20 قىركۇيەك كۇنى اتىراۋدا «ىسكەر انا» جوباسىنىڭ ءى گرانت كونكۋرسىنىڭ يەگەرلەرى كاسىپتىك قۇرالدارمەن ماراپاتتالدى، دەپ حابارلايدى اتىراۋ وبلىسىنىڭ وڭىرلىك كوممۋنيكاسيالار قىزمەتى.

«ىسكەر انا» جوباسىنىڭ ءى گرانت كونكۋرسىنا قاتىسۋعا 15 شىلدە مەن 25 تامىز ارالىعىندا ارنايى ءبىلىم العان 250 اناعا مۇمكىندىك بەرىلگەن بولاتىن. ولاردىڭ 78ء-ى ەلەكتروندى ءوتىنىش تاستاعان انالار. سولاردىڭ اراسىندا 46-سىنا كوميسسيا شەشىمىمەن كاسىپكە قاجەتتى قۇرالدار بەرىلدى. ماراپاتتاۋعا ارنايى قاتىسقان اتىراۋ وبلىسى ىشكى ساياسات باسقارماسىنىڭ باسشىسى جاسۇلان بيسەمبييەۆتىڭ ايتۋىنشا، جوبانىڭ ۇزدىك قاتىسۋشىلارىنا جىل قورىتىندىسىندا ىنتالاندىرۋ شارالارىن وتكىزۋ جوسپارلانۋدا.

– باعدارلامانىڭ شارتتارى بويىنشا وقىپ بىتىرگەن ايەل ادامداردىڭ ىشىنەن كاسىپكەرلىكتى باستاۋعا نيەت بىلدىرگەن، ارنايى بيزنەس-جوسپارىن جاساعان ايەل ادامدارعا زاتتاي وقىعان ماماندىعى بويىنشا گرانتتار بەرىلۋ جوسپارلانعان بولاتىن. قازىرگى تاڭدا اتىراۋ وبلىسى بويىنشا 110 ايەل ادام وسىنداي گرانتقا يە بولىپ وتىر. جوبا جۇرگىزىلمەس بۇرىن ءبىز زەرتتەۋ جۇمىسىن جاساعان بولاتىنبىز. ناتيجەسىندە ۇيدە وتىرعان ايەل ادامداردىڭ عالامتوردى پايدالانۋ ارقىلى ءوز كاسىبىمەن اينالىسۋىنا جاعداي جاساۋ جۇمىستارى جۇرگىزىلۋدە. ماسەلەن، وسى ۋاقىتقا دەيىن «اسپازدىق» ماماندىعىن ءبىتىرىپ، كونديتەرلىك ونىمدەرىن ءتۇرلى ساۋدا پلاتفورمالارى ارقىلى ساتىپ، قاراجات تاۋىپ وتىرعان ايەل ادامدار بار، – دەيدى جاسۇلان بيسەمبييەۆ.

ايتا كەتەيىك، «ىسكەر انا» جوباسى بارىسىندا قاتىسۋشىلار 10 ماماندىق بويىنشا وقۋ كۋرستارىنان ءوتتى. ەكى اپتالىق مەرزىمدى كۋرستا انالار مامان-ترەنەرلەردەن كاسىپكەرلىك، پسيحولوگيالىق، ماركەتينگ باعىتتارى بويىنشا ءدارىس الدى.

بۇگىن ماراپاتتالعاندار قاتارىندا «اسپازشى» ماماندىعى بويىنشا – 5، «ۆيزاج» ماماندىعى بويىنشا – 10، «ماسساج» ماماندىعى بويىنشا – 7، «مانيكيۋر» ماماندىعى بويىنشا – 5، «تىگىنشى» ماماندىعى بويىنشا – 11، «شاشتاراز» ماماندىعى بويىنشا 8 انا بار.

–  جاسىم 26-دا. يندەر اۋدانى، بودەنە اۋىلىنىڭ تۇرعىنىمىن. وسى جوباعا جالعىزباستى انا رەتىندە قاتىستىم. الداعى ۋاقىتتا كاسىپكەرلىكپەن اينالىسامىن دەگەن جوسپارىم بار. ءوزىم سەكىلدى باسقا دا انالارعا «ىسكەر انا» جوباسىنا قاتىسۋعا كەڭەس بەرەم. وسىنداي مۇمكىندىكتى جىبەرىپ الماڭىزدار دەگىم كەلەدى، – دەيدى گرانت يەگەرى ايدانا تەمىرعالييەۆا.

ەسكە سالا كەتەيىك، جوباعا وبلىس بويىنشا بارلىعى 615 ادام قامتىلعان. ونىڭ 280-گە جۋىعى اۋدانداردان قاتىسۋشى كوپ بالالى، جالعىزباستى، مۇگەدەك بالا ءوسىرىپ وتىرعان، الەۋمەتتىك از قامتىلعان توپقا جاتاتىن انالار.