2000 جىلدان استام تاريحى بار تاراز قالاسىنىڭ اتاۋى ءحىح عاسىردىڭ ورتاسىنان بەرى 5 رەت وزگەرگەن. ءارى ساياسي جۇيەنىڭ اۋىسىمەن ونىڭ باعىنىشتى اكىمشىلىك اۋماعى دا تالاي وزگەرىسكە ۇشىراپ وتىرعان دەپ جازادى Qamshy.kz اقپارات اگەنتتىگى. 

1867 جىلى «جەتىسۋ مەن سىرداريا وبلىستارىن باسقارۋدىڭ ۋاقىتشا ەرەجەسى» بەكىتىلىپ، بۇرىنعى سىرداريانىڭ شەكارا ماڭى اۋداندارى مەن قوقان حاندىعى قۇرامىنداعى 7 ۋەزدى بىرىكتىرۋ جولىمەن جاڭا سىرداريا وبلىسى قۇرىلدى. قوقان حاندىعى قۇرامىنداعى 7 ۋەزبەن بىرگە اۋليەاتا ۋەزى دە سىرداريا وبلىسىنا بىرىگەدى. ارادا جارتى عاسىر ۋاقىت وتكەن سوڭ قازان توڭكەرىسى ورىن الادى. بۇل ساياسي وقيعا پاتشالىق رەسەي مەملەكەتىنىڭ تۇزە بۇگىپ كەڭەس وداعىنىڭ قۇرىلۋىنا اسەر ەتتى. جاڭا مەملەكەتتە جاڭا ساياسي جۇيە جانە باسقارۋدىڭ تىڭ ءتاسىلى قولدانىلادى. وسىلايشا اۋليەاتا ۋەزى سىرداريا وبلىسىنىڭ اكىمشىلىك اۋماقتىق ءبولىنىسى رەتىندە تۇركىستان اسسر-نىڭ قۇرامىنا كىردى. ال 1924 جىلى قازاقاسسر پايدا بولۋىمەن اۋليەاتانىڭ ۋەزىنىڭ اكىمشىلىك باعىنىشتىلىعى قايتا وزگەردى. 1928 جىلدىڭ 17 قاڭتارىندا اۋليەاتا ۋەزى بولىستارعا تاراتىلىپ ونىڭ نەگىزىندە سىرداريا وكرۋگىنىڭ اۋداندارى قۇرىلدى. بۇگىنگى تاراز قالاسى، جۋالى، مەركى، سارىسۋ، تالاس، شۋ اۋداندارىنىڭ اكىمشىلىك اۋماعى وسىلاي پايدا بولعان ەدى.

1932 جىلدىڭ اقپانىندا قازاقستاندا جاڭا اكىمشىلىك-اۋماقتىق بىرلىك رەتىندە وبلىستار پايدا بولدى. ءدال وسى تۇستا قازىرگى جامبىل وبلىسىنىڭ اۋماعى كورشىلەس جاتقان 3 وبلىستىڭ اۋماعىنا ەندى. ماسەلەن، اۋليەاتا (قازىرگى تاراز قالاسى)، جۋالى، مەركى، تالاس اۋداندارى وڭتۇستىك قازاقستان وبلىسىنا جاتقىزىلدى. ال سارىسۋ اۋدانى قاراعاندى وبلىسىنىڭ قۇرامىنا كىرسە، شۋ مەن قورداي اۋداندارى الماتى وبلىسىنىڭ قۇرامىن تولىقتىردى.

1936 جىلدىڭ قاڭتارىندا 200 جىل بويى اۋليەاتا اتانعان شاھارعا قازاقستان ولكەلىك پارتيا كوميتەتىنىڭ حاتشىسى بولعان ميرزوياننىڭ اتى بەرىلدى. دەگەنمەن بۇل اتاۋ پارتيا بەلسەندىسىنىڭ كوزى تىرىسىندە اق (1938 جىلدىڭ 3 ماۋسىمىندا) دجامبۋل (جامبىل) دەپ اۋىستىرىلادى. ىلە شالا قازاقكسر جوعارى كەڭەسىنىڭ جارلىعىمەن (1939 جىلدىڭ 14 قازانىندا) قۇرىلعان وبلىس تا دجامبۋل (جامبىل) وبلىسى دەپ اتالدى.

تاۋەلسىزدىكتىڭ العاشقى جىلدارىندا قازاقستان رەسپۋبليكاسىنىڭ مينيسترلەر كابينەتى جانىنداعى مەملەكەتتىك ونوموستيكالىق كوميسسيا ورىس ءتىلدى اتاۋلاردى ترانسكريپسيالاۋ تۋرالى جارلىق شىعارىپ (1993 جىلدىڭ 5 ءساۋىرى) دجامبۋل وبلىسى جامبىل وبلىسى ال دجامبۋل قالاسى جامبىل قالاسى دەپ وزگەرتىلدى.

1997 جىلدىڭ 8 قاڭتارىندا جەرگىلىكتى اتقارۋشى بيلىك ورگاندارىنىڭ ءوتىنىشى مەن كوپشىلىكتىڭ تالاپ تىلەگىن، قازاقستان رەسپۋبليكاسى ۇكىمەتى جانىنداعى مەملەكەتتىك ونوماستيكالىق كوميسسياسىنىڭ قورىتىندىسىن ەسكەرگەن مەملەكەت باسشىسى جامبىل قالاسىنا تاريحي تاراز اتاۋىن قايتارۋ تۋرالى جارلىق شىعاردى.