ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىن ىسكە اسىرۋ جوسپارى ازىرلەنەدى. بۇل تۋرالى ق ر پرەمەر-مينيسترىنىڭ ءبىرىنشى ورىنباسارى – قارجى ءمينيسترى ءاليحان سمايىلوۆ ايتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
"شىعىنداردى وڭتايلاندىرۋ جانە اكتيۆتەردى ينۆەستيسيالىق باسقارۋدىڭ ساپاسىن جاقسارتۋ ماقساتىندا ۇكىمەتكە ءبىرىڭعاي الەۋمەتتىك قور قۇرۋ جانە ءبىر الەۋمەتتىك تولەم ەنگىزۋ جولىمەن الەۋمەتتىك قامتاماسىز ەتۋدىڭ بيۋدجەتتەن تىس جۇيەسىن شوعىرلاندىرۋ ماسەلەسىن زەردەلەۋ تاپسىرىلدى. سونداي-اق جەرگىلىكتى بيۋدجەتتەردى قالىپتاستىرۋعا حالىقتى ناقتى تارتا وتىرىپ، بارلىق دەڭگەيلەردە بيۋدجەت پروسەسىن ۇيىمداستىرۋ قولعا الىنادى"، – دەدى ول مەملەكەت باسشىسىنىڭ قازاقستان حالقىنا جولداۋىن تالقىلاۋعا ارنالعان ۇكىمەت وتىرىسىندا.
ءبىرىنشى ۆيسە-پرەمەردىڭ اتاپ وتۋىنشە، اۋداندىق، قالالىق جانە اۋىلدىق بيلىك دەڭگەيلەرى جەرگىلىكتى ماڭىزى بار مىندەتتەردى شەشۋدە ەكونوميكالىق جاعىنان نەعۇرلىم دەربەس بولۋى ءۇشىن ءتيىستى زاڭنامالىق اكتىلەر قابىلدانادى.
"جالپى، ءبىز جولداۋدا كورسەتىلگەن تاپسىرمالاردى ىسكە اسىرۋ جانە ورىنداۋ بويىنشا ءتيىستى ءىس-قيمىل جوسپارىن ازىرلەيتىن بولامىز. پرەزيدەنت جولداۋىن ىسكە اسىرۋعا قاجەتتى قاراجات پارلامەنت ماجىلىسىنە ەنگىزىلگەن ءۇش جىلدىق بيۋدجەت جوباسىندا قاراستىرىلادى"، – دەدى ءا.سمايىلوۆ.
پىكىر قالدىرۋ