بۇگىندە قاي مەملەكەتتە بولماسىن جۇمىسسىزدىقپەن كۇرەس – باستى ماسەلەلەردىڭ ءبىرى بولىپ تۇرعانى ايقىن. الايدا كەيىنگى جىلدارى ەلىمىزدە بۇل باعىتتا ءبىرشاما شارۋالار قولعا الىنىپ، جەمىسىن بەرۋدە. سونىڭ ءبىرى – ناتيجەلى جۇمىسپەن قامتۋ مەملەكەتتىك باعدارلاماسى. 

جالپى «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى قولداۋدىڭ 2017-2021 جىلدارعا ارنالعان باعدارلاماسىنىڭ ەكىنشى باعىتى بويىنشا بىلتىر 1003 ادام شاعىن نەسيە الىپ، سونىڭ ارقاسىندا ءوزىن-وزى جۇمىسپەن قامتىعانداردىڭ قاتارى ارتقان. وتكەن جىلى بولىنگەن 4 ميلليارد 111 ميلليون تەڭگە نەسيە قارجات تولىق يگەرىلىپتى. بيىل دا وسىنشاما قاراجات ءبولىنىپ، 1020 ادامعا نەسيە بەرۋ جوسپارلانىپ وتىر ەكەن. بۇل تۋرالى وبلىس اكىمدىگى ىشكى ساياسات باسقارماسىنىڭ «وڭىرلىك كوممۋنيكاسيالار قىزمەتىنىڭ» اقپارات الاڭىندا اتالعان باعدارلامانىڭ ەكىنشى باعىتىنىڭ وبلىستا جۇزەگە اسىرىلۋى بارىسى حاقىندا وتكەن بريفينگتە ايتىلدى.

– ق ر تۇڭعىش پرەزيدەنتى-ەلباسى نۇرسۇلتان ءابىش ۇلى نازاربايەۆ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا: «ەڭبەك نارىعى تيىمدىلىگىن قامتاماسىز ەتۋدىڭ، ءاربىر ادامعا ءوز الەۋەتىن ىسكە اسىرا الۋى ءۇشىن جاعداي جاساۋ ماڭىزدى. ەكونوميكالىق ءوسۋ رەزەرۆى ءوزىن-وزى جۇمىسپەن قامتىعاندار مەن جۇمىسسىزدار بولىپ تابىلاتىنىن ەسكەرۋ قاجەت» دەپ اتاپ وتكەن بولاتىن. وسى ورايدا، بۇل باعدارلامانىڭ ماقساتى حالىقتى ناتيجەلى جۇمىسپەن قامتۋعا جاردەمدەسۋ جانە ازاماتتاردى كاسىپكەرلىككە تارتۋ بولعاندىقتان، وعان قاتىسۋشى ازاماتتاردىڭ قوعامدا قىزىعۋشىلىعى ارتىپ كەلەتىنىن ايتقىم كەلەدى. سەبەبى، باعدارلاما وعان قاتىسۋشىلاردى كاسىپكەرلىك داعدىلار بويىنشا وقىتىپ، ونىڭ ىشىندە اۋىل شارۋاشىلىعى كووپەراتيۆتەرىن قالىپتاستىرادى جانە جۇرتشىلىقتىڭ بيزنەس جوبالارىن سۇيەمەلدەۋدى كوزدەيدى. بۇگىندە وسى باعدارلامانىڭ ەكىنشى باعىتى نەگىزىندە بولىنگەن شاعىن نەسيە قاراجاتى قارجى ينستيتۋتتارىنا تولىعىمەن بەرىلدى. اتاپ ايتقاندا، 2 ميلليارد 466،6  ميلليون تەڭگە «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنىڭ وبلىستىق فيليالىنا، ال 1 644،4 ميلليون تەڭگە «اگرارلىق نەسيە كورپوراسياسى» اكسيونەرلىك قوعامىنىڭ وبلىستىق فيليالىنا تيەسىلى. سونىمەن قاتار، اعىمداعى جىلى قوسىمشا رەسپۋبليكالىق بيۋدجەتتەن 1 ميلليارد تەڭگە قاراستىرىلىپ وتىر، – دەيدى وبلىس اكىمدىگى اۋىل شارۋاشىلىعى باسقارماسى باسشىسىنىڭ ورىنباسارى قايرات امانوۆ.

جيىندا وبلىستىق كاسىپكەرلەر پالاتاسىنىڭ ءبولىم باسشىسى جانەل ءىلياسوۆا وتكەن جىلى «باستاۋ-بيزنەس» باعدارلاماسى اياسىندا 1 745 ادام كاسىپ اشۋدىڭ قىر-سىرىن ۇيرەنسە، بيىل 1 200 ادامدى وقىتۋ جوسپارلانىپ وتىرعانىن ايتتى. سونىمەن قاتار، «اگرارلىق نەسيە كورپوراسياسى» اكسيونەرلىك قوعامىنىڭ وبلىستىق فيليالى ديرەكتورىنىڭ ورىنباسارى احمەديار ايتبايەۆ، «قازاگروگرانت» اكسيونەرلىك قوعامىنىڭ وبلىستىق فيليالىنىڭ ديرەكتورى ادىلەت قالابايەۆ، «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنىڭ وبلىستىق فيليالىنىڭ نەسيە ءبولىمىنىڭ باسشىسى باۋىرجان تاجىبايەۆ، «اتامەكەن-تاراز» جاۋاپكەرشىلىگى شەكتەۋلى سەرىكتەستىگىنىڭ ديرەكتورى سامات قوسالييەۆ اتالعان باعدارلاما اياسىندا بەرىلەتىن قارجى تەتىكتەرى مەن شاعىن نەسيە الۋعا قانداي قۇجاتتار كەرەكتىگى جونىندەگى مالىمەتتەرمەن ءبولىستى.

جايدار ازامات