اقتاۋ قالاسىندا «كاسپيي پورتتارى جانە كەمە قوزعالىسى – 2019» دەپ اتالاتىن حالىقارالىق كورمە مەن كونفەرەنسيا ۇيىمداستىرىلدى. 
شاراعا 30-عا جۋىق شەتەلدىك كولىك جانە لوگيستيكا كومپانيالارى، 40 استام سپيكەرلەر قاتىستى. ال كورمەدە 300-دەن استام تەمىرجول، تەڭىز، كولىك جانە لوگيستيكا كومپانيالارى، وڭىردەگى جەتەكشى جۇك جونەلتۋشىلەر، پورت جابدىقتارى جانە قىزمەت كورسەتۋ مەكەمەلەرىنىڭ وكىلدەرى ونىمدەرىن ۇسىنىپ، مۇمكىندىكتەرىن تانىستىردى. 

كونفەرەنسيا بارىسىندا شەتەلدىك ساراپشىلار كاسپيي وڭىرىندە كولىك ينفراقۇرىلىمىن پايدالانۋ جاعدايىنداعى جاھاندىق ەكونوميكا مەن وڭىرلىك ساۋدا سىن-تەگەۋرىندەردى تالقىلادى. جيىندا ءسوز العان وبلىس اكىمى ەرالى توعجانوۆ: «جالپى قازاقستاننىڭ، سونىڭ ىشىندە ماڭعىستاۋدىڭ ينفراقۇرىلىمىن دامىتۋدىڭ نەگىزىن قالاۋشى – ءبىزدىڭ تۇڭعىش پرەزيدەنت - ەلباسى نۇرسۇلتان ءابىش ۇلىنىڭ باستاماسى بويىنشا 2،5 مىڭ شاقىرىم جاڭا تەمىر جول جانە 12،5 مىڭ شاقىرىم اۆتو جول سالىندى، بۇل قىتايدان پارسى شىعاناعى مەن ەۋروپا ەلدەرىنە ءبىزدىڭ پورتتار ارقىلى جۇكتەردى تاسىمالداۋ ارقىلى رەسپۋبليكانىڭ ترانزيتتىك الەۋەتىن ءتيىمدى پايدالانۋعا مۇمكىندىك بەرىپ وتىرعانى ءسوزسىز. وسىنىڭ ارقاسىندا، لوگيستيكا سالاسىنداعى حالىقارالىق قاۋىمداستىقتاردىڭ تولىققاندى مۇشەسى بولدىق. كاسپيي جاعالاۋىنداعى جاڭا پورتتار بوي كوتەرىپ، سوڭعى ۇلگىدەگى لوگيستيكالىق ورتالىقتار سالدىق. ناتيجەسىندە قىتايدان پارسى شىعاناعى مەن ەۋروپا ەلدەرىنە، ونىڭ ىشىندە ءبىزدىڭ پورتتار ارقىلى جۇكتەردى تاسىمالداۋ ارقىلى رەسپۋبليكانىڭ ترانزيتتىك الەۋەتىن ءتيىمدى پايدالانۋعا جول اشادى. سونىمەن قاتار، وسىنداي ماڭىزدى يميدجدىك وقيعانى دا قازاقستاندىق الاڭدا وتكىزۋ وتاندىق كولىكتىك-لوگيستيكا سەكتورىن دامىتۋعا مول مۇمكىندىك بەرەدى» - دەدى.