

تۇرعىندارعا كرەديتتىك نەگىزدە ۇلەستىرىلەتىن تۇرعىن ۇيلەردەن 800 پاتەرلى 10 ءۇي وتكەن جىلدان وتپەلى بولسا، 660 پاتەرلى 11 ءۇيدىڭ قۇرىلىسى جۋىق ارادا باستالاتىن بولادى. تاراز قالاسىندا جۇرگىزىلەتىن مۇنداي تۇرعىن ۇيلەردىڭ قۇرىلىسىنا 6،2 ميلليارد تەڭگە بولىنگەن.

تاعى ءبىر ايتا كەتەتىن ماسەلە، ايماقتا ءبىرىڭعاي ساۋلەتتىك ستيلدە جەكە ۇيلەر سالۋ جوباسى بويىنشا تاراز قالاسىندا 255 ءۇيدىڭ قۇرىلىسى باستالىپ كەتتى. بۇل تۇرعىن ۇيلەردىڭ ءبارى دە اعىمداعى جىلى ءوز يەلەرىنە تابىستالاتىن بولادى دەپ كۇتىلۋدە.

دۋلات ايتباي