«رۋحاني جاڭعىرۋ» باعدارلاماسى  اياسىندا جامبىل وبلىسى، ت.رىسقۇلوۆ اۋدانىنداعى   قۇلان اگروتەحنيكالىق كوللەدجىندە تەحنيكالىق جانە كاسىپتىك ءبىلىم بەرۋ ۇيىمدارىندا وقىپ جاتقان  ستۋدەنتتەر اراسىندا رەسپۋبليكالىق «ۇزدىك ۆەتەرينار-2019» كاسىبي شەبەرلىك بايقاۋى ءوتتى.

سايىستىڭ ماقساتى – ۆەتەريناريا ماماندارىن دايىندايتىن تەحنيكالىق جانە كاسىپتىك ءبىلىم بەرۋ ۇيىمدارىنىڭ اراسىندا ىنتىماقتاستىق ورناتۋ، وزىق تاجىريبەلەردى انىقتاۋ جانە ستۋدەنتتەردىڭ كاسىبي قۇزىرەتتىلىگىن دامىتۋ.

بايقاۋ  وبلىس اكىمدىگى ءبىلىم باسقارماسى باسشىسىنىڭ ورىنباسارى مىندەتىن اتقارۋشى ساياسات ەسەيەۆتىڭ العى سوزىمەن اشىلدى. بۇدان كەيىن اۋىل شارۋاشىلىعى مينيسترلىگىنىڭ وبلىستىق ۆەتەريناريالىق باقىلاۋ جانە قاداعالاۋ كوميتەتىنىڭ وبلىستىق اۋماقتىق ينسپەكسياسىنىڭ باسشىسى وسپان بەردياروۆ ءسوز الىپ، قاتىسۋشىلارعا ساتتىلىك تىلەدى.

بايقاۋدا الماتى وبلىسى ءبىلىم باسقارماسىنىڭ تالدىقورعان اگروتەحنيكالىق كوللەدجىنىڭ، قىزىلوردا وبلىسى ءبىلىم باسقارماسىنىڭ ي.ابدىكارىموۆ اتىنداعى قىزىلوردا اگرارلىق تەحنيكالىق جوعارى كوللەدجىنىڭ، تۇركىستان وبلىسى ءبىلىم باسقارماسىنىڭ تۇركىستان جوعارى اگرارلىق كوللەدجىنىڭ، قاراعاندى وبلىسى ءبىلىم باسقارماسىنىڭ مىڭجاسار ادەكەنوۆ اتىنداعى قارقارالى اۋىلشارۋاشىلىق كوللەدجىنىڭ، تۇركىستان وبلىسى ءبىلىم باسقارماسىنىڭ قاپلانبەك جوعارى اگرارلىق تەحنيكالىق كوللەدجىنىڭ، الماتى وبلىسى ءبىلىم باسقارماسىنىڭ ەۋرازيا اگرارلىق كوللەدجىنىڭ، وبلىس اكىمدىگى ءبىلىم باسقارماسىنىڭ قورداي اۋىل شارۋاشىلىعى كوللەدجىنىڭ، قوستاناي وبلىسى اكىمدىگى ءبىلىم باسقارماسىنىڭ سارىكول اگروبيزنەس جانە قۇقىق كوللەدجىنىڭ جانە شىعىس قازاقستان اۋىلشارۋاشىلىق كوللەدجدەرىنىڭ ستۋدەنتتەرى قاتىسىپ، ب ا ق سىنادى.

ءۇش مودۋل بويىنشا وتكەن سايىستا الدىمەن «ۆيزيت كارتوچكاسى» مودۋلىندە بايقاۋعا قاتىسۋشىلار ءوزى جانە ماماندىعى، وقيتىن وقۋ ورنى، وڭىردە ءجيى كەزدەسەتىن مال شارۋاشىلىعىنداعى ىندەت تۋرالى پرەزەنتاسياسىمەن تانىستىرسا،  ەكىنشى  «تەستىلەۋ» مودۋلىندە ستۋدەنتتەردىڭ «ىندەتتانۋ ميكروبيولوگياسىمەن»، «پارازيتولوگيا جانە ينۆازيالىق اۋرۋلار»، «ىشكى جۇقپايتىن اۋرۋلار»، «اكۋشەرلىك گينەكولوگيا جانە كوبەيۋ بيوتەحنيكاسى» پاندەرىنەن ءبىلىمى تەست تاپسىرمالارى ارقىلى تەكسەرىلدى. ءۇشىنشى  «تاجىريبەلىك داعدىلار» مودۋلىندە ۇمىتكەرلەر ميكروسكوپيا جۇرگىزۋ، جانۋارلارعا ءدارى ەگۋ، اۋىل شارۋاشىلىعى جانۋارلارىن كلينيكالىق تەكسەرۋ تاجىريبەلىك تاپسىرمالارىن ورىنداۋ داعدىلارى مەن كاسىبي قۇزىرەتتىلىكتەرى بويىنشا كوللەدجدىڭ ۆەتەريناريالىق كلينيكاسىندا سايىسقا ءتۇستى.

قازىلار القاسىنىڭ بايقاۋعا قاتىسۋشىلاردىڭ كاسىبي شەبەرلىگىن باعالاۋى ەلەكتروندى تۇردە جۇرگىزىلدى. سايىس قورىتىندىسى بويىنشا شىعىسقازاقستاندىق توعجان اسقاربەك ءى ورىنان كورىنسە، ءىى ورىنعا تالدىقورعان وبلىسىنان كەلگەن سانجار تلەۋجان جانە شىعىسقازاقستاندىق جانسايا بازار لايىق دەپ تانىلدى. قىزىلوردادان كەلگەن قاتىسۋشى رۋسلان بالابەك، قوستانايلىق ۆيكتوريا گاۆريلوۆا جانە تۇركىستان ءوڭىرىنىڭ ۇكىلەپ قوسقان ءۇمىتى  ارسەن ورىنبەك ءىىى ورىندى مىسە تۇتتى. سونداي-اق «جەڭىسكە قۇشتارلىعى ءۇشىن» نوميناسياسى بويىنشا تۇركىستان جوعارى اگرارلىق كوللەدجىنىڭ ستۋدەنتى ەدىگە مالدىباي، قاپلانبەك جوعارى اگرارلىق تەحنيكالىق كوللەدجىنىڭ ستۋدەنتى نۇرداۋلەت ابسامات جانە قاراعاندىلىق  مەرەي ءدارىعۇل ماراپاتتالدى.

جايدار ازامات