مەملەكەت باسشىسى قاسىم-جومارت توقايەۆ «سىندارلى-قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ كەپىلى» اتتى حالىققا ارناعان جولداۋىندا «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. ەلىمىزدە كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ءبىز شاعىن كاسىپكەرلىكتى بۇكىل قوعام بولىپ قولداۋىمىز كەرەك»،– دەپ اتاپ كورسەتكەن بولاتىن.

بۇگىندە جامبىل وبلىسىندا ءوز ءىسىن اشىپ، جەكە كاسىپكە بەت بۇرعان جاستاردىڭ قاتارى كوبەيىپ كەلە جاتىر. بۇل تۇرعىدا ولارعا قولداۋ-كومەك اۋاداي قاجەت. وسى ورايدا ۇستىمىزدەگى جىلدىڭ 24 شىلدە - 27 تامىز ارالىعىندا «اتامەكەن» كاسىپكەرلەر پالاتاسى ارقىلى 900 جاس «جاس كاسىپكەر» جوباسى اياسىندا 2 كەزەڭ بويىنشا وقىتىلدى. بيىلعى 24 شىلدەدە تۇراقتى جۇمىس ورنى جوق جاستار ءۇشىن قىسقا مەرزىمدى كۋرستار باستالدى. كۋرستى ءبىتىرىپ، ءوز ءىسىن اشام دەگەن جاستارعا جەڭىلدەتىلگەن كرەديت نەمەسە مەملەكەتتىك گرانت الۋعا «اتامەكەن» كاسىپكەرلەر پالاتاسى تاراپىنان مۇمكىندىكتەر جاسالعان.

سول سياقتى، اعىمداعى جىلدىڭ 7-18 قازانى ارالىعىندا 18-29 جاس ارالىعىنداعى جاستاردىڭ يننوۆاسيالىق جانە كاسىپكەرلىك الەۋەتىن دامىتۋعا باعىتتالعان «جاس كاسىپكەرلەر مەكتەبى» جوباسى ىسكە اسىرىلۋدا.

جاستاردىڭ جۇمىسپەن قامتىلۋىندا بوس جۇمىس ورىندارى جارمەڭكەسىن وتكىزۋدىڭ دە تيىمدىلىگى مول. مىسالى، ۇستىمىزدەگى جىلدىڭ 1 قازانىنداعى مالىمەت بويىنشا وبلىس بويىنشا 1 ءوڭىرارالىق جانە تاراز قالاسى مەن اۋدانداردا 48 بوس جۇمىس ورىندارى جارمەڭكەلەرى وتكىزىلگەن. ولارعا 16-29 جاس ارالىعىنداعى 1000 جاس قاتىستى. جارمەڭكەلەرگە قاتىسۋشى جاستاردىڭ 60 پايىزى جۇمىسپەن قامتىلىپ وتىر.

وسى جارمەڭكەلەردە 771 جۇمىس بەرۋشىدەن 2386 جۇمىس ورىندارىنا ۇسىنىس تۇسكەنىن ايتا كەتكەن ءجون. جارمەڭكەلەر ناتيجەسىندە 432 جاس تۇراقتى جۇمىسقا ورنالاسىپ، اقىلى قوعامدىق جۇمىستارعا 33 جاس، كاسىبي وقىتۋعا 13، الەۋمەتتىك جۇمىس ورىندارىنا 1، جاستار تاجىريبەسىنە 113 جاس، ماۋسىمدىق جۇمىستارعا 8 جاس جىبەرىلگەن.