قۇتقارۋشىلار كۇنى كاسىبي مەرەكەسى قارساڭىندا جامبىل وبلىسىنىڭ بۇقارالىق اقپارات قۇرالدارى وكىلدەرىنىڭ قاتىسۋىمەن تاراز قالاسى №1 مامانداندىرىلعان ءورت ءسوندىرۋ ءبولىمىنىڭ اۋماعىندا «ءورت ءسوندىرۋ كۆەستى» ءوتتى، دەپ جازادى Qamshy.kz اقپارات اگەنتتىگى. 

مۇنداعى ماقسات تىلشىلەر قاۋىمىن ءورت ءسوندىرۋ كاسىبىنىڭ قىر-سىرىمەن جەتە تانىستىرىپ، تاجىريبەلىك تۇرعىدا كورسەتۋ، سونداي-اق وت جاۋىنگەرى وزدەرىنىڭ قىزمەتتىك مىندەتتەرىن اتقارۋ بارىسىندا قانداي قيىندىقتارمەن بەتبە-بەت كەلۋى ىقتيمال ەكەندىگىن شاعىن دا بولسا تاجىريبەمەن كورسەتۋ بولىپ تابىلادى.

اتالعان ءورت ءسوندىرۋ ءبولىمنىڭ باستىعى، ازاماتتىق قورعاۋ مايورى اسقار قۋانىشبەك ۇلى بازاربايەۆ باستاعان جەكە قۇرام كەلگەن قوناقتاردى ىقىلاسپەن كۇتىپ الىپ، ب ا ق وكىلدەرىنە جامبىل وبلىستىق گارنيزونىنىڭ ماقتاۋلى ءبولىمىنىڭ جاۋىنگەرلىك بولىمىنە ەكسكۋرسيا ۇيىمداستىرىلدى. ودان ءارى ولار «ءورت ءسوندىرۋ كۆەستىنىڭ» «جيىن جانە دابىل بويىنشا شىعۋ» ءبىر كەزەڭىنە ءوتتى. جاۋىنگەرلىك كيىمنىڭ ستاندارتتى جيىنتىعى ارنايى ىڭعايعا كەلىتىرىلىپ قويىلدى. مىنە وسىلايشا شۇعىل كيىپ كەتۋگە ىڭعايلاپ قويىلعان شلەم، وتقا ءتوزىمدى كۇرتەشە مەن قالىڭ شالبارلاردىڭ اپ-ساتتە-اق كيىلۋىنىڭ سىرى وسىندا بولىپ تابىلادى. ال مۇنان سوڭ بالتا مەن كارابين ىلىنگەن بەلبەۋ تاعىلدى. مىنە وسىمەن ءبارى دايىن.

ال ءتىلشى-قۇتقارۋشىلار ودان ءارى «جاۋىنگەرلىك قانات جايۋ» دەپ اتالاتىن ەكىنشى كەزەڭىنە دە ءوتتى. قانات جايۋ ءادىسى وت جاۋىنگەرلەرى ەمەس، قاراپايىم تىلشىلەر اتقاراتىندىعىنا قاراماستان بارلىق نورمالارى قاتاڭ ساقتالىپ وتكىزىلدى. وسىلايشا سالا قوناقتارى جەڭ جولاعىن تارتىپ، ەكى ءورت وقپانىنان سۋ بەردى. بەلگىلى باعىتقا اتىلعان سۋ ەكپىنىنە كۋا بولعان ب ا ق وكىلدەرىنىڭ قۋانىشىندا شەك بولمادى. اتالعان ارەكەت ولارعا ەرەكشە جاۋىنگەرلىك رۋح پەن كۇش-قۋات سىيلاعانداي اسەردە بولدى.

ءبولىم باستىعى اسقار قۋانىشبەك ۇلى تىلشىلەرگە ودان ءارى اجەپتەۋىر ەنتىگىپ، شارشاڭقىراي باستاعان تىلشىلەردى شارانىڭ ءۇشىنشى كەزەڭى «جىلۋ ءتۇتىن كامەراسىنا» باستاپ باردى. ءوز كەزەگىندە قىزىل ءسوزدىڭ مايىن تامىزاتىن ماماندار ەكى كومانداعا ءبولىنىپ، اتالمىش جايعا باس سۇعىپ، تۇتىنمەن بەتپە-بەت ايقاسىپ، لابيرينت اراسىنان زارداپ شەگۋشىنى ىزدەۋگە كىرىستى. قالاي دەگەنمەن جىلۋ ءتۇتىن كامەراسىنىڭ ءلابيرينتى ب ا ق وكىلدەرى ءۇشىن ۇلكەن سىناق بولدى. تۇتىنگە تولى شيىر جولداردان ءوتىپ، فينيشكە جەتىپ، سىرتقا شىعۋ باقىتى بارىنە بىردەي بۇيىرا قويعان جوق.

وسىلايشا تاماشا ۇيىمداستىرىلعان شاراعا جۋرناليستەر قاۋىمى العىستارىن ءبىلدىرىپ، قۇتقارۋشىلاردىڭ قىزمەتىنىڭ قيىن دا، اۋىرتپالىعىن جون تەرىمەن سەزىنگەندەرىن ايتتى.