جامبىل وبلىسىندا جاستار ءتۋريزمىن دامىتۋ بويىنشا جەمىستى جوبالار جاندانا باستادى. وعان ەرىكتى جاستار دا ءوز ۇلەستەرىن قوسۋدا. بۇعان مىسالدى الىستان ىزدەۋدىڭ قاجەتى شامالى. مىسالى، جاستار جىلى اياسىندا ۇستىمىزدەگى جىلعى 23-25 اقپاندا «تاراز جەرىنە تاعزىم» جاس تۋريستەر فەستيۆالى وتكىزىلىپ، وعان 30 ۆولونتەر قىزمەت كورسەتتى. فەستيۆال اياسىندا «تۋعان جەرگە تاعزىم» تاريحي-ولكەتانۋ كونفەرەنسياسى، تاراز قالاسىنىڭ تۋريستىك نىساندارى بويىنشا جامبىل، الماتى، تۇركىستان وبلىستارى مەن الماتى، شىمكەنت قالالارىنىڭ وقۋشىلارىنا ارنالعان ەكسكۋرسيالىق تۋر، جامبىل، الماتى، تۇركىستان وبلىستارى مەن الماتى، شىمكەنت قالالارىنىڭ يۋنەسكو كلۋبتارى وكىلدەرىنىڭ قاتىسۋىمەن بالالارعا ارنالعان «جاس سۋرەتشى» جانە «جاس قولونەرشى» كونكۋرستارى، مۇگەدەك بالالارعا كومەك كورسەتۋ ءۇشىن اكسيا ۇيىمداستىرىلدى.
ال بيىلعى 30-31 ناۋرىزدا «تاراز – وتكەن مەن بولاشاقتىڭ تۇيىسكەن قالاسى» اتتى جاستار تۋريستىك فورۋمى وتكىزىلىپ، وعان 30 ۆولونتەر قىزمەت كورسەتتى. فورۋم اياسىندا «اقىرتاس» ساراي كەشەنىندە تاريحي-ولكەتانۋ كونفەرەنسياسى، «ۇزدىك ءان»، «ۇزدىك ولەڭ»، «ۇزدىك قويىلىم» كونكۋرستارى، «QUEST» ينتەللەكتۋالدىق-شىتىرمان ويىنى، جاستارعا ارنالعان فلەش-موب، الپينيزم بويىنشا ماستەر-كلاسستار جانە تاراز قالاسى مەن جاقىن ورنالاسقان اۋدانداردىڭ تاريحي-مادەني نىساندارى مەن كورىكتى جەرلەرىنە ەكسكۋرسيالىق تۋرلار ۇيىمداستىرىلدى.
بۇدان بولەك بيىلعى 13 ماۋسىمنان باستاپ تۇراقتى تۇردە «جاستار جىلى» اياسىندا تۋريزم باسقارماسىنىڭ باستاماسىمەن وبلىس اۋماعىنداعى تاريحي-مادەني نىساندار ارقىلى وتەتىن تەگىن 2 تۋريستىك اۆتوبۋس جۇمىسىن باستادى. ايماقتىڭ نەگىزگى تۋريستىك نىساندارىن قامتيتىن مارشرۋت بويىنشا ىسكە قوسىلعان، كاسىبي ەكسكۋرسوۆودتارى بار برەندتى تۋريستىك اۆتوبۋستىڭ ىسكە قوسىلۋى ىشكى ءتۋريزمدى دامىتۋعا جانە تۋريستىك وبەكتىلەردى وبلىس تۇرعىندارى مەن تۋريستەر اراسىندا تانىمال ەتۋگە مۇمكىندىك بەرەدى.
سونىمەن قاتار 28-29 تامىزدا «Taraz gid» جاستار تۋريستىك سلەتى ءوتتى. سلەتكە جوعارى جانە ورتا ارناۋلى وقۋ ورىندارىنىڭ ستۋدەنتتەرى، ەلىمىزدىڭ ءار ايماعىنان كەلگەن ەكسكۋرسوۆودتار، شەتەل ساياحاتشىلارى مەن بلوگەرلەر قاتىسقانىن ايتا كەتكەن ءجون.
وسىلايشا جامبىل جەرىندە جاستار ءتۋريزمىن دامىتۋ باعىتىندا باياندى باستالار كوتەرىلۋدە.
