ماڭعىستاۋ وبلىسىندا 1 مامىر – بىرلىك كۇنى كەڭ اۋقىمدا اتالىپ ءوتتى. مەرەكەلىك شارا 5000 ادامنان تۇراتىن ەڭبەك ۇجىمدارىنىڭ شەرۋىنەن باستالدى. ەل بىرلىگىن ناعايتۋعا باعىتتالعان شەرۋگە ءار سالانىڭ قوعام بەلسەندىلەرى، قازاقستان حالقى اسسامبلەياسىنىڭ وكىلدەرى، ۇلتتىق-مادەني بىرلەستىك مۇشەلەرى، جاستار، مۇنايشىلار، ەنەرگەتيكتەر، تۇرعىن ۇي-كوممۋنالدىق شارۋاشىلىق قىزمەتكەرلەرى، دارىگەرلەر مەن مۇعالىمدەر، شاعىن جانە ورتا بيزنەس سۋبەكتىلەرى، قارجىگەرلەر، سپورتشىلار مەن ونەرپازدار اتسالىستى. 

قولدارىنا ىنتىماق پەن بەرەكەنى ۇلىقتايتىن قاناتتى سوزدەر جازىلعان ترانسپارانتتار مەن جالاۋشالار بار قىزمەتكەر، ءتۇرلى-تۇستى شارلارمەن بەزەندىرىلگەن ارنايى تەحنيكالار مەرەكەلىك شەرۋدى كوركەيتە ءتۇستى. 

شەرۋ اياقتالىسىمەن باس ساحنا-امفيتەاتردا «ۇلت بىرلىگى – ۇلى بايلىق» اتتى ولكە شىعارماشىلىق ۇجىمدارىنىڭ مەرەكەلىك كونسەرتىنە ۇلاستى. كونسەرتپەن قاتار الاڭنىڭ باسقا بولىكتەرىندە ءتۇرلى سپورتتىق شارالار، ۇلتتىق تاعامدار مەن قولدانبالى قولونەر بۇيىمدارىنىڭ كورمەسى، قالا كاسىپكەرلەرىنىڭ مەرەكەلىك جارمەڭكەسى ءجۇرىپ جاتتى. 
اتالعان شاراعا ماڭعىستاۋ وبلىسىنىڭ اكىمى تۇرعىنداردى بىرلىك كۇنىمەن قۇتتىقتادى.

«بۇل كۇن بىرلىك، تاتۋلىق كۇنى، ءارقايسىسىمىز ءۇشىن ەرەكشە قىمبات مەيرام. 1 مامىر – ءبىزدىڭ ميلليونداعان وتانداستارىمىزدىڭ جۇرەگىنەن ايرىقشا ورىن تاپقان، رۋحاني داستۇرگە اينالعان ايتۋلى كۇن. ەلدىگىمىز بەن ەگەمەندىگىمىزدىڭ دىڭگەگى، تاتۋلىعىمىز بەن دوستىعىمىزدىڭ ۇيىتقىسى، وتانىمىزدىڭ تىرەگى بولىپ وتىرعان وسى – بىرلىك پەن ىنتىماق، اعايىن! بىرلىك پەن ىنتىماقتىڭ المايتىن قامالى، شىقپايتىن شىڭى، اسپايتىن اسۋى جوق. قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ «ءبىزدىڭ تىرەگىمىز - تاۋەلسىزدىك، تىلەگىمىز - تۇراقتىلىق، بىلەگىمىز - بىرلىك!»، -دەگەن بولاتىن. راسىمەن دە، تاۋەلسىزدىك، تۇراقتىلىق پەن بىرلىكتەن اسقان قۇندىلىق جوق. ءبىزدىڭ كوپۇلتتى ەلىمىز بەن كوپەتنوستى قوعامىمىزدى «ماڭگىلىك ەل» جالپىۇلتتىق يدەياسى اياسىندا جۇمىلدىرۋدا، تۋعان جەرگە دەگەن پاتريوتيزم، سەنىم، دوستىق قۇندىلىقتارىنىڭ ورنىعۋىندا قازاقستان حالقى اسسامبلەياسى ينستيتۋتىنىڭ ماڭىزى زور. اسسامبلەيا – تاۋەلسىزدىكتىڭ جەمىسى. اسسامبلەيا كەز كەلگەن سىن-قاتەر تونگەن كەزدە جانە تاۋەلسىزدىكتىڭ بارلىق كەزەڭىندە ءاردايىم بيىكتەن كورىنە ءبىلدى. ونىڭ تاريحىندا ءبىزدىڭ ۇلتتىڭ ورلەۋ ءداۋىرىنىڭ كەزەڭدەرى مەن ناقتى ناتيجەلەرى كورىنىس تاۋىپ كەلەدى»، - دەدى وبلىس اكىمى.

ءسوز سوڭىندا ءوڭىر باسشىسى ايتۋلى كۇندە ماڭعىستاۋلىقتار مەن قالا قوناقتارىنا دەندەرىنە ساۋلىق، وتباسىلارىنا باقىت جانە مەرەكەلىك كوڭىل كۇي تىلەدى.