ەلباسى ن.نازاربايەۆتىڭ تىكەلەي ىقپالىمەن قابىلدانعان «ديپلوممەن اۋىلعا» باعدارلاماسى –جاستارعا جاسالعان ايرىقشا قامقورلىقتىڭ ءبىر كورىنىسى. باعدارلاما قولعا الىنعان ۋاقىتتان بەرى قانشاما جاس شالعايداعى ەلدىمەكەندەرگە ات باسىن بۇرىپ، حالىققا قىزمەت كورسەتۋدە. سونىڭ ناتيجەسىندە اعايىننىڭ العىسىنا كەنەلىپ، ابىرويى اسقاقتاۋدا.
بيىلعى جاستار جىلىندا دا «ديپلوممەن اۋىلعا» باعدارلاماسى ارقىلى الىس ايماقتاردا ەڭبەك جولىن باستاعىسى كەلەتىندەردىڭ قاتارى ازايعان جوق. قايتا بۇرناعى جىلدارعا قاراعاندا ەداۋىر ارتا تۇسكەن.
جالپى، بيىل «ديپلوممەن اۋىلعا» باعدارلاماسى اياسىندا 655 مامانعا 124 ميلليون تەڭگەگە كوتەرمە جاردەماقى جانە 256 مامانعا تۇرعىن ءۇي ساتىپ الۋعا 970 ميلليون تەڭگە قارجى قاراستىرىلدى.
ۇستىمىزدەگى جىلدىڭ 1 قازانىنا 477 مامانعا 90،9 ميلليون تەڭگە كوتەرمە جاردەماقى جانە 233 مامانعا تۇرعىن ءۇي ساتىپ الۋعا 843،6 ميلليون تەڭگە نەسيە بەرىلىپ ۇلگەرگەن.
وسىنداي مۇمكىندىككە قول جەتكىزگەن جاس ماماندار ءارتۇرلى سالانىڭ وكىلدەرى. مىسالى، ءبىلىم سالاسى بويىنشا 306 جاس مامانعا 57،4 ميلليون تەڭگە كوتەرمە جاردەماقى جانە 142 جاس مامانعا 516،7 ميلليون تەڭگە تۇرعىن ءۇي ساتىپ الۋعا نەسيە بەرىلگەن.
ال دەنساۋلىق ساقتاۋ سالاسى بويىنشا 115 مامانعا 23 ميلليون تەڭگە كوتەرمە جاردەماقى جانە 62 جاس مامانعا 222 ميلليون تەڭگە تۇرعىن ءۇي ساتىپ الۋعا نەسيە ۇلەستىرىلگەن.
سول سياقتى مادەنيەت سالاسى بويىنشا اۋىلدى جەردە ەڭبەك ەتۋگە 10 جاس مامان نيەت بىلدىرگەن. ولارعا 1،8 ميلليون تەڭگە كوتەرمە جاردەماقى جانە 3 جاس مامانعا 11،3 ميلليون تەڭگە تۇرعىن ءۇي ساتىپ الۋعا نەسيە بەرىلدى.
الەۋمەتتىك قامسىزداندارۋ سالاسى بويىنشا ءبىر عانا جاس مامان كەلگەن. ول جۋالى اۋدانىندا ەڭبەك جولىن باستاپ وتىر. جاس مامانعا 176،8 مىڭ تەڭگە جاردەماقى بەرىلىپتى.
سونىمەن قاتار سپورت سالاسى بويىنشا 11 جاس مامانعا 2 ميلليون تەڭگە كوتەرمە جاردەماقى جانە بايزاق، جۋالى اۋداندارىندا جۇمىسقا كىرىسكەن 2 جاس مامانعا 7،6 ميلليون تەڭگە نەسيە بەرىلدى.
اۋىلشارۋاشىلىعى سالاسى بويىنشا 34 جاس مامانعا 6،3 ميلليون تەڭگە كوتەرمە جاردەماقى جانە 24 جاس مامانعا 86 ميلليون تەڭگە نەسيە بەرىلدى. بۇگىندە جالىندى جاستار مەملەكەت قولداۋىنىڭ ارقاسىندا ءوز جۇمىستارىن ۇلكەن جاۋاپكەرشىلىكپەن اتقارۋدا.
