بۇقارالىق سپورتتى دامىتۋ-ەلباسى ن.نازاربايەۆ ايقىنداپ بەرگەن باستى باسىمدىقتاردىڭ ءبىرى. بۇل تۇرعىدا جامبىل وبلىسىنداعى جامبىل اۋدانىندا دا جەمىستى جۇمىستار جەتەرلىك. اسىرەسە، 2017 جىلدان بەرى قاراي بۇل باعىتتاعى جۇمىستار قارقىن الا تۇسكەن. مىسالى، سول جىلدىڭ وزىندە اۋداندا بارلىعى 151 سپورتتىق عيمارات حالىققا قىزمەت كورسەتتى. ونىڭ ىشىندە 1 ورتالىق ستاديون، 1 سپورت كەشەنى، 1 يپپودروم، 8 اتقىشتار ءتيرى، 77 سپورت الاڭشالارى، 29 فۋتبول الاڭدارى، 33 سپورت زالدارى جانە 1 دەنە تاربيەسى جانە سپورتپەن شۇعىلداناتىن بولمە ەلدىڭ يگىلىگىنە جارادى. بۇل نىسانداردىڭ بارلىعى اۋدان اۋماعىنداعى ەلدى مەكەندەردە ورنالاسقان.

2017 جىلعى مالىمەت بويىنشا اۋدان كولەمىندە دەنە شىنىقتىرۋ جانە سپورتپەن جۇيەلى تۇردە 22859 ادام شۇعىلداندى. بۇل كورسەتكىش اۋدان تۇرعىندارىنىڭ جالپى سانىنا (81347 ادام) ەسەپتەگەندە، 28،1 پايىزدى قۇرادى.

بالالار مەن جاسوسپىرىمدەردىڭ جالپى سانىنان بالالار مەن جاسوسپىرىمدەر سپورت مەكتەپتەرىندە جانە اۋلا كلۋبتارىنداعى دەنە شىنىقتىرۋمەن جانە سپورتپەن اينالىساتىن 7 مەن 18 جاس ارالىعىنداعى بالالار مەن جاسوسپىرىمدەردىڭ قامتىلعانى 11،2 پايىزدى مەجەلەدى.

ەسەپتى كەزەڭدە اۋدانعا قاراستى اسا اۋىلىنداعى بالالار مەن جاسوسپىرىمدەر سپورت مەكتەبىندە 1044 بالا سپورتتىڭ 12 تۇرىمەن شۇعىلداندى. بۇل بالالارمەن 31 جاتتىقتىرۋشى-وقىتۋشى سپورتتىڭ قازاق كۇرەسى، دزيۋ-دو، سامبو، ەركىن كۇرەس، بوكس، جارتاسقا ورمەلەۋ، باسكەتبول، جەڭىل اتلەتيكا، گرەك-ريم كۇرەسى، قۇسبەگىلىك، ۆولەيبول جانە فۋتبول بويىنشا جۇمىس جاسادى.

جالپى، تۇركسىب اۋىلىنداعى بالالار مەن جاسوسپىرىمدەر سپورت مەكتەبىندە 504 بالا سپورتتىڭ 6 تۇرىنەن جاتتىعادى، بۇل بالالارمەن 16 جاتتىقتىرۋشى-وقىتۋشى بوكس، دزيۋ-دو، گرەك ريم كۇرەسى، قازاق كۇرەسى، كيكبوكسينگ، ەركىن كۇرەس، شاحماتتان جۇمىس اتقارادى.

سالاماتتى ءومىر سالتىن ۇستانۋ باعىتىندا اۋدانداعى مەكەمە قىزمەتكەرلەرى مەن اۋىل جاستارى كەشكى مەزگىلدە اپتاسىنا ەكى رەت اۋىلدىق وكرۋگ ايماقتارىنداعى ورتا مەكتەپتەردىڭ سپورت زالدارىندا ۆولەيبولمەن، باسكەتبولمەن، اۋدان ايماعىنداعى ەكى بالالار مەن جاسوسپىرىمدەر سپورت مەكتەپتەرىنىڭ زالدارىندا، جاستار ورتالىعىنداعى ترەناجەر زالى مەن اۋىلدىق وكرۋگتەردەگى كىشى فۋتبول الاڭدارىندا جاتتىعىپ وتىرادى. بۇل تۇرعىدا كەستە بويىنشا 17 اۋىلدىق ايماقتاعى 48 سپورتتىق نىساندار قىزمەت كورسەتتى. وسى باعىتتاعى جۇمىستار جىلدان جىلعا جاندانىپ، كورسەتكىشتەر دە ەسەلەنىپ كەلەدى.