جۋالى اۋدانىندا بىرنەشە پاتەر توناۋعا قاتىسى بار باۋكەسپە قولعا ءتۇستى. بۇل تۋرالى اۋداندىق پوليسيا ءبولىمىنىڭ باستىعى، پوليسيا پودپولكوۆنيگى مەرگەنباي قويكەنوۆ مالىمدەدى.

اۋداننىڭ باس پوليسەيىنىڭ ايتۋى بويىنشا، وتكەن جىلمەن سالىستىرعاندا، اۋداندىق پوليسيا ءبولىمىنىڭ جەكە قۇرامىنىڭ جەدەل ارەكەت ەتۋىنىڭ ارقاسىندا بيىلعى جىلى اۋداندا بوتەننىڭ مۇلكىن ۇرلاۋ، سونىڭ ىشىندە مال جانە پاتەر ۇرلىعى ازايىپ، اشىلۋ كورسەتكىشى دە ءبىرشاما جاقسارىپ وتىر ەكەن.

– اۋداندىق پوليسيا بولىمىندە جىل باسىنان بەرى 21 پاتەر ۇرلىعى دەرەگى تىركەلسە، وتكەن توعىز ايدىڭ ىشىندە ونىڭ 16-سى اشىلدى. بۇل دەرەكتەر بويىنشا قىلمىستىق ءىس قوزعالىپ، ءبولىم قىزمەتكەرلەرى تاراپىنان جەدەل-ىزدەستىرۋ شارالارى جۇرگىزىلۋدە. سونىڭ ناتيجەسىندە مىنە، تاياۋدا كۇدىكتى ت. ەسىمدى ازامات قۇرىقتالدى. بۇگىنگى تاڭدا ونىڭ التى بىردەي پاتەر ۇرلىعىنا قاتىسى بار ەكەنى بەلگىلى بولدى. ايتا كەتەرلىگى، ول قىلمىستىڭ وسى تۇرىمەن بۇعان دەيىن دە اينالىسىپ، سوتتى بولعان. كەلتىرىلگەن بۇلتارتپاس دالەلدەردىڭ ارقاسىندا ول پاتەر ۇرلىعىنا قاتىسى بارىن مويىندادى. ءقازىر ول قاماۋعا الىندى. ق ر قك 188-بابىمەن («ۇرلىق») قىلمىستىق ءىس قوزعالىپ، سوتقا دەيىنگى تەرگەۋ امالدارى جۇرگىزىلۋدە، – دەيدى م. قويكەنوۆ.

اۋداندا وتكەن جىلدىڭ سايكەس كەزەڭىنە قاراعاندا مال ۇرلىعى دەڭگەيى دە ەكى ەسەگە دەرلىك تومەندەگەن. ماسەلەن، 2018 جىلدىڭ توعىز ايىندا مال ۇرلىعى 27 دەرەكتى قۇراسا، بيىلعى جىل باسىنان بەرى 13 دەرەك تىركەلىپ، بۇگىندە ونىڭ تەڭ جارتىسى اشىلعان. قالعان دەرەكتەردىڭ اشىلۋىمەن جۇمىستار جۇرگىزىلۋدە ەكەن.

كورسەتكىشتەردىڭ جوعارىلاۋىنا ءتارتىپ ساقشىلارىنىڭ تەحنيكالىق بازاسىنىڭ جاقسارۋى سەپ بولىپ وتىر ەكەن. اتاپ ايتقاندا، وبلىستىق پوليسيا دەپارتامەنتى مەن اۋدان اكىمدىگىنىڭ قولداۋىمەن بيىل جازدا بارلىق اۋىلدىق وكرۋگتەردەگى ۋچاسكەلىك پوليسيا ينسپەكتورلارى كولىكتى بولعان. ولارعا 15 دانا سۋ جاڭا «نيۆا» ماركىلى قىزمەتتىك اۆتوكولىك بەرىلدى، قىزمەتتىك ءۇي-جايلارى ءتيىستى تالاپتارعا سايكەستىككە كەلتىرىلۋدە.

– ودان بولەك، پوليسيا قىزمەتكەرلەرىنىڭ كۇندەلىكتى جۇمىسىن اقپاراتتىق قولداۋ ماقساتىندا جانە جۇمىستا قولدانۋ ءۇشىن وبلىستىق پوليسيا دەپارتامەنتى التى قىزمەتتىك پلانشەت بەردى. بۇل قۇرىلعىلار اكىمشىلىك قۇقىق بۇزۋشىلىق فاكتىسى انىقتالعان جاعدايدا، حاتتامانى سول جەردە تولتىرىپ، قۇقىق بۇزۋشى ازاماتقا بۇرىن-سوڭدى حاتتاما جازىلعانىن تەكسەرە الادى. وسى پلانشەتكە قوسا الداعى 2020 جىلعى اۋدان بيۋدجەتىنە ءار پوليسيا ينسپەكتورلارىنا كەۋدەسىنە تاعىپ جۇرەتىن شاعىن ءتۇسىرۋ كامەراسىن الدىرۋ جوسپارلانۋدا. بۇل كامەرا دا قىلمىستى نەمەسە اكىمشىلىك قۇقىق بۇزۋشىلىق فاكتىسىن جەدەل تىركەپ، داۋلى ماسەلەلەر تۋىنداعان جاعدايدا تاپتىرماس ايعاق قۇرالى بولماق، – دەيدى پوليسيا ءبولىمىنىڭ باستىعى.