بۇگىندە ەلىمىزدە بۇقارالىق سپورتتى دامىتۋعا باسا نازار اۋدارىلۋدا. مەملەكەت باسشىسى قاسىم-جومارت توقايەۆتىڭ «سىندارلى قوعامدىق ديالوگ-قازاقستان تۇراقتىلىعى مەن وركەندەۋىنىڭ نەگىزى» اتتى جولداۋىندا دا بۇل سالاعا ايرىقشا باسىمدىق بەرىلدى.

قازىرگى تاڭدا جامبىل وبلىسىندا دا بۇل باعىتتا ناتيجەلى جۇمىستار اتقارىلۋدا. سول قاتاردا جامبىل اۋدانىندا دا تىندىرىمدى تىرلىكتەر تىكتەلۋدە. اتالمىش ايماقتا سپورت سالاسى جىلدان جىلعا قارقىندى دامۋ ۇستىندە.

جامبىل اۋدانى اكىمدىگىنىڭ دەنە شىنىقتىرۋ جانە سپورت بولىمىنە جەرگىلىكتى بيۋدجەتتەن 2017 جىلعا جالپى 7710،0 مىڭ تەڭگە بولىنگەن بولاتىن. ونىڭ ىشىندە ۇلتتىق جانە بۇقارالىق سپورت تۇرلەرىن دامىتۋعا 2210،0 مىڭ تەڭگە قارالسا، اۋداندىق دەڭگەيدەگى سپورتتىق جارىستار وتكىزۋگە 2500،0 مىڭ تەڭگە ءبولىندى. ال ءارتۇرلى سپورت تۇرلەرى بويىنشا اۋدان قۇراما كوماندالارىنىڭ مۇشەلەرىن دايىنداۋ جانە ولاردىڭ وبلىستىق سپورت جارىستارىنا قاتىسۋى ءۇشىن 3480،0 مىڭ تەڭگە ءبولىنىپ، يگەرىلدى.

سالاماتتى ءومىر سالتىن ناسيحاتتاۋ، بۇقارالىق سپورتتى دامىتۋ بارىسىندا 2017 جىلى 204 ءىس-شارا وتكىزىلىپ، 30114 ادام قامتىلدى.

ناتيجەلى جۇمىستار 2018 جىلى دا لايىقتى جالعاسىن تاپتى. جامبىل اۋدانى اكىمدىگىنىڭ دەنە شىنىقتىرۋ جانە سپورت ءبولىمىنىڭ باسشىسى ق.ەرجىگىتوۆ ۇسىنعان مالىمەتكە سايكەس، وڭىردە بارلىعى 153 سپورتتىق عيمارات قىزمەت كورسەتتى. ونىڭ ىشىندە: 1 ورتالىق ستاديون، 1 سپورت كەشەنى، 1 يپپودروم، 8 اتقىشتار ءتيرى، 79 سپورت الاڭشالارى، 29 فۋتبول الاڭدارى، 33 سپورت زالدارى جانە 1 دەنە تاربيەسى جانە سپورتپەن شۇعىلداناتىن بولمە ەلدىڭ يگىلىگىنە جارادى.

بىلتىر سونىمەن قاتار اۋدان كولەمىندە دەنە شىنىقتىرۋ جانە سپورتپەن جۇيەلى تۇردە 23825 ادام شۇعىلداندى. بۇل كورسەتكىش اۋدان تۇرعىندارىنىڭ جالپى سانىنا ەسەپتەگەندە، 28،8%-دى قۇرادى.

بالالار مەن جاسوسپىرىمدەردىڭ جالپى سانىنان بالالار مەن جاسوسپىرىمدەر سپورت مەكتەپتەرىندە جانە اۋلا كلۋبتارىنداعى دەنە شىنىقتىرۋمەن جانە سپورتپەن اينالىساتىن 7 مەن 18 جاس ارالىعىنداعى بالالار مەن جاسوسپىرىمدەردىڭ قامتىلعانى 11،5 پايىزدى قۇرادى.

وتكەن جىلى اۋدانعا قاراستى اسا اۋىلىنداعى بالالار مەن جاسوسپىرىمدەر سپورت مەكتەبىندە 952 بالا سپورتتىڭ 12 تۇرىمەن شۇعىلداندى. بۇل بالالارمەن 31 جاتتىقتىرۋشى-وقىتۋشى سپورتتىڭ قازاق كۇرەسى، دزيۋ-دو، سامبو، ەركىن كۇرەس، بوكس، جارتاسقا ورمەلەۋ، باسكەتبول، جەڭىل اتلەتيكا، گرەك-ريم كۇرەسى، قۇسبەگىلىك، ۆولەيبول جانە فۋتبولمەن جۇمىس جاساعانىن ايتا كەتكەن ءجون.