تاۋەلسىزدىگىمىزدى الىپ، ەگەمەندىگىمىزدى بەكىتكەننەن كەيىنگى ەلىمىزدىڭ دامۋى، ونىڭ الەم الدىنداعى بەدەلىنىڭ ءوسۋى ەلباسى نۇرسۇلتان ءابىش ۇلى نازاربايەۆتىڭ قاجىرلى ەڭبەگى ەكەنى بارشامىزعا ايان.

ۇلت كوشباسشىسىنىڭ تاريحي ەڭبەگىنىڭ باسىم باعىتى – ەل جاستارىنا ارنالعان. ويتكەنى ەلباسى ءارقاشان ەل جاستارىنىڭ ناعىز قامقورشىسى، قولداۋشىسى بولىپ كەلەدى. سول ساياسي ساباقتاستىقتى قازىرگى پرەزيدەنتىمىز قاسىم-جومارت كەمەل ۇلى توقايەۆ تا جالعاپ، قىزمەتكە كىرەسە سالىسىمەن جاستارعا ۇلكەن سەنىم ارتاتىندىعىن اشىق ايتتى دەپ جازادى Qamshy.kz اقپارات اگەنتتىگى. .

ستاتيستيكالىق مالىمەتكە سۇيەنسەك، ەل تۇرعىندارىنىڭ 4،5 ميلليوننان استامى جاستاردىڭ ۇلەسىندە ەكەن. بۇل دەگەنىمىز جالپى حالىقتىڭ 30 پايىزى جاستار دەگەندى ايعاقتايدى. ەندەشە، ەلىمىزدىڭ ەرتەڭگى بولاشاعى بۇگىنگى جاستاردىڭ قولىندا دەسەك ارتىق ايتقانىمىز ەمەس.

ەڭ اۋەلى جاستار بويىندا رۋحاني ادامگەرشىلىك، ساياسي ينتەلەكت، قۇقىقتىق تاربيە باسىم بولعانى ءجون.

قازىرگى تاڭدا مەملەكەتتىك دەڭگەيدەگى جيىنداردا بەلسەندى جاستار باس قوسىپ، قوعام ومىرىنە ەتەنە ارالاسىپ جاتقاندىعى كوڭىل قۋانتادى. ويتكەنى، ءبىز سەرگەك ساناسى بار، اعا بۋىن داناسى بار، ۇلى دالاداي دالاسى بار، ماڭگىلىك ەلدىڭ تورىندەگى قازاق دەگەن بالاسى بار ەلمىز.

بيىلعى جىل جاستار ءۇشىن ەرەكشە قولداۋ جىلى بولدى. سەبەبى وسى جىل جاستار جىلى دەپ جاريالانىپ، ەلىمىزدىڭ بارلىق ايماعىندا جاستاردى قولداۋعا باعىتتالعان قىرۋار شارۋا اتقارىلدى. سونىڭ ىشىندە جاستارعا ەرەكشە قۋانىش سىيلاعانى ول پرەزيدەنتتىڭ جاستار كادرلىق رەزەرۆىن قالىپتاستىرۋ يدەياسى.

قازاقستاندا پرەزيدەنتتىڭ كادرلىق رەزەرۆى مەملەكەتتىك قىزمەتتىڭ بارلىق دەڭگەيىنە جاستاردى تارتۋ ءۇشىن قۇرىلىپ، بارلىق جاستار تەڭ مۇمكىندىكتەر سىيلاپ، بارىنشا اشىق وتكىزىلمەك. 1 قىركۇيەكتەن باستاۋ العان اتالمىش جوبا بىرنەشە كەزەڭنەن تۇرادى. كانديداتتاردىڭ قۇجاتتارىن قابىلداۋ، ۇمىتكەرلەردىڭ تەوريالىق ءبىلىمىن تەستىلەۋ، جاستاردىڭ كوشباسشىلىق قاسيەتى، سىن تۇرعىسىنان ويلاۋ دەڭگەيى، ستراتەگيالىق كوزقاراسى، ۋاجدەمەسى مەن قۇندىلىقتارىن باعالاۋ سىندى مەجەلەردەن سۇرىنبەي وتكەن 300 جاس رەزيەۆكە ەنگىزىلمەك.

بۇل جوبا جاستارعا بەرەرى مول دۇنيە. ويتكەنى قانشاما ءوز ءىسىنىڭ شەبەرلەرى، كرەاتيۆتى يدەيالارعا باي جاستار ورتامىزدا تانىلا الماي، ءوز مۇمكىندىگىن كۇتىپ ءجۇر.

راس، وسىدان بىرەر جىل بۇرىن «Nur Otan» پارتياسىنىڭ جاستار كادرلىق رەزەرۆىسى دۇنيەگە كەلدى. الايدا جاسىراتىنى جوق سول رەزەرۆتە جىلداپ تۇرساقتا جەمىسىن كورە المادىق. ياعني جوبا مەجەلى مىندەتىن ورىنداي المادى. ەندى مىنە جاستار كادرلىق رەزەرۆىسىنە ءوتىنىپ بەرىپ جاتقاندىقتان بۇل باستاما باياندى بولادى دەپ ءۇمىت زور. ەڭ باستىسى جوبا دىتتەگەن جەرىنە جەتىپ، جاستاردىڭ ءۇمىتىن ۇزبەسە ەكەن. سونىمەن قاتار «بولاشاق» سىندى مەملەكەتتىك باعدارلامالار اياسىندا شەتەلدە ءبىلىم الىپ كەلگەن جاستارعا باسىمدىق بەرىلىپ، وزگە جاستار شەتقاقپاي كورىپ قالماسا ەكەن دەپ تىلەيمىز. جاسىراتىنى جوق، بۇل ءۇردىس وسى تاڭعا دەيىن قوعامدا ورىن الىپ، كوپ تالانتتار تاسادا قالىپ كەتىپ جاتتى. وسى ستەراتيۆتى قازاقستاننىڭ جاڭا داۋىرىنە جول سالعان مەملەكەت باسشىسى قاسىم-جومارت توقايەۆ بۇزىپ، جاستاردى جارقىن بولاشاققا جەتەلەيدى دەپ سەنەمىز.