جامبىل وبلىسى اكىمدىگىنىڭ ءماجىلىس زالىندا مەملەكەتتىك-جەكمەنشىك ارىپتەستىك اياسىندا وڭىردە جۇزەگە اسىپ جاتقان جۇمىستار جايى قارالدى. جيىندا وبلىس اكىمدىگىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا بايانداما جاساپ، ەڭسەرىلگەن مەجەلەر مەن الدا تۇرعان ماقساتتاردى ايقىندادى دەپ جازادى Qamshy.kz اقپارات اگەنتتىگى. 

جىل باسىندا ايماق باسشىسىنىڭ تاپسىرماسىنا سايكەس مەملەكەتتىك-جەكەمەنشىك ارىپتەستىك اياسىنداعى جوبالاردىڭ ءبىرىڭعاي بازاسىن قۇرۋ تاپسىرىلعان ەدى. وسى ورايدا جاسالعان ارنايى تىزىمدە 238 جوبا بار. بۇگىندە ونىڭ 63 جوباسى بويىنشا جۇمىستار جۇرگىزىلۋدە. ال قالعان 42 جوبا جىل سوڭىنا دەيىن تولىعىمەن اياقتالماق.

وڭىردە قولعا الىنعان مەملەكەتتىك-جەكەمەنشىك ارىپتەستىك جوبالاردىڭ نەگىزگى بولىگىن الەۋمەتتىك سالاداعى نىساندار قۇرايدى. تەك ءبىلىم سالاسىنىڭ وزىندە 39 جوبا جۇزەگە اسىرىلاتىن بولادى. وسى ورايدا باسقارما باسشىسى مەكتەپ اسحانالارىندا قىزمەت كورسەتۋدى مەملەكەتتىك-جەكەمەنشىك اياسىندا ىسكە اسىرۋدىڭ تيىمدىلىگىنە نازار اۋداردى. اتالعان جوبا ارقىلى اسحانا قىزمەتىن ۇيىمداستىرۋعا جىل سايىن كونكۋرس ويناتىلمايدى. ەسەسىنە كونكۋرستىڭ ءبىر جەڭىمپازىمەن 3 جىلدان 30 جىلعا دەيىنگى ارالىقتا تۇراقتى كەلىسىم شارت ورناتىلماق. جەڭىمپاز وقۋشىلاردى تەك ىستىق تاماقپەن قامتىپ قانا قويماي، اسحانانىڭ جابدىعىن جاڭالاپ، عيماراتىن جوندەپ وتىرۋدى دا ءوز مىندەتىنە الاتىن بولادى.

ايتا كەتەيىك، بۇل ورايدا الدىمەن وبلىستاعى بارلىق مەكتەپ اسحانالارىنا تالداۋ جاسالىنىپ، جابدىعى توزعان، جوندەۋدى قاجەت ەتەتىن اسحانالار تاڭداپ الىنعان. ناتيجەسىندە جاڭعىرتۋدى قاجەت ەتەتىن 198 اسحانا انىقتالعان. وسىنى ەسكەرگەن اسقار يسابەك ۇلى مەملەكەتتىك-جەكەمەنشىك ارىپتەستىك اياسىندا اعىمداعى جىلى جوباسى جۇرگىزىلەتىن اسحانالاردىڭ سانىن ەسەلەۋ كەرەكتىگىنە كوڭىل ءبولىپ، بۇل باعىتتاعى بارلىق تەتىكتەردى ىسكە قوسۋدى اتاپ ايتتى. ءوڭىر باسشىسى كونكۋرس كەلىسىمشارتىندا ەكى تاراپتىڭ مىندەتتەمەلەرىن تيىسىنشە ناقتىلاۋدىڭ ماڭىزدىلىعىن اتاپ ءوتتى. وعان قوعامدىق كوميسسيالاردى تارتۋ جايى دا ايتىلدى. سونداي-اق ىستىق تاماقتىڭ ۇزدىكسىز بەرىلۋىن، تاماق ساپاسىنا تەكسەرىس ۇنەمى ۇيىمداستىرىلىپ وتىرىلۋىن قاداعالاۋدى تاپسىردى.

باسقوسۋدا مەملەكەتتىك-جەكەشەلىك ارىپتەستىك اياسىنداعى سپورت، دەنساۋلىق ساقتاۋ، ءتۇرعىن-ۇي شارۋاشىلىق، تۋريزم سالاسىنداعى جوبالار دا قارالىپ، جۇزەگە اسۋ بارىسى سارالاندى. جيىن قورىتىندىسىمەن جاۋاپتى تۇلعالارعا ناقتى تاپسىرمالار جۇكتەلدى.