مەملەكەت باسشىسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا شاعىن جانە ورتا كاسىپكەرلىكتى دامىتۋعا ايرىقشا كوڭىل ءبولدى. بۇل باعىتتا بۇگىندە باعدارىن تاۋىپ جاتقان شارۋالار از ەمەس. سونداي-اق باياندى باستاماعا الىس-جاقىن اۋدانداردا دا ءۇن قوسۋدا. مىنە، سونداي ەلدى مەكەننىڭ ءبىرى - ت.رىسقۇلوۆ اۋدانىندا جاس كاسىپكەرلەر مەكتەبى اشىلىپ، كاسىپ اشامىن دەگەندەرگە كومەك كورسەتۋدە.
اۋدان اكىمدىگىنىڭ ىشكى ساياسات ءبولىمىنىڭ «جاستار رەسۋرستىق ورتالىعى» مەكەمەسى جانە اۋداندىق كاسىپكەرلەر پالاتاسىمەن بىرلەسە وتىرىپ اشقان تىڭ باعىتتاعى مەكتەپ ەل يگىلىگىنە جاستاردىڭ ەڭبەگى مەن قابىلەتىن ارناۋدى كوزدەيدى. مۇندا تابىستى كاسىپكەرلەر اۋداننىڭ جاس ازاماتتارىنا ءىس باستاۋداعى ءتيىمدى جولدى كورسەتىپ، سەمينار-ترەنينگتەر، شەبەرلىك كلاسستارىن وتكىزەدى. جىل باسىندا قۇرىلعان مەكتەپ العاشقى كەزدەسۋىن اقپان ايىندا وبلىسىمىزدىڭ ماقتانىشى، «قازاقستاننىڭ ەڭبەك ەرى» توسبەلگىسىنىڭ يەگەرى سايرامباي دونەنبايەۆپەن وتكىزگەن بولاتىن. سول جيىندا ەڭبەك ەرىنە ءبىراز جاستار كوكەيىندەگى ساۋالدارىن قويىپ، ىسكەرلىكتەگى تابىستىڭ كىلتى نەدە ەكەنىن سۇراعان.
–ەڭبەكپەن ەسەيگەن ادام ءومىردىڭ ەشبىر قيىندىعىنان قاشپايدى، قورىقپايدى، كەزكەلگەن كەدەرگىلەردى بۇزىپ-جارىپ وتەدى. مۇراتى بيىك ازاماتتىڭ الماس قامالى جوق. سەندەر ناعىز كۇش-قۋاتى تاسىعان شاقتاسىڭدار. بۇل – قايتىپ ورالمايتىن ۋاقىت. وسى ۋاقىتتى ءتيىمدى پايدالانىپ، بولاشاقتارىڭا جارقىن جول سالىڭدار. ادام ىستەگەن ىسىمەن ابىروي تابادى. ادەمى سويلەپ، ءىسىڭ كەرىسىنشە شىقسا، ەڭ ۇلكەن ۇيات – سول. ءقازىر جاستار «جۇمىس جوق» دەگەندى كوپ ايتادى. تىرشىلىك بولعان جەردە جۇمىس تا كوپ، تەك شىن نيەت بولسا. ماسەلەن، ءقازىر كوپتەگەن شارۋا قوجالىقتار اۋىل شارۋاشىلىعى ماماندارىن تاپپاي ءجۇر. سولاردىڭ ءبىرى ءوزىممىن. ارينە، كوبىمىز تازا دا جىلى كابينەتتە وتىرىپ، اقشا تاپقىمىز كەلەدى. ال، ونىڭ ارعى جاعىندا ۇلكەن قاربالاس جۇمىس جاتقانىن ەسكەرە بەرمەيمىز. شىنتۋايتىندا، مال بابىن تاپقانعا بىتەدى. قانشالىقتى كرەسلودا وتىراتىن باسشى بولعىڭ كەلسە دە تەر توكپەيىنشە قۇرمەتكە بولەنە المايسىڭ. ال، اۋىل شارۋاشىلىعى مول ءناسىپتىڭ قاينار كوزى. جالقاۋلىققا جار بەرمەي، «تۋعان ەلىمە نە بەرە الامىن؟» دەگەندى ۇنەمى قاپەرلەرىڭدە ۇستاڭدار! –دەپ اعالىق اقىلىن ايتىپ، ءوزىنىڭ تاجىريبەسىمەن بولىسكەن ەدى.
