جامبىل وبلىسى بۇگىندە دامۋدىڭ داڭعىل جولىنا تۇسكەنى جاسىرىن ەمەس. ءوڭىردىڭ ءوندىرىس سالاسى ورىستەپ، شاعىن جانە ورتا بيزنەستە دە وڭدى باستامالار جەتەرلىك. تۇرعىنداردىڭ تۇرمىسى تۇزەلىپ، الەۋمەتتىڭ الەۋەتى ارتۋدا. وعان 2019 جىلعى قاڭتار-تامىزداعى الەۋمەتتىك-ەكونوميكالىق دامۋ قورىتىندىسى دالەل بولا الادى دەپ جازادى Qamshy.kz اقپارات اگەنتتىگى. 

اعىمداعى جىلدىڭ قاڭتار-تامىز ايلارىنىڭ قورىتىندىسى بويىنشا ەكونوميكانىڭ بارلىق سالالارىندا ءوسىم بايقالادى.

نەگىزىگى 6 سالانىڭ (ونەركاسىپ، اۋىل شارۋاشىلىعى، قۇرىلىس، ساۋدا، كولىك، بايلانىس) دامۋ ديناميكاسىن كورسەتەتىن قىسقا مەرزىمدى ەكونوميكالىق ينديكاتور ۇستىمىزدەگى جىلدىڭ قاڭتار-تامىز ايلارىنىڭ قورىتىندىسىمەن 103،8 پايىزدى قۇرادى.

ونەركاسىپ ءونىمىنىڭ ناقتى كولەم يندەكسى 104،3 پايىزدى قۇراپ، 308،7 ميلليون تەڭگەنىڭ ءونىمى ءوندىرىلدى (ونىڭ ىشىندە كەن ءوندىرۋ ونەركاسىبىندە – 34،7 ملرد.تەڭگە (نكي – 101،5 پايىز)، وڭدەۋ ونەركاسىبىندە – 231،0 ميلليارد تەڭگە (105،7 پايىز)).

اۋىل شارۋاشىلىعىندا ناقتى كولەم يندەكسى 103،9 پايىزدى قۇرادى (131،8 ميلليارد تەڭگە)، ونىڭ ىشىندە وسىمدىك شارۋاشىلىعىندا – 105،2 پايىز(50،5 ملرد. تەڭگە) جانە مال شارۋاشىلىعىندا – 103،1 پايىز (81،0 ميلليارد تەڭگە).

نەگىزگى كاپيتالعا سالىنعان ينۆەستيسيا كولەمى ءتيىستى كەزەڭمەن سالىستىرعاندا 13،3 پايىزعا ارتتى (166،6 ميلليارد تەڭگە).

قۇرىلىس كولەمى 62،8 ميلليارد تەڭگەنى قۇراپ، 2،5 پايىزعاعا ءوستى.

تۇرعىن ءۇي قۇرىلىسىندا 333،9 مىڭ شارشى مەتر تۇرعىن ءۇي پايدالانۋعا بەرىلدى (بۇل 2018 جىلدىڭ ءتيىستى كەزەڭىنە 107،3 پايىز).

بولشەك ساۋدا اينالىمىنىڭ ناقتى كولەم يندەكسى 105،1 پايىزدى قۇرادى (189،1 ميلليارد تەڭگە).

جۇك اينالىمى 5،0 پايىزعا، جولاۋشىلار اينالىمى - 5،1 پايىزعا ءوستى.

ينفلياسيا دەڭگەيى جىل باسىنان (2018 جىلعى جەلتوقسانعا قاراعاندا) 3،0 پايىز دەڭگەيىندە قالىپتاستى (ق ر – 3،0 پايىز)). ازىق-تۇلىك تاۋارلارعا تۇتىنۋ باعاسى 6،0 پايىزعا (ق ر – 6،1 پايىز)، ازىق-تۇلىك ەمەس تاۋارلار – 2،7 پايىزعا (ق ر – 2،9 پايىز) ارتتى، اقىلى قىزمەتتەر - 0،6 پايىزعا (ق ر – 0،6 پايىزعا) تومەندەدى.

ايلىق ينفلياسيا 2019 جىلعى شىلدەدە 0،4 پايىزدى قۇرادى (ق ر – 0،2 پايىز).

ءيا، بۇل ەسەپتى كەزەڭدەگى كورسەتكىش. ارينە ءبىر تۇستا ءوسىم بولسا، ءبىر تۇستا تۇراقتىلىق بايقالادى. بۇل قاي ايماقتىڭ بولماسا دا ەكونوميكاسىندا كەزدەسەتىن نارسە. الايدا اۋليەاتاداعى وڭ وزگەرىستەر كوڭىل كونشىتەدى.