جاستار تاربيەسى، ولاردىڭ اراسىنداعى قۇقىقبۇزۋشىلىقتى بولدىرماۋ ماسەلەسى كۇن تارتىبىنەن تۇسكەن ەمەس. بۇل تۇرعىدا جامبىل وبلىسىندا دا ماقساتتى جۇمىستار اتقارىلۋدا. اسىرەسە، وبلىس اكىمدىگى جاستار ساياساتى ماسەلەلەرى باسقارماسىنا جۇكتەلگەن جاۋاپكەرشىلىك جوعارى. بۇگىندە اتالمىش مەكەمەنىڭ ماماندارى تاراز قالاسى مەن اۋدان اكىمدىكتەرىمەن بىرلەسىپ، ورتاق مۇددەگە باعىتتالعان وڭدى ىستەرگە ۇيىتقى بولۋدا.

ۇستىمىزدەگى جىلدىڭ 1 قازانىندا بەرىلگەن مالىمەتكە سۇيەنسەك، پروباسيا قىزمەتىنىڭ ەسەبىندە تۇرعان 79 جاس وتىنىشپەن قايرىلىپ، تىركەۋگە الىنعان. ولاردىڭ باسىم كوپشىىگى تاراز قالاسىنان. ياعني، 40 ادام. سونىمەن قاتار بايزاق، جامبىل، جۋالى، قورداي، مويىنقۇم، سارىسۋ، ت.رىسقۇلوۆ، تالاس، شۋ اۋداندارىنان دا ەسەپكەن الىنعاندار بار. بۇگىندە ولاردىڭ ونىڭ 23ء-ى تۇراقتى جۇمىسپەن قامتىلسا، 16-سى اقىلى قوعامدىق جۇمىستارعا، 3 جاس جاستار تاجىريبەسىنە جولدانعان. وسى ساناتتاعى ازاماتتاردان 8 ادام كاسىپتىك وقىتۋعا جىبەرىلىپتى.

سونىمەن قاتار جىل باسىنان بەرى دەسترۋكتيۆتى ءدىني اعىمدارعا تارتىلعان ازاماتتارمەن وڭالتۋ جۇمىستارىنىڭ ناتيجەسىندە جالپى 118 ادام قوعامعا بەيىمدەلگەن. ونىڭ 11ء-ىنىڭ جاستار ەكەنىن ايتا كەتكەن ءجون.

اتالعان ازاماتتار اراسىندا وڭالتۋ جۇمىستارى بارىسىندا دەسترۋكتيۆتى ءدىني اعىمداردىڭ جەتەگىندە بولعان 1 ازاماتشا «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى» اياسىندا «ەسەپشى» ماماندىعى بويىنشا 3 ايلىق كۋرستان ءوتتى. اتالعان ازاماتشا قازىرگى تاڭدا تىگىن شەبەرحاناسىندا تىگىنشى بولىپ جۇمىس اتقارادى. قالعان 10 ازامات- ءوزىن-وزى جۇمىسپەن قامتىعاندار.

جاستاردى تاربيەلەۋدىڭ ءتيىمدى تەتىگىنىڭ ءبىرى-ولاردى ەڭبەككە جۇمىلدىرۋ. بۇل باعىتتا دا جۇيەلى جۇمىستار بارشىلىق. 2019 جىلى 1 مىڭنان استام جاستى «جاسىل ەل» ەڭبەك جاساعى ساپىندا ماۋسىمدىق ەڭبەكپەن قامتۋعا 73،0 ميلليون تەڭگە قارجى ءبولىنىپ، يگەرىلدى. بيىلعى مامىر-شىلدە ايلارىندا تاراز قالاسىندا 150 NEET جاس جانە 250 ستۋدەنت پەن جۇمىسسىز جاستار كانال تازارتۋ جۇمىستارىمەن اينالىستى.

جالپى، بيىلعى جازعى ەڭبەك ماۋسىمىندا ستۋدەنتتىك قۇرىلىس جاساقتارى قاتارىنا 252 ستۋدەنت جۇمىس جاساۋعا نيەت بىلدىرگەن.

مىنە، وسىلايشا مەملەكەتتىك جاستار ساياساتىنىڭ نەگىزگى باعىتتارى بويىنشا جامبىل وبلىسىندا دا تىندىرىمدى تىرلىكتەر لايىقتى جالعاسىن تابۋدا.