«تاراز-ارەنا» سپورت كەشەنىندە كيوكۋشينكاي-كان كاراتەدەن ۇيىمداستىرىلعان دودا تارتىسقا تولى بولدى. رەسەي، يران، جاپونيا، وزبەكستان، تاجىكستان، قىرعىزستان جانە قازاقستان مەملەكەتتەرىنىڭ 300-دەن اسا سپورتشى ب ا ق سىناعان سارى قۇرلىق باسەكەسىندە جامبىلدىقتار جاسىنداي جارقىرىپ، جۇلدەلى ورىنداردان كورىندى دەپ جازادى Qamshy.kz اقپارات اگەنتتىگى. 

جالپى بايراقتى باسەكەدە 41 سالماق بويىنشا 99 مەدال جيىنتىعى ساراپقا سالىنعاندىقتان 10 جاستان باستاپ ازيانىڭ كىل مىقتى كاراتەشىلەرى تاراز تورىندە جينالدى. سوندىقتان بولار ءدۇبىرلى دودانى كورۋگە ىنتىق جانكۇيەرلەردىڭ دە قاراسى بولدى.

ازيا بىرىنشىلىگىڭ اشىلۋ سالتاناتىنا وبلىس اكىمى اسقار مىرزاحمەتوۆ ارنايى قاتىسىپ، قوناقتارعا دەگەن ىستىق ىقىلاسىن جەتكىزدى.

- قۇرمەتتى، سپورت سۇيەر قاۋىم! قۇرمەتتى، قوناقتار!

كيەلى اۋليەاتا جەرىنە قوش كەلدىڭىزدەر! وسى دودانىڭ تاراز توپىراعىندا وتۋىنە ۇيىتقى بولعان ۇيىمداستىرۋشىلار، مىقتى سپورتشىلارىن الىپ كەلىپ وتىرعان ءار مەملەكەتتىڭ باپكەرلەرىنە جانە تورەشىلەرگە العىسىمدى بىلدىرەمىن. ايتۋلى الاماندا شىن دۇلدۇلدەر دارا شابۋىنا تىلەكتەسپىن.

كەيىنگى جىلدارى مەملەكەت تاراپىنان بۇل سپورت تۇرىنە كەڭىنەن كوڭىل ءبولىنىپ كەلەدى. جامبىل جەرىندە دە تالانتتى كاراتەشىلەر ءوسىپ كەلەدى. بۇل جاقسىلىققا باستايتىن جول.

ەندەشە بارلىق قاتىسۋشىلارعا ساتتىلىك تىلەي وتىرىپ، ازيا چەمپيوناتىن اشىق دەپ جاريالايمىن، - دەدى ايماق باسشىسى.

بۇدان كەيىن ق ر پارلامەنتى ءماجىلىسىنىڭ دەپۋتاتى، كيوكۋشينكاي كان كاراتە سپورتى رەسپۋبليكالىق فەدەراسياسىنىڭ پرەزيدەنتى ومارحان وكسىكبايەۆ، ق ر مادەنيەت جانە سپورت مينيسترلىگى دەنە شىنىقتىرۋ جانە سپورت كوميتەتى ءتوراعاسىنىڭ ورىنباسارى سەرىك جاقىپبايەۆ ءسوز الىپ، بارلىق سپورتشىلاردىڭ باعى جانۋىنا تىلەكتەستىك ءبىلدىردى.

مۇنان سوڭ جارىس كوركى قىزا ءتۇستى. تاتاميگە كوتەرىلگەن سپورتشىلار ناعىز «جان الىسىپ، جان بەرىسكەن» ايقاس كورسەتىپ، جۇلدە جولىندا ايانىپ قالعان جوق. دەسە دە، جارىس بولعاننان كەيىن جۇزدەن جۇيرىكتەر دارا شاباتىنى بەلگىلى. بۇل جولعى سارى قۇرلىق باسەكەسىندە ۇلتتىق قۇراما سپورتشىلارى قارسىلاس شاق كەلتىرمەي، بارلىعى 33 التىن مەدالدىڭ 27ء-ىن جەڭىپ الدى. بۇدان بولەك، 30 كۇمىس پەن 29 قولاعا يەلىك ەتتى. ال 4 التىن، 2 كۇمىس، 2 قولا مەدالمەن قىرعىزستان قۇراماسى جۇلدەلى ەكىنشى ورىنعا تابان تىرەدى. ۇزدىك ۇشتىكتى 2 التىن، 1 كۇمىس مەدالمەن وزبەكستان كاراتەشىلەرى تۇيىندەدى. رەسەيلىكتەرگە بولسا بۇل ازيا چەمپيوناتىندا بار-جوعى 2 قولا مەدال عانا بۇيىردى.

ۇلتتىق قۇراما ساپىندا جامبىلدىق ورەندەر دە تابىستى ونەر كورسەتكەنىن ايتا كەتكەن ءجون. ەرلەر اراسىندا سەرالى ءابىلقاسىم التىننان القا تاعىنسا، قىزدار سىنىندا 45 پەن 50 كەلىدە كۇش سىناسقان توعجان امانباي مەن كاميلا

كەمەلبەكوۆا كۇمىس جۇلدەنى كەۋدەلەرىندە جارقىراتتى. بەيبارىس اسىلبەك پەن دىنمۇحامەد تاسىبەك بولسا، قولا جۇلدەنى قاناعات تۇتتى.

ايتا كەتەيىك، بيىلعى سارى قۇرلىق باسەكەسىنە جاپونيادان اتاقتى كاراتەشى شيحان كوندو ارنايى كەلىپ، ەكى كۇندىك شەبەرلىك ساباعىن وتكىزدى. بۇل جامبىل كاراتەسىنە جاڭا سەرپىن بەرەتىنى انىق.

جەڭىمپاز جەرلەستەرىمىزدى جۇلدەلەرىمەن قۇتتىقتايمىز!

جارايسىڭدار، جامپوزدار!