اتىراۋ وبلىسىندا «جاسىل ەل» جاساعىنىڭ 600-دەن استام مۇشەسى ەڭبەك ماۋسىمىنا كىرىستى.

«جاسىل ەل» ەڭبەك جاساعىنىڭ باسشىسى ابىلاي قۇرمەت ۇلىنىڭ ايتۋىنشا، وبلىس بويىنشا 652 بەلسەندى جاس جازعى كانيكۋلدارىن قۇر وتكىزبەي، ەڭبەكتەنۋگە تىلەك ءبىلدىردى. 
​وسى جىلى جوباعا 16 مەن 29 جاس ارالىعىنداعى 2200 ادامدى تارتۋ جوسپارلانىپ وتىر. ولاردىڭ مىڭ جارىمنان استامى – اۋىل تۇرعىندارى.

​قازىرگى كەزدە جاستار ەلدى مەكەندەردى اباتتاندىرۋ، كوگالداندىرۋ، جاسىل جەلەكتەرگە كۇتىم جاساۋ جۇمىستارىمەن شۇعىلدانۋدا، قۇرىلىس جۇمىستارىندا، باسقا دا سالالاردا قىزمەت ەتۋدە.

اتىراۋ قالاسىندا جاساقتىڭ مۇشەلەرى بالىقشىدا، الماگۇل ىقشاماۋدانىندا، ۆوكزال ماڭى اۋماعىنداعى ارباتتا، رەتروپاركتە جۇمىس جاساپ جاتىر. سونداي-اق، اۆانگارد ىقشاماۋدانىنداعى تۇرعىن ءۇي قۇرىلىسىنا اتسالىسۋدا.

"جەتى ادام تۇرعىن ءۇي سالۋعا كومەكتەسۋدە. بۇل ستۋدەنتتەر مەن جوعارى كلاسس وقۋشىلارىنا جازعى كانيكۋل كەزىندە تابىس تابۋعا جاقسى مۇمكىندىك بەرەدى. ولاردىڭ قولدارىنا تازا الاتىن ايلىق جالاقىلارى 48 مىڭ تەڭگە. الايدا، قۇرىلىستا جانە رەتروپاركتە جۇمىس ىستەپ جاتقاندار بۇعان قوسىمشا 10 مىڭ تەڭگە الادى، ونى جۇمىس بەرۋشىلەر تولەيدى"،- دەپ حابارلادى ا.قۇرمەت ۇلى.

​ەسكە سالا كەتەيىك- جاز مەزگىلىندە تابىس تاۋىپ، ءارى قوعامعا پايدا تيگىزەم دەيتىندەر بولسا، ولار جاستار رەسۋرستىق ورتالىقتارىنا حابارلاسا الادى. بۇنداي ورتالىقتار ءار اۋداندا بار، ال، اتىراۋ قالاسىنداعى مەكەنجايى: «نۇرسايا» ىقشاماۋدانى، 28 ءۇي.