– قازاقستاندا قورىقشى ينسپەكتورلارعا وق وتكىزبەيتىن كەۋدەشە بەرىلۋى مۇمكىن. ءقازىر بۇل ماسەلە ىشكى ىستەر مينيسترلىگىندە قاراستىرىلىپ جاتىر، دەپ حابارلايدى Qamshy.kz اقپارات اگەنتتىگى. ق ر ەكولوگيا، گەولوگيا جانە تابيعي رەسرۋرستار ۆيسە-مينيسترى ەرلان نىسانبايەۆ ورتالىق كوممۋنيكاسيالار قىزمەتىندە وتكەن بريفينگتە وسىنداي مالىمەت بەردى.
"قازىرگى تاڭدا ءبىزدىڭ ينسپەكتورلارىمىز قاجەتتى قارۋمەن قامتىلعان. ال وق وتپەيتىن كەۋدەشە بەرۋ ماسەلەسىن ىشكى ىستەر مينيسترلىگىمەن بىرگە قاراپ جاتىرمىز. ءبىزدىڭ ينسپەكتورلارعا دا پوليسيا قىزمەتكەرلەرى سياقتى وق وتكىزبەيتىن كەۋدەشە كيۋگە رۇقسات الۋدامىز. بولاشاقتا بۇل ناقتى شەشىلەدى. ول ءۇشىن نورماتيۆتىك-قۇقىقتىق اكتىلەرگە وزگەرىس ەنگىزسەك بولدى. بۇل جۇمىستى ەندى عانا باستادىق، – دەدى ەرلان نىسانبايەۆ.
مينيسترلىك وكىلى كەلەشەكتە قورىقشى ينسپەكتورلاردىڭ ارنايى جابدىقتالعان قىزمەتتىك كولىكتەرى دە بولاتىنىن ايتتى.
"ينسپەكتورلاردىڭ قازاسىنان كەيىن باس پروكۋراتۋرامەن جانە وزگە دە مۇددەلى مەملەكەتتىك ورگاندارمەن بىرگە پارلامەنت ماجىلىسىندە كەڭەس وتكىزدىك. سونىڭ ناتيجەسىندە جەدەل الدىن الۋ شارالارىنا قاتىستى زاڭنامانى كۇشەيتۋ تۋرالى تاپسىرما بەرىلدى. براكونەرلەرمەن كۇرەستە قىزمەتتىڭ ماتەريالدىق-تەحنيكالىق بازاسىن نىعايتۋ بويىنشا ناقتى شارالار اتقارىلادى. دروندار مەن كەۋدەگە تاعىلاتىن بەينەكامەرالار، ەلەكتروشوكەر مەن تراۆماتيكالىق قارۋ، جەكە قورعانىس قۇرالدارى سول شارادا قاراستىرىلعان. جول ءجۇرۋ ەرەجەسىنە ءبىزدىڭ ينسپەكتورلار مىنەتىن كولىكتەردى ارنايى تەحنيكا رەتىندە تىركەۋ تۋرالى وزگەرىستەر ەنگىزىلەدى"، – دەدى ەرلان نىسانبايەۆ.
ەسىمجان ناقتىباي
پىكىر قالدىرۋ