اتىراۋ وبلىسىنىڭ اكىمى نۇرلان نوعايەۆ مەملەكەتتىك – جەكەمەنشىك ارىپتەستىكتى دامىتۋ ماسەلەسى بويىنشا كەڭەس وتكىزدى.

اتىراۋ وبلىسى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ايدار نۇرالييەۆتىڭ حابارلاۋىنشا، وڭىردە مەملەكەتتىك – جەكەمەنشىك ارىپتەستىك (ءمجا) اياسىندا جالپى سوماسى 21،4 ملرد تەڭگە بەس جوبا ىسكە اسىپ جاتىر.

وبلىستىق ءماسليحاتتىڭ تاياۋدا وتكەن سەسسياسىندا تاعى 3 جوبا ماقۇلداندى: قۇلسارىنىڭ كوشەلەرىن جارىقتاندىرۋ؛ اتىراۋ قالاسىندا بەينە-فوتو تىركەۋ كامەرالارىن ورناتۋ؛ وبلىس ورتالىعىن كەشەندى كوگالداندىرۋ.

بارلىعى سەگىز جوبا، جالپى قۇنى 38،7 ملرد تەڭگە.

سونىمەن قاتار، ا.نۇرالييەۆ ءمجا ىسكە اسىرۋدىڭ پروبلەمالىق تۇستارىنا دا توقتالدى. 2017 جىلدان بەرى ەكونوميكا باسقارماسى 60 جوبانى تالداپ، جۇزەگە اسپاي قالعان جوبالار بار ەكەنىن ايتتى.

سپيكەردىڭ ايتۋىنشا، ۇلتتىق ەكونوميكا مينيسترلىگى بارلىق ءمجا جوبالارىن 3 كاتەگورياعا بولگەن. ءبىرىنشىسى – جەكەمەنشىك ارىپتەستىڭ ينۆەستيسيالارى مەن وپەراسيالىق شىعىندارىن تولىقتاي بيۋدجەتتەن وتەۋ. ەكىنشىسى - ينۆەستيسيالاردى بيۋدجەتتەن ءىشىنارا وتەۋ. ءۇشىنشىسى - بيۋدجەتتەن وتەۋ مۇلدەم بولمايدى، سالىنعان ينۆەستيسيالار كورسەتىلگەن قىزمەتتەر مەن مەملەكەتتىك تاپسىرىس ەسەبىنەن قايتارىلادى.

اتىراۋ وبلىسىنداعى 8 جوبانىڭ جەتەۋى ءبىرىنشى كاتەگورياعا، بىرەۋى ەكىنشى كاتەگورياعا جاتادى. ا.نۇرالييەۆ جەرگىلىكتى ينۆەستورلاردى، اۋىل كاسىپكەرلەرىن كەڭىرەك تارتۋ قاجەت ەكەنىن ايتتى جانە مىسال رەتىندە وسىنداي جۇمىس ءجۇرىپ جاتقان قىزىلوردا وبلىسىن كەلتىردى. تاياۋ ارادا باسقارما مەملەكەتتىك قىزمەتشىلەردى ءمجا تەتىگىنە ۇيرەتەدى.

وبلىس اكىمى ن.نوعايەۆ جۇزەگە اسىپ جاتقان جوبالاردىڭ ماڭىزدىلىعىن اتاپ ءوتتى.

- جوبالاردىڭ الەۋمەتتىك تيىمدىلىگى ايقىن. ماسەلەن، فوتو-بەينە تىركەۋ جوباسىن ىسكە اسىرۋ جولدا دا، قوعامدىق جەرلەردە دە ازاماتتاردىڭ قاۋىپسىزدىگىن كۇشەيتەدى،-دەپ ەسەپتەيدى ءوڭىر باسشىسى.- ءقازىر وسى جوبا بويىنشا بىزدە 759 كامەرا ىسكە قوسىلعان. تاعى 774 دانا كامەرا ورناتۋ جوسپارلانىپ وتىر، سونداي-اق، 51 جول قيىلىسى مەن 153 جول ۋچاسكەسى جول قوزعالىسى ەرەجەلەرىنىڭ بۇزىلۋىن فوتو-بەينە تىركەۋ كامەرالارىمەن قامتاماسىز ەتىلەدى.

كوشەلەردى جارىقتاندىرۋ جوباسى دا ماڭىزدى، پايدالى. بۇگىندە وبلىس ورتالىعىنىڭ جۇزدەگەن كوشەلەرى جارىقتاندىرىلعان. ەنەرگيا ۇنەمدەۋ تەحنولوگيالارى قولدانىلعاندىقتان، ولاردى پايدالانۋدا بيۋجەت قاراجاتى ۇنەمدەلەدى.

- وسى جۇمىستى جالعاستىرۋ، سونىڭ ىشىندە، ءۇشىنشى كاتەگوريا بويىنشا ىسكە اساتىن جوبالاردى كوبەيتۋ قاجەت. ياعني، كاسىپكەرلەر وزدەرى سالعان نىساندار سانىن ۇلعايتىپ، ولاردى مەملەكەتتىك تاپسىرىسپەن قامتاماسىز ەتۋ كەرەك،-دەدى نۇرلان نوعايەۆ.

وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۋرزييەۆانىڭ بايانداماسىندا ءمجا ارقىلى ءۇش جوبا جۇزەگە اسىرىلعانى ايتىلدى: ەكى مەديسينالىق مەكەمەنى سەنىمدى باسقارۋعا بەرۋ جانە وكپە تۋبەركۋلەزىن ەرتە دياگنوستيكالاۋ بويىنشا ءىس-شارالار كەشەنى.

تاعى ءۇش جوبا ىسكە اسىرىلۋ كەزەڭىندە. ال، 2023 جىلعا دەيىن 13،1 ملرد تەڭگە سوماعا ونشاقتى جوبانى ىسكە اسىرۋ ۇسىنىلىپ وتىر: دارىگەرلىك امبۋلاتوريالار، اۋرۋحانالار، جاس ماماندارعا ارنالعان جاتاقحانا، مەديسينا كوللەدجىنىڭ سپورت كەشەنىنىڭ قۇرىلىسى، تاعى باسقالارى.