ەلباسىنىڭ تاپسىرماسىمەن  «نۇرلى جەر» مەملەكەتتىك باعدارلاماسى اياسىندا الەۋمەتتىك جاعدايى تومەن وتباسىلاردى جالعا بەرىلەتىن باسپانامەن قامتۋ قولعا الىنعانى بەلگىلى. بۇل يگى ءىس جامبىلدا دا  كورىنىس تاۋىپ، تاياۋدا تاراز قالاسى «بايتەرەك» ىقشاماۋدانىندا 60 پاتەرلى ارەندالىق-كوممۋنالدىق تۇرعىن ءۇي پايدالانۋعا بەرىلدى. قونىستوي يەلەرىنىڭ قۋانىشىمەن بولىسكەن وبلىس اكىمىنىڭ ورىنباسارى ەركەبۇلان داۋىلبايەۆ ولارعا پاتەر كىلتتەرىن سالتاناتتى جاعدايدا تابىس ەتتى.

– وبلىستا «نۇرلى جەر» باعدارلاماسى بويىنشا بيىلعى جىلعا 30 تۇرعىن ءۇيدىڭ قۇرىلىسىنا 12 ميلليارد تەڭگەدەن استام قارجى قارالدى. ونىڭ بۇگىندە قۇرىلىس جۇمىستارى قىزۋ قارقىن الىپ، سونىڭ ناتيجەسىندە 60 وتباسىنىڭ باسپانامەن قامتىلۋ قۋانىشىنا ورتاقتاسىپ وتىرمىز. بۇدان بولەك، وسى جىلدىڭ سوڭىنا دەيىن 30 تۇرعىن ءۇيدىڭ 28ء-ى پايدالانۋعا بەرىلەدى دەپ كۇتىلۋدە. سونىڭ ەسەبىنەن جۇرتشىلىققا 2 175 پاتەر تاپسىرىلماقشى. وڭىرىمىزدە 25 مىڭ ادام ءۇي كەزەگىندە تۇرسا، ونىڭ 14 مىڭنان استامى تۇرعىن ۇيگە وتە مۇقتاج ازاماتتار. ونىڭ ىشىندە 2 641ء-ى كوپبالالى وتباسى ساناتىندا. بيۋدجەت تاپشىلىعىنا قاراماستان، باسپانا ماسەلەسىن شەشۋ ماقساتىندا وبلىس اكىمى اسقار مىرزاحمەتوۆتىڭ تاپسىرماسىمەن 360 پاتەرلى 8 جاتاقحانانىڭ قۇرىلىسى جاز ايىندا قولعا الىناتىن بولدى. ول جاتتاقحانالار  الەۋمەتتىك وسال توپقا جاتاتىن ازاماتتارعا بەرىلەدى. جالپى، جىل اياعىنا دەيىن وسى تەكتەس جاڭادان سالىناتىن جاتاقحانالار ەسەبىنەن تۇرعىن ءۇي كەزەگى كەلگەنشە ازاماتتاردى جايلى  باسپانامەن قامتۋ ماقساتىندا جۇرت 612 پاتەرمەن قامتىلادى دەپ كۇتىلۋدە، – دەدى ەركەبۇلان ءابىلحان ۇلى.

پاتەر كىلتىنە يە بولعاندار نەگىزىنەن تۇرعىن ءۇي كەزەگىندە تۇرعان الەۋمەتتىك وسال توپ وكىلدەرى. پايدالانۋعا بەرىلگەن كوپقاباتتى تۇرعىن ءۇي الەۋمەتتىك جاعىنان قورعالاتىن توپتاردىڭ ازاماتتارىنا جەكەشەلەندىرۋ قۇقىعىنسىز بەرىلگەن. ولار ايما-اي جالعا بەرىلگەن پاتەرگە تولەيتىن 5-6 مىڭ تەڭگە تولەماقىنى ۇلكەن كومەك دەپ وتىر.

جالپى، قونىستى قۇتقا بالاعانداردىڭ قاتارىندا 17ء-سى مەملەكەتتىك جانە بيۋدجەتتىك ۇيىم قىزمەتكەرى بولسا، 31ء-ى الەۋمەتتىك جاعىنان قورعالعاندار، 12ء-سى جەتىم بالالار. ومىرلىك قيىن جاعدايداعى بالالاردى قورعاۋ ورتالىعىنىڭ تاربيەلەنۋشىسى بەكبولات سەرىكباي اتا-اناسىنان ەرتە ايىرىلعانىن، مەملەكەت قامقورلىعى ارقاسىندا ارمانى بىرتىندەپ جۇزەگە اسىپ كەلە جاتقانىن ايتادى.

– نەگىزىنەن، ءبىر ۇيدەن 5 اعايىندى شىققانبىز. پاتەر كەزەگىندە تۇرعانىمىزعا 10 جىلدان استى. مىنا پاتەر ءىنىم ەكەۋمىز تۇرۋ ءۇشىن بەرىلدى. ءوزىم ومىرلىك قيىن جاعدايداعى بالالاردى قورعاۋ ورتالىعىنىڭ 11 سىنىپ وقۋشىسىمىن. بولاشاقتا جوعارى وقۋعا ءتۇسىپ، ماماندىق يگەرىپ، ەلگە، وتانعا قىزمەت ەتسەم دەگەن ارمانىم بار، – دەيدى ول.

اتالعان تۇرعىن ءۇي قۇرىلىسىن مەردىگەر «بينوم» جاۋاپكەرشىلىگى شەكتەۋلى سەرىكتەستىگى جۇرگىزىپتى. ونداعى پاتەرلەردىڭ 30-ى 71 شارشى مەتىردى قۇرايتىن 3 بولمەلى بولسا، قالعانى 1،2 بولمەلى (58،40 شم) پاتەرلەر.

الداعى ۋاقىتتا پايدالانۋعا بەرىلەتىن 1 460 پاتەرلى 21 ءۇي كرەديتتىك بولسا، 526 پاتەرلى 7 ءۇي ارەندالىق نەگىزدە سالىنباق. ونىڭ ىشىندە 187 پاتەر كەزەكتەگى كوپبالالى وتباسىلاردىڭ ساتىپ الۋى ءۇشىن جوسپارلانعان.

جايدار ازامات