جامبىل وبلىسىنىڭ تابيعي-كليماتتىق جاعدايىن ەسكەرە وتىرىپ، سوڭعى جىلداردا ايماقتا ەنەرگەتيكالىق پوتەنسيالدىڭ جوعارىلىعىنا بايلانىستى، جاڭارتىلاتىن ەنەرگيا كوزدەرىنىڭ كۇن، جەل جانە شاعىن سۋ ەلەكتر ستانسيالارىنىڭ قۇرىلىستارى بەلسىندى جۇرگىزىلۋدە، دەپ جازادى Qamshy.kz اقپارات اگەنتتىگى. اتاپ ايتساق، 2010 جىلى بارلىق جاڭارتىلاتىن ەنەرگيا كوزدەرى نىساندارىنىڭ جالپى قۋاتى شامامەن 1،5-2،0 مۆت بولسا، قازىرگى تاڭدا 10 جەك نىساندارى جالپى 168،7 مۆت قۇراپ وتىر. ونىڭ ىشىندە 4 نىسان سۋ ەلەكتر ستانسياسى جالپى قۋاتى 15،1 مۆت، 3 نىسان جەل ەلەكتر ستانسياسى جالپى قۋاتى 53،1 مۆت جانە 3 نىسان كۇن ەلەكتر ستانسياسى جالپى قۋاتى 100،5 مۆت.

اسىرەسە جۋالى اۋدانىندا ورنالاسقان «بۋرنوە سولار» نىسانىنىڭ 2ء-شى كەزەڭىندەگى جالپى قۋاتى 50 مۆت قۇرايتىن «بۋرنوە سولار -2» نىسانىن سالۋ («Samruk Kazyna-United Green» ج ش س) قۇرىلىسى 2018 جىلدىڭ 4 ماۋسىمدا اياقتالىپ، ىسكە قوسىلدى. جەك-تىن ورناتىلعان جالپى قۋاتى 100 مۆت دەيىن جەتتى.

2018 جىلدىڭ قورىتىندىسى بويىنشا ەلەكتر ەنەرگياسىنىڭ كولەمى 335،9 كۆتساعات نەمەسە جالپى كولەمنىڭ 145 پايىزدى قۇرادى.

2019 جىلى جەك كوزدەرىمەن وندىرىلەتىن ەلەكترەنەرگيانىڭ ۇلەسىن 11،5 پايىزعا دەيىن جەتكىزۋ جوسپارلانۋدا.

بۇدان بولەك جىل باسىندا ينۆەستورلار سارىسۋ اۋدانىندا 100 مۆت –تىق جەل ەلەكتر ستانسيالارىن سالاتىنى مالىمدەلگەن. جوبا بويىنشا 233 گەكتار جەرگە جەلدەن قۋات وندىرەتىن ارنايى قىرىق قوندىرعى ورناتىلماق. ولاردىڭ ءارقايسىنىڭ قۋاتى – 2،5 مۆت قۇرايدى. ستانسيا جىلىنا 350 ميلليون كۆت/ساع ەلەكتر ەنەرگياسىن وندىرەدى دەپ جوسپارلانىپ وتىر. جوبا قۇنى 130 ميلليون اقش دوللارىن قۇرايدى. جوبانىڭ قۇرىلىس جۇمىستارى اعىمداعى جىلى باستالادى دەپ كۇتىلۋدە. قۇرىلىس كەزىندە 200-300 ادام ۋاقىتشا جۇمىسپەن قامتىلادى. ال اتالمىش جوبا ىسكە قوسىلعان سوڭ تۇراقتى تۇردە 30-40 ادام جۇمىسقا ورنالاسادى.

ەلىمىزدىڭ ەنەرگەتيكالىق سەكتورىن ستراتەگيالىق ترانسفورماسيالاۋ اياسىندا جاڭارتىلعان ەنەرگيا كوزىنەن وندىرىلەتىن ەلەكتر ەنەرگياسىنىڭ ۇلەسىن ارتتىرۋ، ەكولوگيالىق تازا ەنەرگيا ءوندىرۋ جانە اتموسفەراعا كومىرقىشقىل گازىنىڭ شىعاندارىن ازايتۋ ماقساتىندا قولعا الىنعان جوبا ءساتتى جۇزەگە اساتىن بولسا، 2020 جىلى قازىناعا ورتاشا ەسەپپەن 8،1 ملرد تەڭگە پايدا تۇسەدى دەپ بولجانىپ وتىر.

ايتا كەتەيىك، جەل ەلەكترلىك ستانسيا – جەلدىڭ كينەتيكالىق ەنەرگياسىن ەلەكتر ەنەرگياسىنا اينالدىراتىن قوندىرعى. ول جەل قوزعالتقىشىنان، ەلەكتر توگى بار گەنەراتوردان، جەل قوزعالتقىشىنىڭ جانە گەنەراتوردىڭ جۇمىسىن باسقاراتىن اۆتوماتتى قوندىرعىدان، ولاردى قۇرۋشى جانە قىزمەت كورسەتۋشى قۇرىلىستارىنان تۇرادى. جەل ەنەرگەتيكالىق ستانسيالاردا جەلسىز كەزەڭگە ارنالعان رەزەرۆتى جىلۋ قوزعالتقىش بولادى.