تاۋەلسىز جۋرناليست جانبولات ماماي "ستالين قىلمىستارى: ۇلت زيالىلارىن قالاي قىردى" اتتى دەرەكتى فيلم ءتۇسىردى، دەپ جازادى Qamshy.kz اقپارات اگەنتتىگى. بۇل تۋرالى ماماي ءوزىنىڭ Facebook پاراقشاسىندا جازدى.
مامايدىڭ جازۋىنشا، اتالعان دەرەكتى فيلمدە حح عاسىردىڭ 20-30 جىلدارى قازىرگى قازاقستاندا جەرىندە بولعان جاپپاي قۋعىن-سۇرگىن جىلدارى تۋرالى باياندالادى.
"بىرنەشە اي بۇرىن ۇلتتىق تاريحىمىزدىڭ ەڭ قاتەرلى كەزەڭدەرىنىڭ ءبىرى — وتكەن عاسىردىڭ 20-30-جىلدارىنداعى جاپپاي ساياسي قۋعىن-سۇرگىن جايىندا جاڭا دەرەكتى فيلم دايىنداپ جاتقانىمىزدى جاريالاپ ەدىك. ءبىز ەلىمىزدەگى بارلىق تاريحي جەرلەردى ارالادىق: بىرنەشە مىڭ قۋعىن-سۇرگىن قۇربانى جەرلەنگەن جاڭالىق اۋىلىنا، الجير مەن كارلاگقا باردىق. ەلىمىزدىڭ بەلگىلى تاريحشىلارىمەن، ساراپشىلارىمەن كەزدەسىپ، سۇحبات جازدىق. بۇل تاقىرىپقا قاتىستى كوپتەگەن قۇجاتتارمەن جۇمىس جاساپ، ەسەپسىز ماتەريالداردى وقىپ شىقتىق. قىرۋار جۇمىستى اتقارىپ بولعان سوڭ، رەسمي تۇردە جاريالايمىن: قازاقستانداعى ساياسي رەپرەسسيالارعا قاتىستى دەرەكتى فيلم دايىن!
فيلم اتاۋى: «ستالين قىلمىستارى: ۇلت زيالىلارىن قالاي قىردى». دەرەكتى جوبا ەكى تىلدە — قازاق جانە ورىس تىلدەرىندە دايىندالدى. بۇل قۇر اۋدارما ەمەس، ەكى تىلدەگى ەكى بولەك فيلم دەۋگە بولادى!
راسىندا دا، ءبىزدىڭ قوعام ستاليندىك زاماننىڭ ۇرەيىمەن ءالى دە ءومىر سۇرۋدە، ال جازالاۋ ورگاندارى «نكۆد» تۇسىنىكتەرى مەن كاتەگوريالارىنان ءالى دە ايىققان جوق. ءبىز ءوزىمىزدىڭ بويىمىزدان نكۆد-نى، ستالين مەن ديكتاتۋرانى الاستاماعان ەلمىز. بۇگىنگى پروبلەمالارىمىزدىڭ تامىرىن، بالكىم، سول كەزەڭدەردەن ىزدەۋىمىز كەرەك تە شىعار. دەرەكتى فيلمدە ءبىز كوپتەگەن تاريحي وقيعالار جايىندا ءسوز قوزعايمىز. ءتىپتى سول كەزدەگى تاريحي ەپيزودتاردى اكتەرلاردىڭ ويىنى ارقىلى تىرىلتەمىز. بۇل جاي عانا دەرەكتى فيلم ەمەس، اكتەرلىك ويىنى بار دەرەكتى فيلم بولىپ شىقتى. سوندىقتان بۇل جوبا كورەرمەندەردىڭ بارلىق توبىنا دا قىزىقتى بولادى دەپ ۇمىتتەنەمىن.
دەرەكتى ءفيلمنىڭ تۇساۋكەسەر كورسەتىلىمىن وتكىزەتىن جەردى ۇزاق ىزدەدىك. وكىنىشكە قاراي، بۇرىن «زۇلمات» ءفيلمى كورسەتىلگەن «ارمان» كينوورتالىعىندا ءقازىر كۇردەلى جوندەۋ جۇمىستارى جۇرگىزىلۋدە. ءبىراق، بەلگىلى كينوسىنشى مامان ولەگ بورەسكيدىڭ قولداۋىمەن ءبىز «سەزار» كينوتەاترىمەن كەلىسىپ، كورسەتىلىمدى سول جەردە جاسايتىن بولدىق!
«ستالين قىلمىستارى: ۇلت زيالىلارىن قالاي قىردى» دەرەكتى ءفيلمىنىڭ كورسەتىلىمى «سەزار» كينوتەاترىندا (نازاربايەۆ كوشەسى مەن گوگول كوشەلەرىنىڭ قيىلىسى)، 25 قىركۇيەك كۇنى، ساعات 19:00-دە وتەدى. كىرۋ تەگىن!
كەلىڭىزدەر! جاڭا دەرەكتى فيلم تۋرالى بارلىق دوستارىڭىز بەن تۋىستارىڭىزعا ايتىڭىز! تاريحي ادىلدىكتى قالپىنا كەلتىرۋ ىسىندەگى بۇل دا ءسىزدىڭ ۇلەسىڭىز!"، - دەپ جازدى فيلم اۆتورى جانبولات ماماي.
جانبولات ماماي بۇعان دەيىن حح عاسىردا بولعان اشارشىلىق جىلدارى تۋرالى "زۇلمات"، قازاقتىڭ زيالىلارى قۇرعان "الاش" پارتياسى تۋرالى "ەگەر الاش رەسپۋبليكاسى جەڭگەندە" اتتى دەرەكتى فيلمدەر تۇسىرگەن.
پىكىر قالدىرۋ