تەمىر جول – ەكونوميكانىڭ كۇرەتامىرى. ويتكەنى ونىڭ بويىمەن كۇندىز-تۇنى ۇزدىكسىز جۇيتكىگەن پويىزبەن سان مىڭداعان توننا حالىق شارۋاشىلىعى جۇگى مەن مىڭداعان جولاۋشى تاسىمالدانادى. بۇگىندە «قازاقستان تەمىر جولى» ۇلتتىق كومپانياسىنا قاراستى جولدىڭ ۇزىندىعى، كىرمە جولدى قوسپاعاندا، 20 مىڭ شاقىرىمعا تاياۋ ەكەن. سوندىقتان بۇل سالاداعى جۇمىس وتە اۋقىمدى، اسا كۇردەلى. بۇل جۇمىستار دۇرىس ۇيىمداستىرىلسا، مەملەكەتكە قىرۋار تابىس تا اكەلەدى. اسىرەسە ەلىمىز تاۋەلسىزدىك العاننان كەيىن الىس-جاقىن شەتەلدەرمەن الىس-بەرىس كوبەيگەنى بەلگىلى. قازاقستاننىڭ گەوگرافيالىق جاعىنان ءتيىمدى ورنالاسۋى بۇل سالانىڭ دامىتىلۋىنا دا وتە ىڭعايلى، باتىس پەن شىعىستى بايلانىستىراتىن تەمىر جولدار ەل اۋماعىن كوكتەي ءوتىپ جاتىر. وسى ورايدا مەملەكەت باسشىسى ق.توقايەۆ «سىندارلى قوعامدىق ديالوگ-قازاستان تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا تەمىرجول سالاسىن ودان ارى دامىتۋ مىندەتىن ايقىنداپ بەردى.

ارينە، قانداي ماڭىزدى مىندەت بولماسىن بىلىكتى كادرلار ارقىلى جۇيەسىن تابادى. وسى ورايدا جمبىلدىق تەمىرجولشىلاردىڭ دا ەڭبەگى ەرەن. مىنە، سونداي مايتالمان ماماننىڭ ءبىرى بەيسەنباي جاڭبىربايەۆ تەمىرجول سالاسىن دامىتۋ ەل ەكونوميكاسىنىڭ قارقىندى ورلەۋىنە جول اشاتىنىن ايتادى.

«ەلباسىنىڭ سارابدال ساياساتنىڭ ارقاسىندا الىس-جاقىن شەتەلدەرمەن الىس-بەرىس كوبەيگەنى. بۇل تۇرعىدا مەملەكەت باسشىلارى ءوزارا ءتيىمدى كەلىسىمشارت جاساسۋ ارقىلى، اسىرەسە جۇك تاسىمالى كولەمىن كوبەيتتى. ياعني الدىمەن بۇل رەتتە ترانزيتتىك كونتەينەرلەر جۇيەسىنىڭ جۇمىسى جانداندىرىلدى. ءوزىمنىڭ وسى ۇلكەن ءىستىڭ باسى-قاسىندا جۇرگەنىمدى ءارقاشان ماقتانىش ەتەمىن. ونىڭ ىشىندە جۇڭگو تەمىر جولىنىڭ ءۇرىمشى بولىمشەسىمەن ەكى ارالىقتاعى جۇك تاسىمالىن جاقسى جولعا قويۋ جونىندە دە ءتيىمدى جوبالار بار. 2008 جىلدان بەرى قازاقستان بولات جولدىڭ بويىمەن جۇك تاسىمالداۋداعى مۇمكىندىگىن بارىنشا پايدالانىپ، جۇڭگو، تمد، بالتىق، ءتىپتى ەۋروپا ەلدەرىنە دە كەڭ جول اشتى. ءسويتىپ كونتەينەرلىك جۇك پويىزدارى تۇراقتى تۇردە جۇرە باستادى»،-دەيدى ب.جاڭبىربايەۆ.

سونىڭ ىشىندە قىتايدىڭ چۋنسين جانە گەرمانيانىڭ دۋيسبۋرگ قالالارى باعىتتارىنداعى كونتەينەرلىك پويىزداردى قازاقستان اۋماعىمەن ءساتتى وتكىزۋ ىسىنە ونىڭ العاشقى قارلىعاشتارىنىڭ ءبىرى رەتىندە بەيسەكەڭ دە زور ۇلەس قوستى. سونداي-اق ونىڭ «دوستىق» بەكەتىندەگى قىتايمەن جۇك الماسۋ جۇمىسىنا بىلىكتى مامان رەتىندە ارالاسقانىن دا ەشكىم جوققا شىعارا المايدى.