بۇۇ تاماق ونەركاسىبىندەگى ىسىراپشىلىققا قارسى جاھاندىق كامپانيانى ىسكە قوستى، دەپ حابارلايدى Qamshy.kz اقپارات اگەنتتىگى بۇۇ سايتىنا سىلتەمە جاساپ.
الەمدە جىل سايىن 1،3 ملرد توننا ازىق-تۇلىك قوقىسقا تاستالادى ەكەن. بۇۇ-نىڭ قورشاعان ورتانى قورعاۋ ۇيىمى ازىق-تۇلىكتى ساقتاۋ جاعدايىن وزگەرتۋ سياقتى قاراپايىم شارالار ارقىلى تاستالىناتىن قوقىس كولەمىن قىسقارتۋدى قولعا الماق.
بۇكىلالەمدىك تاماق ونەركىسىبى باعدارلاماسىنىڭ دەرەگىنشە، پلانەتاداعى ازىق-تۇلىكتىڭ ۇشتەن ءبىرى جۋىندى جاشىگىنە تاستالاتىن كورىنەدى. وسىنىڭ سالدارىنان الەم ەكونوميكاسى جىلىنا تريلليون دوللار جوعالتادى.
بۇكىلالەمدىك تاماق ونەركىسىبى باعدارلاماسىنىڭ قىزمەتكەرلەرى رەستوراندار مەن دۇكەن يەلەرى جانە قاتارداعى ازاماتتارعا ازىق-تۇلىككە قۇنتتاپ قاراۋعا، ارتىق تاماقتى الماۋعا جانە ساقتاۋعا بولاتىن تاعامدى قوقىسقا تاستاۋعا اسىقپاۋعا شاقىرۋدا.
الەمدە جىلىنا 4 ملرد توننا ازىق-تۇلىك وندىرىلەدى. ەگەر ورنىمەن جۇمسالاتىن بولسا، بۇل پلانەتانىڭ كۇللى تۇرعىندارىن اسىراۋعا جەتەدى.
اتالمىش كامپانياعا تانىمال اسپازدار تارتىلىپ جاتىر. سولاردىڭ اراسىندا ەندريۋ سيممەرن دە بار. ول جۋىندى جاشىگىنە تاستالىپ جاتقان ازىق-تۇلىكتىڭ كوبىن كادەگە اسىرۋعا بولاتىنىن ايتادى. ماسەلەن ول ۇيدە بالىقتى تولىقتاي پايدالانادى ەكەن.
"مەن بالىقتىڭ سۇيەكتەرى مەن باسىن سورپا جاساۋعا قولدانامىن. ءتىپتى قابىعىن قۋىرىپ، ءدامدى شىجىق جاساۋعا بولادى" دەيدى ول.
