جامبىل وبلىسى توتەنشە جاعدايلار دەپارتامەنتىنىڭ ءورت ءسوندىرۋ قىزمەتىندە جىل سايىن «19 قازان – قازاقستان رەسپۋبليكاسىنىڭ قۇتقارۋشىلار كۇنى» كاسىبي مەرەكەسىنە وراي قىزمەتكەرلەردىڭ بالالارى اراسىندا سۋرەت سالۋدان بايقاۋ ۇيىمداستىرىلىپ كەلەدى. بۇل جىلعى بايقاۋ «ماماندىعى – قۇتقارۋشى» تاقىرىبىندا ءوتتى. بايقاۋ جاريالانعان ساتتەن باستاپ ارادا كوپ ۋاقىت وتپەي مەكەمەگە بالالار تاراپىنان 15 تۋىندى كەلىپ ءتۇستى. بالدىرعانداردىڭ وزدەرى سالعان سۋرەتتەرىنە قاراپ، وزىندىك ايتايىن دەگەن ويلارىن اڭعارۋعا بولادى. دەگەنمەن بىزگە ءمالىم بولعانى قاي بالا بولماسىن اكەسىنىڭ اتقاراتىن قىزمەتىمەن ماقتاناتىندىعىن، ءتىپتى بولاشاقتا اكەلەرىنىڭ جولىن قۋىپ، ولار دا ءورت ءسوندىرۋشى-قۇتقارۋشى بولعىسى كەلەتىندىكتەرىن ايتپاي-اق تۇسىنۋگە بولادى.
سونىمەن قاتار، اتالمىش بايقاۋمەن قاتار پوەتيكالىق بايقاۋدىڭ دا ۇيىمداستىرىلىپ وتكىزىلگەندىگىن اتاپ وتكەن ءجون. ال بۇل بايقاۋ «قۇتقارۋشىلار قاشان دا قۇرمەتكە لايىق» دەپ اتالدى. اتالعان بايقاۋ ءتۇرى بويىنشا قىزمەتكەرلەر مەن ولاردىڭ بالالارى وزدەرىنىڭ قىزمەتتىڭ مارتەبەسىن كوتەرەتىندەي دەڭگەيدەگى شىعارمالارى مەن ولەڭ جولدارىن ۇسىندى. بۇل شارا بارىسىندا ازاماتتىق قورعاۋ سالاسى دا تالانتتاردان قۇرالاقان ەمەس ەكەندىگىن كورسەتتى. بايقاۋ سوڭىندا 8 ولەڭ مەن ەسسەلەر جيناقتالدى.
بايقاۋ ناتيجەسى بەلگىلى بولعان سوڭ، مەكەمەنىڭ وقۋ سىنىبىنا جينالعان قازىلار القاسىنىڭ مۇشەلەرى بايقاۋدى قورىتىندىلادى. وبلىستىق توتەنشە جاعدايلار دەپارتامەنتى مەن ءورت ءسوندىرۋ مەكەمەسىنەن قۇرالعان كوميسسيا مۇشەلەرى ءاربىر تۋىندىمەن بۇگە-شىگەسىنە دەيىن تولىق دەڭگەيدە تانىسىپ، بىرىنەن ءبىرى وتەتىن تۋىندىلارعا لايىقتى باعالارىن بەردى. ايتا كەتكەن ءجون، شالعاي اۋداندارداعى بولىمشەلەردەن كەلە الماعان قىزمەتكەرلەر الەۋمەتتىك جەلى ارقىلى وزدەرىنىڭ ولەڭدەرىن بەينەتاسپاعا ءتۇسىرىپ جولداعان بولاتىن. قازى مۇشەلەرى بەلسەنە قاتىسقان قىزمەتكەرلەر مەن ولاردىڭ بالالارىنا العىستارىن ءبىلدىرىپ، ءتيىستى باعالارىن بەرۋگە كىرىستى.
«ماماندىعى – قۇتقارۋ» سۋرەت بايقاۋى بويىنشا ءى ورىندى تاراز قالاسى №3 ءورت ءسوندىرۋ ءبولىمى قىزمەتكەرىنىڭ بالاسى شاريمحان مانسۋر يەلەندى. ال ءىى ورىندى تاراز قالاسى №4 ءورت ءسوندىرۋ ءبولىمى قىزمەتكەرىنىڭ قىزى ىڭكار كارىباي جەڭىپ الدى. سونداي-اق جۋالى اۋدانى №7 ءورت ءسوندىرۋ ءبولىمى قىزمەتكەرىنىڭ ۇلى ابدۋازيز قادىربەككە جۇلدەلى ءىىى ورىن بۇيىردى. ال شىعارماشىلىق بايقاۋدا ءى ورىندى شۋ اۋدانى، شۋ قالاسى №5 ءور ءسوندىرۋ ءبولىمىنىڭ ءورت ءسوندىرۋشىسى، ازاماتتىق قورعاۋ سەرجانتى ەسەنامان نادىربەك جەڭىپ الدى. ءىى ورىندى تاراز قالاسى №2 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى نۇرعازى بەردىحانوۆ يەلەندى. شۋ اۋدانى، شۋ قالاسى №5 ءورت ءسوندىرۋ ءبولىمىنىڭ قاراۋىل باستىعى، ازاماتتىق قورعاۋ اعا لەيتەنانتى اسىلحان يۋسۋپوۆ ءىىى ورىننان كورىندى.
پىكىر قالدىرۋ