ماڭعىستاۋ وبلىسىنىڭ مادەنيەت جانە ونەر قىزمەتكەرلەرى كۇنىنە وراي سالتاناتتى شارا ءوتتى. مەرەكەلىك كەشكە ماڭعىستاۋ وبلىسىنىڭ اكىمى ەرالى توعجانوۆ، سالا قىزمەتكەرلەرى مەن ارداگەرلەرى، رۋحانيات جاناشىرلارى قاتىستى. ءوڭىر باسشىسى جينالعانداردى مەرەكەمەن قۇتتىقتاپ، قاجىرلى ەڭبەكتەرى ءۇشىن ءتۇرلى ماراپاتتاردى تابىستادى.
اتاپ ايتساق، مادەنيەت جانە سپورت مينيسترلىگىنىڭ «مادەنيەت سالاسىنىڭ ۇزدىگى» توسبەلگىسىمەن م.وسكىنباي ۇلى اتىنداعى وبلىستىق فيلارمونياسى، ا.تاراق ۇلى اتىنداعى قازاق ۇلت-اسپاپتار وركەسترىنىڭ ءارتىس-اسپاپشىسى سەرىكقالي ىزىمبەرگەنوۆ، ق.سىديىقوۆ اتىنداعى وبلىستىق امبەباپ كىتاپحاناسىنىڭ ديرەكتورى زاۋرە ايتۋاروۆا، وبلىستىق قۋىرشاق تەاترىنىڭ رەجيسسەرى نادەجدا ناسىروۆا، وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعىنىڭ ءبولىم مەڭگەرۋشىسى نۇرجامال نوعايەۆا، ارحەولوگ اندرەي استافيەۆ، اباي اتىنداعى مادەني-دەمالىس كەشەنى «التاير» بي ءانسامبلىنىڭ جەتەكشىسى تامارا دۋمانوۆسكايا ماراپاتتالدى.
سونىمەن قاتار، 2018 جىلدىڭ قورىتىندىسى بويىنشا مادەنيەت جانە ونەر سالاسىنىڭ ۇزدىك قىزمەتكەرلەرىنە وبلىس اكىمى ارنايى ديپلوم مەن قارجىلاي سىياقى تابىس ەتتى.
مادەنيەت سالاسىنداعى الدىڭعى بۋىن اعالارىمىز بەن اپالارىمىزدىڭ ءىزىن جالعاعان وڭىردەگى دارىندى ۇرپاقتاردىڭ ماڭعىستاۋدىڭ مادەنيەت سالاسىنا بيىلعى جىلى قوسقان جەتىستىكتەرى دە از ەمەس. ولكەمىزدىڭ ماقتانىشى حورەوگراف-باللەتمەيستەر، رەجيسسەر سەرىك سارييەۆ جەتەكشىلىك ەتەتىن «جورعا» حالىقتىق بي ءانسامبلى الەمنىڭ 12 ەلىنەن 250-دەن استام ۇجىم قاتىسقان «وش - تۇركى الەمىنىڭ مادەني استاناسى» فەستيۆالىندە باس جۇلدەسىن جەڭىپ الدى؛ وبلىستىق قۋىرشاق تەاترى مولدوۆا رەسپۋبليكاسىنىڭ كيشينيەۆ قالاسىندا وتكەن X حالىقارالىق «پود شاپكوي گۋگۋسە» قۋىرشاق تەاترلارى فەستيۆالىنەن «ۇزدىك اكتەرلىك جۇمىسى مەن قۋىرشاق جۇرگىزۋ شەبەرلىگى» نوميناسياسىن يەلەندى؛ رەسەيدىڭ سوچي قالاسىندا وتكەن حالىقارالىق «حرۋستالنايا ماگنوليا» بايقاۋىندا قاراقيا اۋدانىنان سانسىزباي بالاۋسا ءى ورىن يەلەندى؛ جاڭاوزەندىك «اسىلمۇرا» فولكلورلىق ءانسامبلى رەسپۋبليكالىق «ۇركەر» بايقاۋىنان باس جۇلدەنى قانجىعاسىنا بايلادى.
سونىمەن قاتار، ولكەدە مۋزەي، كىتاپحانا سالالارىنداعى زامان اعىمىنا لايىقتى سيفرلاندىرۋ جۇمىستارىنىڭ دا ءساتتى ءوتىپ جاتقاندىعى جانە مادەنيەت سالاسىنىڭ بولاشاق ماماندارىنا دا جاعداي جاسالىپ جاتقانى بارشا جۇرتقا ءمالىم. سونىڭ ءبىر دالەلى وبلىستاعى 12 جاس وبلىس اكىمىنىڭ وقۋ گرانتىنا يە بولدى. بۇل ماڭعىستاۋ ونەرى جەتىستىكتەرىنىڭ ءبىر بولىگى عانا.
شارادا وبلىس اكىمى ەرالى توعجانوۆ جينالعانداردى ايتۋلى كۇنمەن قۇتتىقتادى. «ق ر پرەزيدەنتى قاسىم-جومارت توقايەۆتىڭ تاپسىرماسىنا سايكەس، ۇلى جازۋشى، كەمەڭگەر ءابىش كەكىلباي ۇلىنىڭ 80 جىلدىق مەرەيتويىنا ارنالعان 150-دەن اسا ءىس-شارالار جوسپارى بەكىتىلىپ، جازۋشىنىڭ شىعارماشىلىعى مەن قايراتكەرلىگىنە ارنالعان رەسپۋبليكالىق شارالاردى جوعارى دەڭگەيدە وتۋىنە اتسالىسۋعا شاقىرامىن. وبلىس ورتالىعى مەن ءابىش اعانىڭ تۋعان جەرى وندى اۋىلىندا ۇلكەن شارالار وتەدى. اعانىڭ تۋعان اۋىلىندا جاڭا مەشىتتىڭ قۇرىلىسى باستالدى. قازاق انالارىنىڭ سيمۆولى «اي انا» ەسكەرتكىشىنە جوندەۋ جۇمىستارى جۇرگىزىلۋدە. وندى ورتا مەكتەبىنىڭ الدىنا ءابىش اعامىزدىڭ ءبيۋستىن ورناتىپ، اۋىلعا 8 شاقىرىم اسفالت توسەمىنە جوندەۋ جۇمىستارى جۇرگىزىلەدى" – دەدى ايماق باسشىسى.
