قازتەست جۇيەسى – قازاقستان رەسپۋبليكاسىنداعى ازاماتتاردىڭ مەملەكەتتىك ءتىلدى مەڭگەرۋ دەڭگەيىن باعالاۋ جۇيەسى. قازتەست جۇيەسى حالىقارالىق تىلدىك ءبىلىمدى باعالاۋدىڭ TOEFL، IELTS جانە تاعى دا باسقا جۇيەلەرىنىڭ قاعيداتتارىنا نەگىزدەلگەن. قازتەست جۇيەسىنىڭ قۇرىلىمى ءتورت بولىكتەن تۇرادى: تىڭدالىم، لەكسيكا-گرامماتيكالىق بولىك، وقىلىم، جازىلىم.

قازاقستان رەسپۋبليكاسى ءبىلىم جانە عىلىم مينيسترلىگىنە قاراستى «ۇلتتىق تەستىلەۋ ورتالىعى» رەسپۋبليكالىق مەملەكەتتىك قازىنالىق كاسىپورنىنىڭ ۇيىمداستىرۋىمەن وبلىس كولەمىندە «قازتەست» دياگنوستيكالىق تەستىلەۋ ءوتتى.

تەست تاپسىرۋ جۋالى اۋدانىندا №15 مەكتەپ-ليسەي بازاسىندا ۇيىمداستىرىلدى. وعان ءارتۇرلى سالادان 140 مەملەكەتتىك جانە بيۋدجەتتىك قىزمەتشىلەر قاتىستى. تەستىلەۋدى «ۇلتتىق تەستىلەۋ ورتالىعى» رەسپۋبليكالىق مەملەكەتتىك قازىنالىق كاسىپورنىنىڭ تەستىلەۋدى ۇيىمداستىرۋ عىلىمي ادىستەمەلىك زەرتحاناسىنىڭ اعا ساراپشىسى نۇربەك نۇرىمبەتوۆ اشىپ، قاتىسۋشىلارعا تەست تالاپتارىن ءتۇسىندىردى.

– قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا: «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ، ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن.

ءبىراق مۇنداي دارەجەگە جەتۋ ءۇشىن ءبارىمىز داڭعازا جاساماي، جۇمىلا جۇمىس جۇرگىزۋىمىز كەرەك» – دەگەن بولاتىن پرەزيدەنتىمىزدىڭ تاپسىرماسىنا وراي قازتەست بارلىق سالاعا قارقىندى ەنگىزىلىپ، بارلىق وبلىستاردا تاپسىرىلۋدا.

قازتەست ەكى باعىتتان تۇرادى: ءبىرىنشىسى- دياگنوستيكالىق؛ ەكىنشىسى – سەرتيفيكاتتىق تەستىلەۋ. بۇگىن سىزدەرمەن وتكەلى وتىرعان دياگنوستيكالىق تەستىلەۋ ءۇش بولىكتەن تۇرادى. ياعني، تىڭدالىم، لەكسيكا-گرامماتيكالىق جانە وقىلىم. جالپى، 150 تەست سۇراقتارى بار. ونى ورىنداۋعا 150 مينۋت بەرىلگەن.

ناتيجە بەس دەڭگەيدەن تۇرادى: ا1 – قاراپايىم دەڭگەي 31-64 بالل ارالىعى؛ ا2 – بازالىق دەڭگەي 65-104 بالل ارالىعى؛ ۆ1 – ورتا دەڭگەي 105-119 بالل ارالىعى؛ ۆ2 – ورتادان جوعارى دەڭگەي 120-134 بالل ارالىعى؛ س1جوعارى دەڭگەي 135-150 بالل ارالىعى.

قورىتىندىسى تەستىلەنۋشىلەر ناتيجەسى كورسەتىلگەن تىزىمدەمە جانە انىقتاما بولىپ تابىلادى. تەست پاراقشالارى نۇر-سۇلتان قالاسىندا وڭدەلىپ، 15 جۇمىس كۇنى ىشىندە ناتيجەلەرى جولدانادى، – دەدى نۇربەك باتىرحان ۇلى.

تەستتى جۇرگىزۋگە وبلىس اكىمدىگى تىلدەردى دامىتۋ باسقارماسىنىڭ «تىلدەردى وقىتۋ ورتالىعىنىڭ» ماماندارى حافيزا احمەتوۆا مەن شىنار باقىتبەك قىزى جانە اۋداندىق تىلدەردى وقىتۋ ورتالىعىنىڭ قىزمەتكەرلەرى اتسالىستى.