جاسىل جەلەك – جانعا سايا. تابيعاتتى ايالاۋ، قورشاعان ورتاعا جاناشىرلىق كوزقاراس تانىتۋ ادامزاتتىڭ باستى بورىشتارىنىڭ ءبىرى سانالادى. سوڭعى جىلدارى عالامدىق ەكولوگيانىڭ شەكتەن تىس بۇزىلۋىنا بايلانىستى اعاش ەگۋ جۇمىستارى قولعا الىنىپ، سول ارقىلى قورشاعان ورتانىڭ اۋاسىن تازارتۋ شارالارى جۇرگىزىلىپ جاتقانى بەلگىلى. ەكولوگياعا پايدالى مۇنداي جۇمىستار ءبىزدىڭ اۋليەاتا وڭىرىندە دە قارقىندى قولعا الىنىپ وتىر. ونىڭ ىشىندە، جۋالى جەرىنىڭ تابيعاتى اعاش ەگۋگە ەڭ قولايلى ايماق بولىپ سانالادى.

جاقىندا اۋدان اۋماعىندا رەسپۋبليكالىق اعاش ەگۋ اكسياسى اياسىندا سەنبىلىك ۇيىمداستىرىلدى. كوگالداندىرۋعا باعىتتالعان سەنبىلىككە جامبىلدىقتار دا بەلسەنە اتسالىستى. شاراعا وبلىس باسشىسى اسقار مىرزاحمەتوۆ باستاعان بارلىق ورىنباسارلارى، اۋدان اكىمدەرى، باسقارما باسشىلارى، ارداگارلەر كەڭەسى جانە وزگە دە ۇيىمدار مەن قوعامدىق بىرلەستىكتەردىڭ ءتوراعالارى مەن وكىلدەرى قاتىستى.

وبلىس بويىنشا بارلىعى 18466 ادام 18880 كوشەت وتىرعىزدى. ونىڭ ىشىندە، قاراعاي، شىرشا، قاراعاش، ارشا، تەرەك، ەمەن، شەتەن، ايلانت سەكىلدى اعاش تۇرلەرى بار. سەنبىلىك وڭىردەگى 98 ەلدىمەكەندى قامتىدى.

ايتا كەتەيىك، ايماق باسشىسى اسقار مىرزاحمەتوۆ تال ەگۋ اكسياسىنا وبلىستىڭ شالعاي اۋدانى – مويىنقۇمنان قاتىستى. وندا مويىنقۇمدىق جاستار مەن قىزمەتكەرلەرمەن بىرگە «جاز اتا»، «جاسىل ەل» ساياباقتارىنا تال ەگىپ، شاراعا قارقىندى ۇلەس قوستى. اتالعان اكسيا اياسىندا وبلىس اكىمى اسقار مىرزاحمەتوۆ جانە مويىنقۇم اۋدانى اكىمى مادەن مۇسايەۆ تۋيا، ەمەن، تەرەك اعاشتارىن وتىرعىزىپ، يگى ءىستىڭ ماڭىزدىلىعىن تۋرالى توقتالىپ ءوتتى.

سەنبىلىككە جۋالىلىقتار دا بەلسەنە اتسالىستى. ونىڭ اياسىندا اۋدان ورتالىعىنداعى جانە وعان جاقىن ورنالاسقان اۋىلدىق وكرۋگتەردەگى ساياباقتارعا اعاش كوشەتتەرى وتىرعىزىلدى. ايتا كەتۋ كەرەك، سەنبىلىك جۇمىستارىنا اۋدان اكىمى نارباي ەرگەبەكوۆ، اۋدان اكىمىنىڭ ورىنباسارلارى، اۋداندىق ءماسليحات، قوعامدىق كەڭەستىڭ قىزمەتكەرلەرى بەلسەنە قاتىستى.

اتاپ ايتقاندا، سەنبىلىككە قاتىسۋشىلار اۋدان ورتالىعىنىڭ ەڭ كورىكتى ورىندارى سانالاتىن داڭقتى قولباسشى باۋىرجان مومىش ۇلى ەسكەرتكىشىنىڭ اينالاسىنا، «جاساي بەر، قازاقستان!» ساياباعىنا، جاستار اللەياسىنا، سونىمەن بىرگە قايرات اۋىلىنداعى باۋىرجان مومىش ۇلى اتىنداعى ساياباققا تەرەك، قارااعاش جانە وزگە دە اعاشتاردىڭ جاس كوشەتتەرى ەگىلدى. رەسپۋبليكالىق اكسيا اياسىنداعى جۇمىستار ۇيىمشىلدىقپەن وتكىزىلدى. اعاش ەگۋ جۇمىستارىنىڭ بارىسىن اۋدان اكىمى نارباي ەرگەبەكوۆ قاداعالاپ، ءوزى دە باۋىرجان مومىش ۇلى اتىنداعى ساياباققا كوشەتتەر وتىرعىزدى. اۋدان باسشىسى سەنبىلىككە قاتىسۋشىلارعا قورشاعان ورتانىڭ احۋالىنا، ەكولوگيالىق ماسەلەلەرگە اعاش ەگۋ ارقىلى ۇلەس قوسۋعا بولاتىنىن ايتتى.