تاراز يننوۆاسيالىق-گۋمانيتارلىق ۋنيۆەرسيتەتى، شەرحانتانۋ عىلىمي-زەرتتەۋ ورتالىعى جانە «فيلولوگيا» كافەدراسىنىڭ ۇيىمداستىرۋىمەن حالىقتىڭ ءبىرتۋار ازاماتى، كەسەك تۇلعا، كەنەن دارىننىڭ قايتىس بولعان كۇنىنە بايلانىستى «جۇلدىزى نۇرلى سۋرەتكەر» اتتى ەسكە الۋ كەشى وتكىزىلدى.
ەسكە الۋ كەشىندەگى العاشقى تەبىرەنىسكە تولى ءسوزدى ۋنيۆەرسيتەت رەكتورى، فيلولوگيا عىلىمدارىنىڭ دوكتورى، ق ر ۇعا قۇرمەتتى مۇشەسى ەربولات بايۇزاق ۇلى ساۋرىقوۆ الدى. ءوز سوزىندە بەلگىلى جازۋشى، كورنەكتى قوعام قايراتكەرى، تالانتتى دراماتۋرگ، دارىندى جۋرناليست، ۇلت جاناشىرى شەرحان مۇرتازانىڭ ومىردەن وتكەنىنە ءبىر جىل تولعاندىعىن، قازاق رۋحانياتىنىڭ اۋىر قازاسىنا بالانعان بۇل كۇننىڭ بولاشاق ۇرپاق تاربيەشىلەرى ءۇشىن اسا ماڭىزدى ەكەندىگىن اتاپ ايتىپ، قازاقتىڭ شەراعاسىنا بالانعان زاۋ تۇلعا شىعارماشىلىعىمەن ماقتانۋ قاجەتتىگىن، ۇلگى-ونەگە الار ومىرلىك مەكتەپ ەكەندىگىنە توقتالدى.
كەلەسى كەزەكتە ستۋدەنتتەردىڭ ش.مۇرتازانىڭ عۇمىرناماسى بويىنشا ازىرلەنگەن بەينەروليگى كورسەتىلدى. ەسكە الۋ كەشىن جاس اقىنداردىڭ جۇلدىزى نۇرلى سۋرەتكەر مەن «نامىس نايزاعايىنا» بالايتىن تۇلعاعا دەگەن ارناۋ ولەڭدەرى جالعاستىردى. «مەنىڭ شەراعام» دەپ ءارقايسىسى زاۋ تۇلعانىڭ ازاماتتىق تۇلعاسىن، ۇلتتىق رۋحىمىزدى، تاۋەلسىزدىگىمىزدى تۇعىر ەتۋدەگى دارا بولمىسىن جىرعا قوستى.
ەسكە الۋ كەشىندە ش.مۇرتازانىڭ اماناتىن تۋ ەتكەن پاتريوتتىق اندەر شىرقالىپ، بي بيلەندى. سونداي-اق، كەشتى ۇيىمداستىرۋشىلار تاراز يننوۆاسيالىق-گۋمانيتارلىق ۋنيۆەرسيتەتى رەكتورى ساۋرىقوۆ ەربولات بايۇزاق ۇلىنىڭ باستاماسىمەن تاعايىندالعان «ش.مۇرتازا» اتىنداعى ستيپەنديا يەگەرلەرى جاس اقىن، رەسپۋبليكالىق ءجىر-مۇشايرالاردىڭ جەڭىمپازى ءسپانالى سەرىك پەن شەرحانتانۋشى، جازۋشى شىعارماشىلىعى بويىنشا رەسپۋبليكالىق عىلىمي جوبا بايقاۋىندا «ۇزدىك جوبا» بويىنشا جەڭىمپاز اتانعان التىنبەك قىزى التىناي ءسوز الىپ، بۇگىنگى كۇن ءاربىر زيالى قاۋىم وكىلى ءۇشىن ءبىر تەبىرەنەتىن كۇن ەكەندىگىن، جازۋشىنىڭ وزدەرىنە اماناتتاعان ۇلتتىق رۋحىمىزدى بيىك ۇستاۋ ۇلكەن ازاماتتىق مىندەت ەكەندىگىن اتاپ ايتتى.
وسىلايشا دالامەن ۇندەسىپ، بابامەن تىلدەسىپ، جاڭامەن ۇيلەسىپ، سانامەن كۇن كەشىپ ءوز بيىگىنە جەتكەن، حالقىنا ارقا سۇيەپ، قايسار بولعان قازاقتىڭ شەراعاسىن ەسكە الۋ كەشى ستۋدەنتتەر مەن وقۋشىلارعا، پروفەسسور-وقىتۋشىلار قۇرامىنا، كەش قوناقتارىنا ۇلكەن رۋحاني ازىق بولدى.
