وزبەكستان مەملەكەتىنىڭ استاناسى تاشكەنت قالاسىندا سامبو كۇرەسىنەن جاستار مەن جاسوسپىرىمدەر اراسىندا تۇندىگىن تۇرگەن الەم چەمپيوناتىنان جەرلەستەرىمىز ولجالى ورالدى. بايراقتى باسەكەدە ءۇش بىردەي ورەنىمىز جۇلدەگەرلەر قاتارىنان كورىنىپ، مەرەيىمىزدى ۇستەم ەتتى، دەپ جازادى Qamshy.kz اقپارات اگەنتتىگى. اتاپ ايتساق، ارقات انۋاربەك التىننان القا تاقسا، قوس قايسار قىزىمىز راۋزا نۇرماحاممەتوۆا مەن ەليزات ايازبەك قولا مەدالمەن قۋانتتى. جەڭىمپازدارىمىزدى كەشە وبلىس اكىمدىگى دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆ، م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ باستاعان جامبىلدىق جانكۇيەرلەر ىستىق ىقىلاسپەن قارسى الىپ، قۇرمەت كورسەتتى.
«جاستار» الەياسىندا وتكەن شارادا باسقارما باسشىسى نۇربول ءابدىماجيت ۇلى جامپوزدارىمىزدى جەڭىستەرىمەن قۇتتىقتاپ، الداعى ۋاقىتتا دا تولايىم تابىستارعا كەنەلە بەرۋلەرىنە تىلەكتەستىك ءبىلدىردى. سونداي-اق تارمۋ رەكتورى ماحمەتعالي سارىبەكوۆ تە سپورتشىلارعا دەگەن ىزگى تەلىگىن جەتكىزىپ، وسىنداي تولاعايلار تارمۋ قابىرعاسىنان تۇلەپ ۇشىپ جاتقانى بۇكىل ءبىلىم ورداسىنا ابىروي ەكەنىن ايتتى.
ءوز كەزەگىندە ءوڭىر ماقتانىشتارى جانكۇيەرلەردىڭ قولداۋلارىنا دەگەن العىستارى شەكسىز ەكەندەرىن جانە الداعى دودالاردا دا دارا شابۋىعا كۇش سالاتىندارىنا ۋادە ەتتى.
ايتا كەتەيىك، بۇل الەم چەمپيوناتىندا وزگە ءوڭىردىڭ اتىنان ونەر كورسەتىپ جۇرسە دە، جامبىل اۋدانى، قاراكەمەر اۋىلىنىڭ تۋماسى، جەرلەسىمىز جانسەرىك جۇماباي دا قولا مەدال يەلەنىپ، مەرەيىمىزدى تاسىتتى.
ەستەرىڭىزدە بولسا، ءبىر اي بۇىرىن قارشاداي قىزىمىز ەليزات ايازبەك ءۇندىستان مەملەكەتىندە اتوي سالىپ، ازيا چەمپيونى اتانعان بولاتىن.
2001 جىلى جامبىل وبلىسى تالاس اۋدانى اققۇم اۋىلىندا دۇنيەگە كەلگەن قاراكوزىمىزدى جانكۇيەرلەر «اققۇمنىڭ التىن قىزى» دەپ اتاپ كەتكەن-دى. قازىرگى تاڭدا تاراز مەملەكەتتىك پەداگوگيكالىق ۋنيۆەرسيتەتىندە ءبىلىم الىپ جاتقان ەليزات تاراز قالاسىنداعى №7 بالالار-جاسوسپىرىمدەر سپورت مەكتەبىندە شىنىعۋدا. «التىن قىزىمىزدىڭ» الار اسۋى ءالى الدا دەپ سەنەمىز. جارايسىڭدار جامبىلدىق جامپوزدار. جەڭىستى جورىقتارىڭ جالعاسا بەرگەي. جۇلدەلەرىڭىزبەن شىن جۇرەكتەن قۇتتىقتايمىز! بيىكتەي بەرىڭىزدەر، ءوڭىر مەن مەملەكەت نامىسىن اسقاقتاتۋلارىڭىزعا تىلەكتەسپىز.
