ادىلەت ءمينيسترى مارات بەكەتايەۆ جاڭا قور قۇرۋ باستاماسى تۋرالى ايتتى، دەپ حابارلايدى Qamshy.kz اقپارات اگەنتتىگى Sputnik سايتىنا سىلتەمە جاساپ.

ءمينيستردىڭ ايتۋىنشا، جاڭا قور اليمەنت تولەۋ ءۇشىن قۇرىلادى. ودان اقشانى قارىزعا الىپ، الەۋمەتتىك مىندەتتەمەلەردى ورىنداۋعا مۇمكىندىك بار. ءبىراق قارىزعا العان قاراجاتتى قايتارۋ قاجەت.

"بۇل قور شەتەل تاجىريبەسى نەگىزىندە قۇرىلادى. ماسەلەن، فينليانديادا ارنايى قور اليمەنت تولەيتىن ازاماتتارعا كومەكتەسەدى. ولاردىڭ اقشاسى بولماي قالعاندا، يا بولماسا جۇمىسسىز وتىرعاندا، قوردان اقشا الىپ، اليمەنت تولەي الادى. كەيىن جاعدايى تۇزەلگەندە العان اقشاسىن قايتارادى. قوردىڭ اقشاسى تەك اليمەنت تولەۋگە بەرىلەدى. باسقا ماقساتقا الۋعا بولمايدى"، - دەدى بەكەتايەۆ جۋرناليستەرگە بەرگەن سۇقباتىندا.

ونىڭ سوزىنە سۇيەنسەك، قازاقستاندا مۇنداي قور قۇرۋ ءۇشىن بارلىق ماسەلەنى زەرتتەۋ قاجەت، سەبەبى الاياقتىق جاسالۋى مۇمكىن. سوعان قاراماستان، مينيسترلىك قوردى قۇرۋعا نيەتتى.

"بۇگىندە ءبىز ءماجىلىس دەپۋتاتتارىمەن بىرگە سوت ورىنداۋشىلارى تۋرالى زاڭعا وزگەرىس ەنگىزۋدى ۇسىندىق. سونىڭ اياسىندا الدىمەن پيلوتتىق جوبا ىسكە اسىرىلادى. پارلامەنتتە بۇل ماسەلە ءالى دە تالقىلانادى. دەگەنمەن، ۇش-بەس جىلدا ءبىز وسى قوردى قۇرۋىمىز قاجەت. مەنىڭشە، قوردى جەكە سوت ورىنداۋشىلارىنىڭ پالاتاسى جانىنان اشقان دۇرىس. ال قاراجات ەڭ الدىمەن سوت ورىنداۋشىلارىنان تۇسەتىن بولادى دەپ ويلايمىن"، - دەپ اتاپ ءوتتى بەكەتايەۆ.