اۋداندىق جاستار رەسۋرستىق ورتالىعى ديرەكتورىنىڭ ورىنباسارى باقتيار اسقار اۋدانداعى مۇددەلى مەكەمەلەردىڭ قاتىسۋىمەن اۋدانداعى كاسىپكەرلەر مەن كاسىپ اشۋعا نيەتى بار جاستاردىڭ باسىن قوسىپ، تاعى ءبىر پايدالى جيىن وتكىزىلگەنىن ايتادى.
–كەزدەسۋدە جاستار كاسىپكەرلەرلىگىن قولداۋ ماقساتىندا مەملەكەت تاراپىنان كورسەتىلەتىن جەڭىلدىكتەر جايىندا ءسوز قوزعالدى. ءبىرقاتار زامانداستارىم سول جەردە ءوزىنىڭ جاڭا ءىسىنىڭ جوسپارىن دا جاساپ الدى. شىندىعىندا مەملەكەتتىك باعدارلامالار قانشالىقتى ناسيحاتتالسا دا ايماقتاردا ءالى دە حابارسىز كىسىلەر كوپ. جيىندا جاستارعا مەملەكەت تاراپىنان جاسالاتىن قامقورلىقتار جونىندە كەڭ ماعلۇمات بەرىلدى. ەندى الداعى ۋاقىتتا اۋدانىمىزدىڭ بەلگىلى كاسىپكەرلەرى پازىل سۇلەيمەنوۆ، ءشامشىحان يسكاكوۆ، قونىسباي ساعىنبەك سىندى اعالارمەن كەزدەسۋلەر، سەمينارلار ۇيىمداستىرامىز دەپ جوسپارلاۋدامىز. ارينە، ءوز كاسىبىن اشىپ، ءىسىن دوڭگەلەتىپ وتىرعان جاستارىمىز دا جوق ەمەس. ولاردى دا كەزدەسۋلەرگە شاقىرىپ، تابىسكەرلىكتەگى تاسىلدەرىن سۇراپ، تاجىريبەلەرىمەن ءبولىسىپ وتىراتىن بولامىز، -دەيدى.
جاستاردىڭ كاسىپكەرلىككە دەگەن قۇلشىنىسىن ارتتىرۋدى كوزدەگەن مەكتەپ تالاي پايدالى ءىستىڭ ەركىن قانات جايۋىنا ىقپال ەتىپ، باستاما بولارىنا سەنەمىز.
تۇڭعىش پرەزيدەنت نۇرسۇلتان نازاربايەۆ جاستار جىلىنىڭ اشىلۋ سالتاناتىندا «جۇمىس، بۇل – ادام ءال-اۋقاتىنىڭ نەگىزگى كوزى. جاستار ساياساتىنىڭ نەگىزگى ماسەلەسى جۇمىسپەن قامتۋ بولىپ قالا بەرەدى. «فەيسبۋكتى» مارك سۋكەربەرگ 19 جاسىندا، «مايكروسوفتى» بيلل گەيتس 20 جاسىندا، «Apple» كومپانياسىن ستيۆ دجوبس 21 جاسىندا قۇرعان. بۇل كومپانيالار جۇزدەگەن مىڭ ادامدى جۇمىسپەن قامتىپ قانا قويماي، بيۋدجەتكە قىرۋار قارجى ءتۇسىرىپ وتىر. ولار ءوز بيزنەسىن باستاعاندا اۋقىمدى قارجى رەسۋرستارىنا نەمەسە ۇكىمەت قولداۋىنا سۇيەنگەن جوق. حالقىمىزدىڭ «اقىل – جاستان، اسىل – تاستان» دەگەن ناقىل ءسوزى بەكەر ايتىلماعان. ءبىزدىڭ جاستارىمىزدىڭ بويىندا مۇنداي قاسيەتتەر بار» دەگەن ەدى. قادامىن ەندى باسقان جاس كاسىپكەرلەر مەكتەبىنەن نۇرسۇلتان ءابىش ۇلى اتاعانداي الەمگە تانىمال، تابىسكەر كاسىپكەرلەردەي ىسكەرلەردىڭ باعىت الىپ شىعارىنان ءۇمىتتىمىز.
جايدار ازامات
