رەسەيدىڭ ساياسي كونيۋنكتۋرا ورتالىعى رەسەيلىك گۋبارناتورلاردىڭ Instagram-اككاۋنتتارىن زەرتتەپ، وقىرماندارىنىڭ 30 پايىزى بوت ياعني جاندى قولدانۋشى ەمەس، ارنايى باعدارلاما نەمەسە فەيك ەكەنىن انىقتادى، دەپ حابارلايدى Qamshy.kz اقپارات اگەنتتىگى rbc.ru سايتىنىڭ دەرەگىن نەگىزگە الىپ.

كەي گۋبەرناتورلاردىڭ اككاۋنتىندا بوتتار قولدانۋشىلاردىڭ 40 پايىزىن قۇراعان.

ماماندار فەيك اككاۋنتتاردى IG Audit سەرۆيسىنىڭ كومەگىمەن انىقتاعان. باعدارلاما پوست پەن جازىلۋشى جانە  لايك سانىن ساراپتاپ، بەلگىلى ءبىر كريتەريي نەگىزىندە شىنايى جازىلۋشىلاردى ءبولىپ شىعارعان. ماسەلەن، 100 مىڭ وقىرمانى بار اككاۋنتتىڭ جاريالىمدارى ورتاشا ەسەپپەن 700-800 لايك جيناسا (1 پايىزعا دا جەتپەيدى)، وندا وقىرمانداردىڭ شىنايىلىعىنا كۇمان تۋادى. بۇل ءتاسىلدىڭ دالدىگى 92 پايىزدى قۇرايدى دەيدى ماماندار.

البەتتە، ماماندار ءوزى كەلىپ جازىلاتىن بوتتاردىڭ بارىن دا جوققا شىعارمايدى. ءبىراق ءدال مۇنداي جوعارى شامادا ەمەس.

بوتتاردى جيناۋ اككاۋنتتى تانىمال ەتۋ، جازىلۋشىلار سانىن ارتتىرۋدا كەڭ قولدانىلاتىن تاسىلدەردىڭ ءبىرى.

قىزىق، بۇنداي ءتاسىل قازاقستاندىق شەندىلەر اراسىندا قانشالىقتى ءجيى قولدانىلادى ەكەن. توقايەۆ پرەزيدەنت اتانعان ساتتەن بارلىق دەرلىك اكىم-قارالار مەن بيلىكتەگى شەندى-شەكپەندىلەرگە حالىققا ەتەنە جاقىن بولۋ، ولاردىڭ ءۇنىن ەستۋ، اشىقتىق قاعيداتىن ۇستانۋ ماقساتىندا الەۋمەتتىك جەلىلەردەن اككاۋنت اشۋدى تاپسىرعان بولاتىن. بۇگىندە الەۋمەتتىك جەلى ارقىلى ءبىرشاما ماسەلەلەردىڭ شەشىلىپ جاتقانىن دا جوققا شىعارا المايمىز.

Instagram جەلىسىندە وقىرماندارىنىڭ سانى جونىنەن شەنەۋنىكتەر اراسىندا پرەزيدەنت توقايەۆ كوش باستاپ كەلەدى. ونىڭ 708 مىڭ وقىرمانى بار. پرەمەر-مينيستردىڭ كەڭەسشىسى عابيدوللا ءابدىراحىموۆقا 218 مىڭ، الماتى قالاسىنىڭ اكىمى باقىتجان ساعىنتايەۆقا 165 مىڭ، "Nur Otan" پارتياسى ءتوراعاسىنىڭ ءبىرىنشى ورىنباسارى باۋىرجان بايبەككە 120 مىڭ، ۇقك ءتوراعاسى كارىم ءماسىموۆقا 108 مىڭ، ەلوردا اكىمى التاي كولگىنوۆكە 77 مىڭ، سەنات ءتوراعاسى داريعا نازاربايەۆاعا 1300 قولدانۋشى جازىلعان.

اتالمىش سيفرلاردى ارنايى سەرۆيسكە سالىپ تەكسەرسە، شىنايى جازىلۋشىلار سانى ازايارى انىق.