بۇگىن نۇر-سۇلتان قالاسىندا ماڭعىستاۋ وبلىسىنىڭ اكىمدىگى جانە ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇيىمداستىرىۋىمەن «سەرىكبول قوندىباي مۇرالارىنداعى ارعىقازاق ميفولوگياسى جانە ۇلى دالا وركەنيەتى» اتتى II حالىقارالىق عىلىمي-تەوريالىق كونفەرەنسيا ءوتتى.
كونفەرەنسيا، دۇنيەجۇزىلىك ميفولوگيالىق مەكتەپتەردىڭ تەوريالىق نەگىزدەرى جانە يدەيالارىن، تاقىرىپتارى مەن مىسالدارىن سالىستىرا زەرتتەپ رەكونسترۋكسيالاۋ نەگىزىندە «ارعىقازاق (دەي-تۇركى) ميفولوگياسىنىڭ» نەگىزىن قالاعان، جاراتىلىستانۋ جانە گۋمانيتارلىق عىلىمدار سالاسىنداعى دەموكراتيالىق وي-تولعاۋلار مەن جاڭا تۇجىرىمدار ۇسىنعان ميفولوگ-عالىم سەرىكبول قوندىبايدىڭ شىعارماشىلىعىنا ارنالدى. كونفەرەنسياعا رەسپۋبليكامىزدىڭ اتاقتى عالىمدارى مەن قوعام قايراتكەرلەرى، تۇركيا، رەسەي، اقش مەملەكەتتەرىنەن ميفولوگيا، فيلوسوفيا، تاريح، ەتنولوگيا، ارحەولوگيا، وركەنيەت تانۋ سالالارىنىڭ عالىمدارى مەن مۋزەي زەرتتەۋشىلەر ورتالىعىنىڭ ارنايى شاقىرىلعان 200 ۇستىندە قوناقتار مەن عىلىمي ورتا قاتىستى. 
كونفەرەنسيا بارىسى - «كۇنتەكتى قاھارمەن» دەرەكتى ءفيلمى، «قازاقستان» ترك «بالاپان» ارناسى دايىنداعان «ايدار» جانە «قوڭىرقاز» انيماسيالىق ءمۋلتفيلمىنىڭ كورسەتىلىمىنەن باستالىپ، س.قوندىباي شىعارمالارى بويىنشا ديزاينەر تاربيە ايدىنبايەۆانىڭ «ميفتىك كەيىپكەرلەر شەرۋى» اتتى دەفيلەسىنىڭ تۇساۋكەسەرىنە ۇلاستى. جينالعان قاۋىم اتالعان ەكى كورسەتىلىمگە ءدان ريزا بولىپ، العان اسەرلەرىن وۆاسيامەن ءبىلدىردى. ءسوز باسىن وبلىس باسشىسى ەرالى توعجانوۆتىڭ ارنايى قۇتتىقتاۋىن جەتكىزىپ، كونفەرەنسيا قاتىسۋشىلارىنا ساتتىلىك تىلەگەن وبلىستىق ارداگەرلەر ءتوراعاسى تولەتوۆ سەرىكباي قۇدايبەرگەن ۇلى باستادى. كونفەرەنسيا تىزگىنىن ەۋرازيا ۇلتتىق ۋنيۆەرسيتەتىنىڭ پرورەكتورى، قعا اكادەميگى ديحان قامزابەك ۇلى ۇستادى. عىلىمي كونفەرەنسيا جۇمىسى كەلەسى باعىتتاردى قامتىدى:
- سەرىكبول قوندىبايدىڭ ەڭبەكتەرى جانە ميفولوگيا قۇبىلىسى؛
- ۇلى دالا قۇندىلىقتارى جانە تانىم ساباقتاستىعى.
شەتەلدىك عالىمدار اراسىندا الەمدىك دەڭگەيدەگى عالىمدار تۇركيە ەلىنىڭ ەگەي ۋنيۆەرسيتەتىنىڭ پروفەسسورى مۇستافا ونەر، رف، چۋۆاش رەسپۋبليكاسىنىڭ مەملەكەتتىك ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى، الەمدىك تۇركىتانۋشىلار اسسوسياسياسىنىڭ ءتورالقا مۇشەسى نيكولواي ەگوروۆ، رف باشقۇرتستان رەسپۋبليكاسىنىڭ عىلىم اكادەمياسى ۋفا فەدەرالدىق زەرتتەۋ ورتالىعى تاريح، ءتىل جانە ادەبيەت ينستيتۋتىنىڭ پروفەسسورى، فيلولوگيا عىلىمدارىنىڭ دوكتورى فيرداۋس حيساميتدينوۆا جانە ت.ب. قاتىستى. سولاردىڭ ءبىرى ۆيسكونسين-ماديسون ۋنيۆەرسيتەتىنىڭ پروفەسسورى جانە نازاربايەۆ ۋنيۆەرسيتەتى تۇركىتانۋ جانە قازاق ءتىلى كافەدراسىنىڭ جەتەكشىسى، PhD (اقش) يۋلاي شاميلوگلۋ بايانداما جاساپ، نازاربايەۆ ۋنيۆەرسيتەتىندەگى «قازاق ميفولوگياسى» اشىلىپ، سەرىكبول قوندىباي شىعارمالارى نەگىزگە الىنىپ وقىتىلاتىنىن ايتتى. «مەنى قۋانتاتىنى سەرىكبولدىڭ شىعارمالارىنا دەن قويعان ءالى دە بىزگە بەلگىلى ەمەس جاس عالىمداردىڭ ءوسىپ كەلە جاتقاندىعى. ەۋرازيا ۇلتتىق ۋنيۆەرسيتەتىنىڭ بازاسىندا بار سەرىكبول ءىلىمىن الەمدىك عىلىمي اينالىمعا ەنگىزۋگە تولىق مۇمكىندىكتىڭ بارلىعى. ەندىگى ماقسات قازاق ميفولوگيا تۋرالى ەڭبەكتەردىڭ شەتەل تىلدەرىنە اۋدارىلىپ، ۇلتتار مەن حالىقتار مادەنيەتىن جاقىنداستىرىپ ناسيحاتتاۋ» - دەدى عالىمنىڭ اپاسى بالسۇلۋ قوندىباي. كونفەرەنسيانىڭ جالعاسى سەكسيالىق وتىرىسقا ۇلاسىپ، عىلمي پىكىرتالاس تۇرىندە ءوتىپ، كەلگەندەر ميفلوگيانىڭ قازىرگى تاڭداعى كوكەيكەستى ماسەلەلەرىن قىزۋ تالقىلادى. وتىرىس سوڭىندا «سەرىكبول قوندىباي مۇرالارىنداعى ارعىقازاق ميفولوگياسى جانە ۇلى دالا وركەنيەتى» اتتى II حالىقارالىق عىلىمي-تەوريالىق كونفەرەنسيانىڭ قورىتىندىسى بويىنشا قارار قابىلداندى.
