ەلباسى-قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ ازاتتىقتىڭ العاشقى جىلدارىنان باستاپ ەگەمەن ەلىمىزدىڭ ەرتەڭى سانالاتىن جاستار ماسەلەسىن نازاردان تىس قالدىرعان ەمەس. ءتىپتى، ەكونوميكالىق قيىندىقتارعا قاراماستان «بولاشاق» باعدارلاماسىنىڭ قابىلدانۋىنا ىقپال ەتىپ، وسكەلەڭ ۇرپاقتى الەمنىڭ ماڭدايالدى وقۋ ورىندارىندا ءبىلىم الۋىنا جول اشتى. كەيىننەن مەملەكەتتىك جاستار ساياساتى تۋرالى زاڭ قابىلدانىپ، جەر-جەردە ارنايى ورتالىقتار ىسكە كىرىستى. ءبىلىم گرانتتارىنىڭ سانى دا ارتىپ، جاستاردىڭ جۇمىسپەن قامتىلۋىنا دا كوپتەپ كوڭىل بولىنە باستادى. مۇنىڭ ءبارى دە ۇلت كوشباسشىسىنىڭ شىنايى قامقورلىعى ەكەندىگى داۋسىز. ال، بيىلعى جىلدىڭ ەلباسىنىڭ باستاماسىمەن جاستار جىلى بولىپ جاريالانۋى بۇل باعىتتاعى جۇمىستاردى جانداندىرا ءتۇستى.
بۇگىندە جامبىل وبلىسىندا دا جاستار ساياساتى توڭىرەگىندە تىندىرىمدى تىرلىكتەر تىكتەلۋدە. ايماقتا 2019-2020 جىلدارعا ارنالعان مەملەكەتتىك جاستار ساياساتىن ىسكە اسىرۋ جونىندەگى جول كارتاسى ازىرلەنىپ، بەكىتىلدى. اتالعان قۇجاتقا سايكەس جوسپارلى جۇمىستار اتقارىلۋدا.
ايتا كەتۋ كەرەك، جول كارتاسى 6 ءبولىم، 65 تارماقتان تۇرادى. اتاپ ايتقاندا، جاستاردى بىلىممەن قامتۋ بويىنشا 10 تارماق، جاستاردى جۇمىسپەن قامتۋ تۇرعىسىندا 7 تارماق، جاستاردىڭ يننوۆاسيالىق جانە كاسىپكەرلىك بەلسەندىلىگىن ارتتىرۋ نەگىزىندە 11 تارماق، دەنساۋلىق ساقتاۋ سالاسىندا 4 تارماق، جاستاردىڭ بوس ۋاقىتىن ءتيىمدى ۇيىمداستىرۋ بويىنشا 32 تارماق، جاستاردى، جاس وتباسىلاردى تۇرعىن ۇيمەن قامتۋ جايىندا 1 تارماق قامتىلعان.
بۇگىنگى كۇنگە ونىڭ 15ء-ى ورىندالىپ، باقىلاۋدان الىندى. ال 43 تارماق ورىندالۋ ۇستىندە. سونىمەن قاتار جەتەۋى جىل سوڭىنا دەيىن ورىندالادى.
جالپى، وڭىردە 239 مىڭنان استام جاس بار، بۇل وبلىس حالقىنىڭ 21،2 پايىزىن قۇرايدى. ونىڭ ىشىندە NEET ساناتىنداعى جاستاردىڭ ۇلەسى 2019 جىلى 7،7 پايىزدى نەمەسە 18 414 جاستى قۇرادى.
ال جاستار اراسىنداعى جۇمىسسىزدىق دەڭگەيى 2019 جىلى 2،4 پايىز دەڭگەيىندە قالىپتاسىپ وتىر. رەسپۋبليكا بويىنشا كورسەتكىشتىڭ 3،7 پايىز ەكەنىن ەسكەرسەك، ەداۋىر ىلگەرىلەۋ بار.
سونىمەن قاتار جۇمىسسىزدىقتىڭ الدىن الۋ جانە جاستارعا ماماندىقتى دۇرىس تاڭداۋعا كومەك كورسەتۋ ماقساتىندا ازىرلەنگەن «تۇلەكتەر تاقتاسى» جوباسى وبلىستاعى 341 مەكتەپتە، 24 كاسىپتىك-تەحنيكالىق ءبىلىم بەرۋ مەكەمەلەرىندە ورناتىلعان.
