اقتاۋ قالاسىنداعى حيميا-بيولوگيا باعىتىنداعى نازاربايەۆ زياتكەرلىك مەكتەبى حالىقارالىق مەكتەپتەر كەڭەسىنىڭ (CIS) اككرەديتتەلۋىنەن ءوتتى.

حالىقارالىق اككرەديتتەۋ بويىنشا CIS ديرەكتورى ستيۋارت ماكلەي مەكتەپكە قۇتتىقتاۋ حاتىن جولداپ، ۇجىمنىڭ ءبىلىم مەن تاربيەدەگى ۇمتىلىستارىن جوعارى باعالاعان. 

• اقتاۋ قالاسىنداعى حيميا-بيولوگيا باعىتىنداعى نازاربايەۆ زياتكەرلىك مەكتەبى قازىرگى ساتتەن باستاپ حالىقارالىق مەكتەپتەر كەڭەسىنىڭ (CIS) اككرەديتاسياسىنان وتكەندىگىن حابارلاعانىما قۋانىشتىمىن. سىزگە جانە ءسىزدىڭ قىزمەتكەرلەرىڭىز بەن بۇكىل مەكتەپ ۇجىمىنا ەڭ جىلى تىلەكتەرىمىزدى جولداي وتىرىپ، جەتىستىكتەرىڭىزبەن قۇتتىقتايمىز، -  دەيدى ول حاتىندا.

ءساۋىر ايىنىڭ باسىندا كەڭەستىڭ ساراپشىلارىنان قۇرالعان جۇمىس توبى وڭىردەگى مەكتەپتىڭ حالىقارالىق ستاندارتارعا سايكەستىگىن باعالاۋ ماقساتىندا كەلگەن ەدى. اۆستراليا، رۋمىنيا، فرانسيا، بەلگيا، تايلاند، ءباا، وزبەكستان ەلىنەن كەلگەن تاۋەلسىز ساراپشىلار بەس كۇن بويى ۇيىمنىڭ تىنىس-تىرشىلىگمەن تانىسىپ، اكىمشىلىك وكىلدەرى، پەداگوگتارمەن، وقۋشىلار جانە اتا-انالارمەن كەزدەسىپ، ءبىلىم بەرۋ جۇيەسىنە باقىلاۋ جۇرگىزدى. CIS كومانداسى ءبىلىم بەرۋ پروسەسى مەن مەكتەپ ءومىرىنىڭ ۇيىمداستىرىلۋىنا دا باعا بەردى. ساراپشىلار ساباقتارعا، ۇيىرمەلەرگە، سپورت سەكسيالارىنا قاتىسىپ، بالالاردىڭ تاماقتانۋ جانە مەديسينالىق كومەك الۋ مۇمكىندىكتەرىن ءوز كوزدەرىمەن كوردى. ماماندار توتەنشە جاعدايداعى بالالار مەن ۇجىم قاۋىپسىزدىگىنە باسا نازار اۋدارىپ، بىرنەشە سيتۋاسيالىق جاعدايلاردى دا باقىلادى.

باعالاۋشى تاراپ حالىقارالىق كەڭەستىڭ  «مەكتەپتىڭ ميسسياسى، كوزقاراسى مەن قۇندىلىقتارى»، «وقىتۋ جانە وقۋ»، «باسقارۋ جانە كوشباسشىلىق»، «وقىتۋشىلار مەن قىزمەتكەرلەرگە قولداۋ كورسەتۋ»، «وقۋ جانە وقىتۋعا قولجەتىمدىلىك»، «مەكتەپ مادەنيەتى» جانە وقىتۋ ءۇشىن سەرىكتەستىك»، «وپەراسيالىق جۇيەلەر» اتتى ستاندارتتارىنا سايكەس قۇرىلعان جۇمىس توپتارىمەن تىلدەستى.

كەڭەس قۇرامىنا ەنۋ مەكتەپ تۇلەكتەرىنە ۇزدىك ۋنيۆەرسيتەتتەرگە ءتۇسۋ بارىسىندا كومەگىن تيگىزىپ، ۇستازداردىڭ اككرەديتتەلەگەن مەكتەپتەرمەن ءوزارا تاجىريبە الماسۋىنا، حالىقارالىق دەڭگەيدە مىقتى ماماندارمەن جۇمىس ىستەۋگە مۇمكىندىك بەرەدى.

• حالىقارالىق مەكتەپتەر كەڭەسىنەن اككرەديتتەلۋىنەن ءوتۋ مەكتەبىمىزگە ۇزدىكسىز دامۋعا تاماشا مۇمكىندىكتەر اشادى. بۇل وقۋ ورنىنىڭ ۇنەمى جوعارى ءبىلىم ساپاسىنا ۇمتىلىسىنىڭ دالەلى جانە بىزگە ۇلكەن جاۋاپكەرشىلىك جۇكتەيدى، - دەدى مەكتەپ ديرەكتورى ەرمەك پايزوۆ.

حالىقارالىق مەكتەپتەر كەڭەسى (CIS) - بۇل مەكتەپتەردى اككرەديتتەۋگە جانە جەتىلدىرىلگەن وقىتۋ ادىستەرىن دامىتۋعا ارنالعان حالىقارالىق ءبىلىم بەرۋ ۇيىمى، ول الەمنىڭ 735 مەكتەبىن جانە 116 ەلدەن ۋنيۆەرسيتەتتەر مەن كوللەدجدەردى قامتيدى. اقتاۋداعى نازاربايەۆ زياتكەرلىك مەكتەبى NIS  جۇيەسىندەگى اكررەديتاسيادان وتكەن 18ء-شى مەكتەپ بولىپ وتىر.