ەلىمىز ءۇشىن ەڭ ەلەۋلى داتالاردىڭ ءبىرى 9-مامىر جەڭىس كۇنى.
وسىعان وراي اقتاۋداعى «ماڭگىلىك الاۋ» مونۋمەنتى ەسكەرتكىشىنىڭ الدىندا مەرەكەلىك شارا ءوتتى. جىلداعى ءداستۇر بويىنشا "باتىرلارعا تاعزىم" شەرۋى ۇيىمداستىرىلدى. قولدارىنا ۇلى وتان سوعىسىنا قاتىسقان جاقىندارىنىڭ سۋرەتتەرىن ۇستاپ شىققان 3500 استام ادام ورتالىق كوشەمەن ءجۇرىپ ءوتتى. مەرەكەلىك شارا سوعىس جىلدارىنان سىر شەرتەر تەاترلاندىرىلعان كورىنىستەر مەن ان-بيگە جالعاستى.
سونداي-اق، مەرەكەگە وراي قالانىڭ قاق ورتاسىندا شاتىر تىگىلىپ، «اسكەري دالالىق اس ءۇي» ورناتىلىپ جۇرتشىلىق جاۋىنگەر بوتقاسىنىڭ ءدامىن تاتتى. ءبىر ءتىلىم نان، قاراقۇمىق بوتقاسى قان مايداندا جاۋىنگەرگە ءنار بەرىپ، قايراتى مەن ايباتىن اسىرعان. ءدال وسى استان اقتاۋلىقتار دا اۋىز ءتيدى.
سالتاناتتى جيىندا وبلىس اكىمى ەرالى توعجانوۆ ارداگەرلەردى مەرەكەمەن قۇتتىقتادى. «ەلباسى، تۇڭعىش پرەزيدەنتىمىز نۇرسۇلتان ءابىش ۇلى نازاربايەۆ «قايسارلىق پەن قاھارماندىق، وتانعا دەگەن سۇيىسپەنشىلىك اسا قاتىگەز سۇراپىل سوعىستا جەڭىسكە جول اشتى» دەگەن بولاتىن. راسىمەن دە، جەڭىس پەن جەتىستىك ۇعىمدارى ەلىمىزدىڭ دامۋ قارقىنىمەن قاشاندا قاناتتاس كەلەدى. سوندىقتان وسىناۋ بەيبىت ومىرگە جەتكىزگەن ارداگەرلەرىمىزدىڭ الدىندا باس يە وتىرىپ، اماندىق تىلەيمىن. سۇراپىل سوعىس جىلدارى قازاق حالقى ءوزىنىڭ وتانىنا، جەرىنە دەگەن پاتريوتتىق سەزىمىن دالەلدەدى. ماڭعىستاۋ ءوڭىرىنىڭ ءاربىر ءتورتىنشى تۇرعىنى قولىنا قارۋ الىپ، مايدانعا اتتاندى. ۇزىن سانى 6000 مىڭنان استام ادام وتان ءۇشىن وتقا تۇسسە، سونىڭ 4800ء-ى قان مايداندا قازا بولىپ، حابارسىز كەتتى. جەڭىس ساربازدارى ءالى دە ساپتا. ءبىزدىڭ ءوڭىرىمىز بويىنشا 16 ۇلى وتان سوعىسىنىڭ ارداگەرى ورتامىزدا ءجۇر. ءبىز ولارعا شەكسىز قۇرمەت كورسەتىپ، داڭقىن اسقاقتاتۋعا ءتيىسپىز" – دەدى وبلىس اكىمى.
سونداي-اق، وبلىس باسشىسى تاۋشىق اۋىلىنىڭ تۇرعىنى، سوعىس ارداگەرى 95 جاستاعى مامبەت ۇلى يبراحيمگە اقتاۋ قالاسىنان سۋ جاڭا پاتەردىڭ كىلتىن تابىس ەتتى. مامبەت ۇلى يبراحيم 1924 جىلى تۋعان. مايدانعا 1942 جىلى اتتانادى. قالماق دالاسى مەن ستالينگراد ۇرىستارعا قاتىسىپ جاراقات الادى. سوعىس اياقتالعاننان كەيىن تاۋشىقتا كولىك جۇرگىزۋشىسى بولىپ ۇزاق جىلدار قىزمەت ەتەدى. «1941-1945 جىلدارى ۇوس گەرمانيانى جەڭگەنى ءۇشىن» مەدالىمەن ماراپاتتالعان.
