«رۋحاني جاڭعىرۋ» باعدارلاماسى اياسىندا وسكەلەڭ ۇرپاقتى ۇلتتىق قۇندىلىقتارعا باۋلۋدىڭ، اسىرەسە، اتادان بالاعا ميراس بولىپ كەلە جاتقان ءتول ونەرىمىزدى دارىپتەۋدىڭ ماڭىزى زور. بۇگىنگى تاڭدا وبلىس بويىنشا 128 سپورتشى جۇيەلى تۇردە قۇسبەگى سپورت تۇرىمەن اينالىسۋدا. سونىمەن قاتار، وبلىس بويىنشا جامبىل اۋدانى، اسا اۋىلىنداعى بالالار-جاسوسپىرىمدەر سپورت مەكتەبى، مەركى اۋدانىنداعى №18 بالالار-جاسوسپىرىمدەر سپورت مەكتەبى جانە ۇلتتىق سپورت تۇرلەرىنەن «اۋليە-اتا» كاسىپقوي كلۋبىندا قۇسبەگى سپورت ءتۇرى بويىنشا بولىمشەلەرى جۇمىس اتقارۋدا. اتالعان سپورت مەكەمەلەرىندە 4 جاتتىقتىرۋشى، 36 سپورتشىمەن جۇمىس جاساۋدا.

وبلىستا بۇركىتشى ورتالىعىن جىل سوڭىنا دەيىن ۇلتتىق سپورت تۇرلەرىنەن «اۋليە-اتا» كاسىپقوي كلۋبىنىڭ جانىنان اشۋ ءۇشىن كلۋبتىڭ فۋنكسياسى مەن وكىلەتتىلىكتەرىن وبلىستاعى قۇسبەگى سپورت تۇرىمەن اينالىساتىن سپورت مەكەمەلەرىنە ۇيلەستىرۋ بويىنشا جارعىسىنا وزگەرىستەر ەنگىزۋ جۇمىستارى جۇرگىزىلۋدە.

سونىمەن قاتار وبلىستا اسكەري-پاتريوتتىق جۇمىستاردىڭ دا جاندانا تۇسكەندىگى قۋانتادى. بۇگىندە وبلىستاعى 358 ورتا مەكتەپتە جانە 44 كوللەدجدە 402 «جاس سارباز» اسكەري-پاتريوتتىق كلۋبتارى قۇرىلعان. وندا 9898 بالا اسكەري-پاتريوتتىق تاربيەمەن قامتىلدى.

اسكەري-پاتريوتتىق كلۋبتاردا «جاس مەرگەن»، «جاس دەسانتشى» سياقتى ۇيىرمەلەر مەن توپتار، «اسكەري ءبىلىم تاريحى»، «اسكەري ءىس»، «جاس ۇلانداردى دايىنداۋ»، مەرگەندەر ۇيىرمەسى، ارمرەستلينگ، كاراتە، كۇرەس سەكسيالارى جانە تاعى دا باسقا اسكەري-قولدانبالى سپورتتىق سەكسيالار جۇمىس جاسايدى.

ۇستىمىزدەگى جىلدىڭ 19-22 ماۋسىمى ارالىعىندا قاراعاندى وبلىسىندا وتكەن رەسپۋبليكالىق «ايبىن» اسكەري-پاتريوتتىق بايقاۋىنا جامبىل پوليتەحنيكالىق جوعارى كوللەدجىنىڭ، قورداي اۋدانى №41 ورتا مەكتەبىنىڭ «جاس سارباز» كلۋبتارى قاتىسىپ، جۇلدەلى ورىنداردى يەلەندى.

جاستار اراسىندا اسكەري-پاتريوتتىق جۇمىستاردى جەتىلدىرۋ، سالاۋاتتى ءومىر سالتىن ناسيحاتتاۋ، جاستاردى اسكەري-قولدانبالى جانە تەحنيكالىق دايىندىققا داعدىلاۋ ماقساتىندا بيىلعى 12 ساۋىرىندە تاراز قالاسىنداعى №85395 اسكەري بولىمىندە «ايبىن» رەسپۋبليكالىق اسكەري-پاتريوتتىق جاستار جيىنىنا قاتىسۋ ءۇشىن جامبىل وبلىسىنىڭ اسكەري-پاتريوتتىق كلۋبتار اراسىنداعى ىرىكتەۋ ءتۋرنيرى وتكىزىلدى. وعان 16-29 جاس ارالىعىنداعى تاراز قالاسى مەن اۋدانداردان، وبلىستاعى ارناۋلى ورتا وقۋ ورىندارىنان جانە مەكتەپتەردەن 14 كوماندا قاتىسىپ، اسكەري-سپورتتىق ويىنداردىڭ 8 ءتۇرى بويىنشا سايىسقا ءتۇستى. جالپى كوماندالىق ەسەپتە ءى ورىندى يەلەنگەن جامبىل پوليتەحنيكالىق جوعارى كوللەدجى رەسپۋبليكالىق ويىندارعا قاتىسىپ، ويىننىڭ جەكەلەگەن تۇرلەرى بويىنشا جەڭىمپاز اتاندى.

ال 4 مامىردا «جاستار» اللەياسىندا وبلىس اكىمدىگى جاستار ساياساتى ماسەلەلەرى باسقارماسى مەن وبلىستىق قورعانىس ىستەرى جونىندەگى دەپارتامەنتىنىڭ ۇيىمداستىرۋىمەن «مەن وتاندى قورعاۋعا دايىنمىن!» اتتى وبلىستىق پاتريوتتىق اكسياسى وتكىزىلدى. بۇل باعىتتاعى باياندى جۇمىستار الداعى ۋاقىتتا دا جالعاسا بەرەتىن بولادى.