بۇگىندە جامبىل وبلىسىندا جاستاردى الەۋمەتتەندىرۋگە باسىمدىق بەرىلۋدە. بۇل، ارينە، مەملەكەتتىك جاستار ساياساتىن ىسكە اسىرۋمەن ۇيلەسىم تاپقان مىندەتتەر. وسى ورايدا ءتيىستى ۋاكىلەتتى ورگاندارمەن جانە تاراز قالاسى مەن اۋدان اكىمدەرى اراسىندا ناقتى مەجەلەر ايقىندالعان 11 ينديكاتورلىق كورسەتكىشتەر بەلگىلەنىپ وتىر. ونىڭ 7ء-ى جاستاردى جۇمىسپەن قامتۋدىڭ بەلسەندى شارالارىنا تارتۋعا باعىتتالعان.
ەسەپتى جىلى 11 مىڭ جاس جۇمىسپەن قامتۋدىڭ بەلسەندى شارالارىنا تارتىلماق. جامبىل وبلىسى اكىمدىگى جاستار ساياساتى ماسەلەلەرى باسقارماسىنىڭ مالىمەتىنە سۇيەنسەك، ۇستىمىزدەگى جىلدىڭ 1 قازانىنا 12780 جاس جۇمىسپەن قامتۋدىڭ بەلسەندى شارالارىنا تارتىلعان. ولاردىڭ 5940-ى ۆاكانتتىق بوس جۇمىس ورىندارىنا ورنالاسسا، 1337ء-ى قىسقا مەرزىمدى كاسىبي وقىتۋعا، 770 جاس كاسىبي وقىتۋعا، 2297 تۇلەك جاستار تاجىريبەسىنە، 302ء-ى الەۋمەتتىك جۇمىس ورىندارىنا، 1064ء-ى اقىلى قوعامدىق جۇمىستارعا جولداندى. ال 483 جاس «بيزنەس-باستاۋ» جوباسىمەن كاسىپكەرلىك نەگىزدەرىنە وقىتىلىپ، 227 جاس 976،1 ميلليون تەڭگە كولەمىندە شاعىن نەسيە الدى. بۇل تۇرعىدا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 - 2021 جىلدارعا ارنالعان «ەڭبەك» مەملەكەتتىك باعدارلاماسىنىڭ ءىى باعىتى شەڭبەرىندە قالا جانە اۋىل جاستارىنا ميكروكرەديت بەرۋ ءىسىنىڭ ءوز سەپتىگىن تيگىزگەنىن ايتا كەتۋ كەرەك.
سول سياقتى اتالمىش مەملەكەتتىك باعدارلامانىڭ ءىى باعىتى شەڭبەرىندە جاستاردىڭ جاڭا بيزنەس-يدەيالارىن دامىتۋعا 200 ايلىق ەسەپتىك كورسەتكىش مولشەرىندە 1129 جاسقا قايتارىمسىز گرانت رەتىندە 570،1 ميلليون تەڭگە ءبولىندى. ودان بولەك 360 جاس 181،8 ميلليون تەڭگە قايتارىمسىز گرانتا يە بولدى.
بيىلعى جىلدىڭ تاعى ءبىر تاماشا تارتۋى «بيزنەستىڭ جول كارتاسى-2020» مەملەكەتتىك باعدارلاماسى شەڭبەرىندە جاڭا بيزنەس-يدەيالاردى ىسكە اسىرۋعا ارنالعان مەملەكەتتىك گرانتتاردىڭ كوپتەپ بەرىلگەندىگى. وسى ورايدا كونكۋرستىق كوميسسيانىڭ شەشىمى بويىنشا 153 جاس كاسىپكەر جالپى سوماسى 314 ميلليون تەڭگەنىڭ گرانت يەگەرلەرى اتانىپ، قوماقتى قاراجاتقا قول جەتكىزدى. ونىڭ 47ء-سى تاراز قالاسىنان بولسا، بايزاق اۋدانىنان 8، جامبىل اۋدانىنان 12، جۋالى اۋدانىنان 15، قورداي اۋدانىنان 6، مەركى وڭىرىنەن 10، مويىنقۇم اۋدانىنان 3، سارىسۋ اۋدانىنان 19، ت.رىسقۇلوۆ اۋدانىنان 10، تالاس اۋدانىنان 16، شۋ اۋدانىنان 7 جاس وسىنداي مۇمكىندىككە قول جەتكىزدى. بۇل ارينە ءوز ءىسىن جاڭا باستاپ جاتقان جاس كاسىپكەرلەرگە ۇلكەن قولداۋ ەكەندىگى داۋسىز.
