2020 جىلدىڭ 1 قاڭتارىنان باستاپ ايەلدەردىڭ زەينەت جاسى 59،5 جاسقا دەيىن ۇلعايادى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

قازاقستاندا وتكەن جىلدىڭ قاڭتارىنان ەرلەر مەن ايەلدەردىڭ زەينەت جاسىن تەڭەستىرۋ جۇمىسى باستالدى. زاڭعا سايكەس، 2027 جىلعا دەيىن قازاقستاندىق ايەلدەردىڭ زەينەت جاسىنا جارتى جىلدان قوسىلىپ وتىرادى. ال ەرلەر ءۇشىن ەشتەڭە وزگەرگەن جوق – ولار زەينەت دەمالىسىنا بۇرىنعىداي 63 جاستا شىعادى.

زەينەت جاسىن ارتتىرۋدىڭ ءبىرىنشى كەزەڭى 2018 جىلى باستالدى. بىلتىر ايەلدەردىڭ زەينەت جاسى 58،5، ال بيىل 59 جاستى قۇرادى.

ال كەلەسى جىلدان باستاپ ولار 59،5 جاسىندا زەينەتكە شىعادى.

• 2021 جىلدىڭ 1 قاڭتارىنان — 60 جاسىندا؛
• 2022 جىلدىڭ 1 قاڭتارىنان — 60،5 جاسىندا؛
• 2023 جىلدىڭ 1 قاڭتارىنان — 61 جاسىندا؛
• 2024 جىلدىڭ 1 قاڭتارىنان — 61،5 جاسىندا؛
• 2025 جىلدىڭ 1 قاڭتارىنان — 62 جاسىندا؛
• 2026 جىلدىڭ 1 قاڭتارىنان — 62،5 جاسىندا؛
• 2027 جىلدىڭ 1 قاڭتارىنان — 63 جاسىندا.

دەسە دە، كەيبىر ايەلدەردىڭ زەينەت جاسى وزگەرمەيدى. ولاردىڭ ىشىندە كوپبالالى انالار جانە سەمەي يادرولىق پوليگونىندا تۇرعان ايەلدەر بار.

ماسەلەن، بەس جانە ودان كوپ بالانى سەگىز جاسقا دەيىن تاربيەلەپ وسىرگەن انالار 53 جاستا زەينەتكە شىعا الادى. ال سەمەي يادرولىق پوليگونىنىنىڭ جوعارى رادياسيالىق ءقاۋپى بار ايماقتاردا بەس جىلدان ارتىق تۇرعان ايەلدەرگە 45 جاستا، ەرلەرگە 50 جاستا زەينەتكە شىعۋعا رۇقسات بار.

2019 جىلدىڭ 1 قاڭتارىنان:

• بازالىق زەينەتاقىنىڭ ەڭ تومەنگى مولشەرى – 16 037 تەڭگە؛
• ەڭ تومەنگى زەينەتاقى – 36 108 تەڭگە؛
• بازالىق الەۋمەتتىك تولەمدەردىڭ مولشەرىن ەسەپتەۋ ءۇشىن ەڭ تومەنگى كۇنكورىس دەڭگەيى – 29 698 تەڭگە.

زەينەت جاسى تومەندەي مە

ايەلدەردىڭ زەينەت جاسىن ۇزارتۋ قوعامدا داۋ تۋعىزعانى جاسىرىن ەمەس. بۇل ماسەلە ءالى دە ءالسىن-السىن كوتەرىلىپ كەلەدى. كوپتىڭ تالاپ-تىلەگى – زەينەت جاسىن، كەرىسىنشە، تومەندەتۋ.

جۋىردا پرەزيدەنتتىڭ توراعالىعىمەن وتكەن ۇلتتىق قوعامدىق سەنىم كەڭەسىنىڭ وتىرىسىندا كەڭەس مۇشەلەرى بۇل ماسەلەنى دە اينالىپ وتپەدى. ولار ايەلدەر ءۇشىن زەينەت جاسىن 55، ال ەرلەر ءۇشىن 60 جاسقا دەيىن تومەندەتۋدى ۇسىندى.

ەل ۇكىمەتى بۇل ۇسىنىستى قاراستىرۋعا ۋادە بەرگەنىمەن، زەينەت جاسىن تومەندەتۋ ويلارىندا جوق ەكەنىن اشىق ءبىلدىردى. پرەمەر-مينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆتىڭ ايتۋىنشا، ءقازىر بۇكىل الەمدە ايەلدەردىڭ زەينەتكە شىعۋ جاسىن ۇزارتۋ پروسەسى ءجۇرىپ جاتىر. سەبەبى حالىقتىڭ تۇرمىسى جاقسارىپ، تيىسىنشە ادامنىڭ ءومىر ءسۇرۋ ۇزاقتىعى ارتىپ كەلەدى.

بۇعان دەيىن ءماجىلىستىڭ ءبىر توپ دەپۋتاتى مۇگەدەك بالانى تاربيەلەپ وتىرعان اتا-انانىڭ زەينەت جاسىن تومەندەتۋدى ۇسىنعان بولاتىن.

ال ەل پرەزيدەنتى قاسىم-جومارت توقايەۆ العاشقى جولداۋىندا زەينەتاقى قورىنداعى اقشانىڭ ءبىر بولىگىن باسپانا مەن بىلىمگە جۇمساۋعا رۇقسات بەرۋ مۇمكىندىگىن قاراستىرۋ قاجەتتىگىن ايتتى. ءقازىر ۇكىمەت مەملەكەت باسشىسىنىڭ ۇسىنىسىن جان-جاقتى سارالاپ، پىسىقتاپ جاتىر.