«قىس شاناڭدى جاز سايلا» دەيدى قازاق دانالىعى. راسىندا قىس قىر استىندا. وسى كەزەڭدە توتەنشە جاعدايلار جيىلەپ كەتەتىنى بەلگىلى. اسىرەسە قار باسقان اۋىلدار مەن تايعاق جولداعى اپاتتار قوس بۇيىردەن قىساتىنى بار. وسى قىس مەزگىلىنە ءقازىر قانداي ساقتىق جۇمىستارى جۇرگىزىلۋدە. بۇل جايىندا جامبىل وبلىستىق توتەنشە جاعدايلار دەپارتامەنتىنىڭ باسشىسى باعدات دانيلوۆ ايتىپ بەردى دەپ جازادى Qamshy.kz اقپارات اگەنتتىگى. 

- قىستىڭ تاۋقىمەتى وڭاي ەمەس. اسىرەسە وبلىس شەڭبەرىندەگى ءتورت اسۋدىڭ جايى جىلدا الاڭداتادى. وبلىس ورتالىعىنا ءتيىپ تۇرعان كۇيىك اسۋىنىڭ وزىندە كولىك كەپتەلەسى ورىن العاندا حالىقتىڭ نارازىلىعىنا ۇشىرايمىز. وزدەرىڭىز بىلەسىزدەر «باتىس ەۋروپا-باتىس جۇڭگو» ءاتودالىزى اشىلعالى بەرى اتالمىش جول بويىمەن اعىلعان كولىكتەردىڭ قاراسى كوبەيدى. قىس مەزگىلىندە وسى جول بويىمەن قاتىناس قيىنداي تۇسكەن تۇستا، ءبىز كۇيىك اسۋىن جابۋىمىزعا تۋرا كەلەدى. الايدا وسى ساقتىق شاراسىنا كوپ جۇرگىزۋشىلەر تۇسىنىكپەن قاراماي، شاعىمىن وزىمىزگە قارشا بوراتادى. ارينە ولاردى دا تۇسىنەمىز. ءبىراق ەگەر ءبىز قار باسقان جولدى تازالانعانشا جاپپاساق ادام ومىرىنە ءقاۋىپ ءتونۋى مۇمكىن. وسىنى ويلاپ ءبىز قىس ايىندا «قازاۆتاجول» مەكەمەسىمەن بىرىگىپ، جولاۋشىلارعا ارنالعان جىلىتۋ بەكەتتەرىنىڭ قىزمەتىن ىسكە قوسىپ جاتىرمىز. ودان بولەك، بەتون بەتىنە قاتقان مۇزدى ەرىتۋ ءۇشىن تۇز ارالاسقا قۇم سىندى ينەرتتى زاتتار ازىرلەنۋدە. بۇل جۇمىستاردىڭ بارلىعى 4-5 قاراشا ارالىعىندا وتەتىن رەسپۋبليكالىق «قىس-2020» وقۋ-جاتتىعۋ جيىنىندا تاعى پىسىقتالادى. جانە ءبىلىم، دەنساۋلىق ساقتاۋ سالاسىنا قاراستى مەكەمەلەردى جىلىتۋ ماۋسىمىنا دايىنداپ، توتەنشە جاعدايسىز قىستان امان الىپ شىعۋ جاعى دا وبلىس اكىمىنىڭ جانىنان قۇرىلعان كەڭەستە قارالماق. وسىلايشا ءبىز وزىمىزگە تيەسىلى مىندەتتى ءمىنسىز ورىنداۋعا كۇش سالىپ، قىسقا دايىندىقتى قارقىندى جۇرگىزۋدەمىز، - دەيدى باعدات جۇما ۇلى.

ارينە بيىل قىس قالاي بولاتىندىعىن ەشكىم ءدوپ باسىپ ايتا المايدى. الايدا قاراشانىڭ قارا سۋىعى كەلدى دەگەنشە، قىلىشىن سۇيرەتىپ كارى قۇدا قىس تا تورگە شىعاتىنى بەلگىلى. سوندىقتان جىلىتۋ ماۋسىمىنا دايىندىق شارالارىن قازىردەن باستاپ، كەز كەلگەن جاعدايعا دايىن بولعانىمىز ابزال. سوندا عانا قارا حالىقتىڭ ۇيقىسى تىنىش، ەل-جۇرتتىڭ اماندىعى بولماق. ەڭ باستىسى حالىقتىڭ اماندىعى مەن ءومىرى.