اتىراۋ وبلىسى تەڭىز كەن ورنىنداعى قىزمەتكەرلەر اراسىندا بولعان جانجال باسشىلاردىڭ ويلارىنا كەلگەنىن ىستەگەندىگىنەن تۋىنداعان. شەتەلدىك كومپانيا باسشىلارى قازاقستاننىڭ ەڭبەك تۋرالى زاڭىن نازارعا ىلمەي، جۇمىس ۋاقىتى مەن جالاقىنى قالاۋلارىنشا بەلگىلەپ كەلگەن دەپ حابارلايدى Qamshy.kz اقپارات اگەنتتىگى كتك ارناسىنىڭ دەرەگىن نەگىزگە الىپ. 

تاراپتار كەزدەسۋىندە ءمالىم بولعانداي، تەڭىز كەن ورنىنداعى وتاندىق جۇمىسشىلار مەرەكە، دەمالىس كۇندەرى جۇمىسقا شىققانمەن، ۇستەمە اقى كەشىكتىرىلگەن. ال، ونداعى كۇزەت فيرماسىنىڭ قىزمەتكەرلەرى ءوز مىندەتتەرىن اتقارۋدىڭ ورنىنا، باسشىلىققا قارسى شىققانداردى قورقىتىپ-ۇركىتۋمەن، ءتۇرلى قيتۇرقى ايلا-شارعى جاساۋمەن اينالىسقان كورىنەدى.

— تەڭىز جوباسىندا مەردىگەر مەكەمەلەردىڭ ءبىرىنىڭ باسشىسى كۇن سايىنعى جۇمىس كۇنىن ءوز بەتىمەن 4 ساعاتقا كوبەيتكەن، ۇجىمنىڭ نارازىلىعى مەن ەڭبەك ينسپەكسياسىنا شاعىمدانۋىنان كەيىن جاعداي قالىپقا كەلدى. جۇمىس بەرۋشى قانداي دا بولماسىن سەبەپ تاۋىپ، جۇمىستان شىعارىپ جىبەرەتىنىن ايتىپ قورقىتادى. شاعىم ايتقان جۇمىسشىدان قۇتىلۋدىڭ ءتۇرلى قۇيتىرقى ارەكەتتەرىن جاساعان دەرەكتەر دە بار. بۇل ارينە ادامدى اشىندىراتىن، ءتىپتى داۋ-جانجالعا اكەلەتىن جاعداي. سىزدەردىڭ مىندەتتەرىڭىز وسىنداي جاعدايلاردىڭ الدىن الۋ - دەيدى نۇرلان نوعايەۆ. 

ياعني، «تەڭىزشيەۆرويل» مەن وعان قاراستى جۇزدەگەن مەردىگەر مەكەمەلەر ابدەن قالىپتاسىپ قالعان وسىنداي جايتتاردى جويىپ، جاعدايدى تۇبەگەيلى وزگەرتۋگە كۇش سالۋى قاجەت. سەنبى كۇنى بولعان قاقتىعىسقا بايلانىستى ايماقتاعى بارلىق شەتەلدىك كومپانيا وكىلدەرىن شاقىرىپ، جيىن وتكىزگەن وبلىس اكىمى نۇرلان نوعايەۆ، ولارعا وسىنداي تالاپ قويدى. ايتپەسە، اڭگىمە باسقاشا بولماق دەيدى وبلىس اكىمى.

— مەن سىزدەردىڭ الدارىڭىزعا ەڭبەك كودەكسىنىڭ، ەلىمىزدەگى بارلىق زاڭداردىڭ، سونىڭ ىشىندە كوشى-قون زاڭناماسىنىڭ بۇزىلۋىنا جول بەرمەۋ مىندەتىن قويامىن. ادال، قولايلى جاعداي بارلىق جۇمىسشىلارعا جاسالۋى كەرەك. ءبىز ءوز تاراپىمىزدان سىزدەردىڭ باستامالارىڭىزدى كۇتىپ وتىرمايمىز، جۇمىس ىستەيمىز، ەگەر جاعدايدى ءوز ەرىكتەرىڭىزبەن وزگەرتكىلەرىڭىز كەلمەسە، زاڭعا سايكەس ارەكەت ەتۋگە كۇشىمىز جەتەدى.

ارەكەت دەمەكشى، جەرگىلىكتى جۇمىسشىلاردان تاياق جەگەن ازاماتتارىنىڭ حال-جاعدايىن ءبىلۋ ءۇشىن اتىراۋعا ءۇش ەلدىڭ ەلشىسى جەتتى. ناقتىراق ايتقاندا، پالەستينا مەملەكەتى مەن يوردانيا كورولدىگىنىڭ جانە ليۆان رەسپۋبليكاسىنىڭ قازاقستانداعى ەلشىلەرى جەرگىلىكتى باسشىلارمەن كەزدەستى. ءبىراق، ولار ءوز ەلىنىڭ ازاماتتارىن قازاقستاننان الىپ كەتۋ ءۇشىن ەمەس، بولعان جايتتىڭ دوستىق قارىم-قاتىناسقا سىزات تۇسىرمەيتىندىگىن ايتپاققا كەلىپتى.

— بۇل جاعداي ەكى جاق ءۇشىن دە وتە ىڭعايسىز بولدى. ءبىز بۇل ماسەلەنىڭ پالەستينا مەن قازاقستان اراسىنداعى سان جىلعى تاريحي قارىم-قاتىناسىنىڭ بۇزىلۋىن قالامايمىز. ءبىزدىڭ باسشىلىق پەن پالەستينا حالقى قاۋىپسىزدىك كەڭەسىنىڭ، بۇۇ-نىڭ اراب-يزرايل قاقتىعىسىنا قاتىستى بارلىق قارارلارىن قولداي وتىرىپ، تۇڭعىش پرەزيدەنت نۇرسۇلتان نازاربايەۆتىڭ باسشىلىعىمەن قازاقستاننىڭ پرينسيپتىك پوزيسيالارىن جوعارى باعالايدى. بۇل جاعداي ءبىزدىڭ قارىم-قاتىناسىمىزدى بۇزا المايدى. وسى وقيعا بويىنشا قۇرىلعان ۆەدومستۆوارالىق كوميسسيا جۇمىسشىلار ءتىزىپ بەرگەن جايتتاردى ءجىتى تەكسەرىپ، ونى شەشۋگە ارەكەتتەنبەك. ايتا كەتەيىك، تەڭىز كەن ورنىنداعى شەتەلدىك جانە قازاقستاندىق جۇمىسشىلاردىڭ قاقتىعىسى كەزىندە جاراقات العان 45 ادامنىڭ 20-دان استامى دارىگەرلەردىڭ كومەگىنە جۇگىنگەن. ولاردىڭ تورتەۋى قازاقستاندىق، - دەپ پىكىر بىلدىرگەن  پالەستينا مەملەكەتىنىڭ قر-داعى ەلشىسى مونتاسەر ءابۋ زەيد.