جاستارعا لايىقتى تالىم-تاربيە بەرۋ باعىتىندا الەۋمەتتىك نىسانداردىڭ مۇمكىندىگىن ءتيىمدى پايدالانۋدىڭ ماڭىزى زور. قازىرگى تاڭدا جامبىل وبلىسىندا بۇل باعىتتا باياندى باستامالار كوتەرىلۋدە. «جامبىل وبلىسى بويىنشا ەلدى مەكەندەردى مادەنيەت نىساندارىمەن قامتۋ جانە ولاردىڭ حالىققا قىزمەت كورسەتۋ دەڭگەيىن ارتتىرۋ كارتاسىنا» سايكەس، 2020-2023 جىلدارى ەلدى مەكەندەردە قۇرىلىسى جوسپارلانعان مادەنيەت نىساندارىندا «جاستار دەباتتىق كلۋبتار» بولمەلەرىن اشۋ قاراستىرىلعان. «رۋحاني جاڭعىرۋ» باعدارلاماسى اياسىندا 2018 جىلى وبلىس كىتاپحانالارىندا 17 كوۆوركينگ ورتالىقتارى اشىلىپ، جاستاردىڭ ءجيى باس قوساتىن ورىندارىنا اينالدى.

ال ۇستىمىزدەگى جىلى 1 كوۆوركينگ ورتالىعى- ش.ءۋاليحانوۆ اتىنداعى ورتالىق امبەباپ-عىلىمي كىتاپحاناسىندا رەلاكس ايماعى اشىلدى.

سونىمەن قاتار، ەسەپتى مەرزىمدە «سيفرلى قازاقستان» باعدارلاماسى اياسىندا كىتاپحانالار جانىنان 59 اقپاراتتىق ورتالىقتارى اشىلىپ، بۇگىنگى كۇنى 130 سيفرلاندىرىلعان اقپاراتتىق ورتالىقتارى قىزمەت كورسەتۋدە.

بۇگىندە وبلىستا 2300-دەن استام سپورت نىساندارى، 200-دەن استام مادەنيەت نىساندارى، 26 اۋلا كلۋبتارى جاستار يگىلىگىنە قىزمەت ەتۋدە، جول كارتاسى اياسىندا قوسىمشا 146 نىسان اشۋ جوسپارلانعان. ونىڭ ىشىندە (مادەنيەت سالاسى بويىنشا 65، سپورت سالاسى بويىنشا 80 اشۋ كوزدەلگەن. ۇستىمىزدەگى جىلدىڭ 9 ايىندا 81 نىسان پايدالانۋعا بەرىلىپ ۇلگەردى.

ناۋرىز مەرەكەسى قارساڭىندا وبلىس ورتالىعىندا كولەمى 6،3 گەكتاردى قۇرايتىن جەرگە «جاستار اللەياسى» پايدالانۋعا بەرىلىلۋى دە جامبىلدىق جۇرتشىلىق، اسىرەسە جاستار ءۇشىن كەرەمەت تارتۋ بولدى. اتالعان اللەيادا «ماحاببات» ستەلاسى، «ءبىلىم» الاڭى، «Jastar» قابىلەت ورتالىعى، «كىتاپ» الاڭشاسى سەكىلدى يدەولوگيالىق ماڭىزدى ورىندار ورنالاسقان. بۇل نىسان جاستاردىڭ بوس ۋاقىتى مەن ءبىلىم الۋىن ءتيىمدى ۇيلەستىرەتىن، اقپاراتتىق تەحنولوگيالاردى ەركىن قولداناتىن ۇلكەن الاڭعا اينالۋدا.

قالاي دەگەن كۇندە دە جاستارعا ساپالى ءبىلىم مەن سانالى تاربيە بەرۋمەن شەكتەلمەي، ولارعا قاجەتتى نىسانداردى كوپتەپ سالۋدان ۇتپاساق ۇتىلمايمىز. ويتكەنى، بوس ۋاقىتىن ءتيىمدى وتكىزۋگە داعدىلانعان جاستار ەرتەڭ اتپال ازاماتقا اينالارى كۇمان تۋدىرمايدى. بۇل تۇرعىدا جەرگىلىكتى جاستار ءۇشىن بارلىق جاعدايدى جاساپ، مول مۇمكىندىك قاراستىرىپ وتىرعان جامبىل وبلىسىنىڭ باستامالارى ماقتاۋعا تۇرارلىق.