قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ ەگەمەن ەلىمىزدى دامىتۋ باعىتىنداعى مىندەتتەر قاتارىندا كولىك ينفراقۇرىلىمىن دامىتۋ ماسەلەسىن نازاردان تىس قالدىرعان ەمەس. ويتكەنى، جول دا، كولىك تاسىمالى دا ەكونوميكانىڭ وزەگى ىسپەتتەس. راسىندا دا كولىك – ەل ەكونوميكاسىنىڭ ينفراقۇرىلىمىن قالىپتاستىراتىن سالالاردىڭ ءبىرى ءارى بىرەگەيى. ناقتى ءارى ۇزدىكسىز جۇمىس ىستەيتىن كولىكتىك كەشەن بولمايىنشا مەملەكەتتىڭ ەكونوميكاسى ويداعىداي دامي المايدى. بۇل ەڭ الدىمەن، تەمىرجول كولىگىنە قاتىستى، سول ارقىلى حالىقارالىق جانە ايماقارالىق جۇكتەر مەن جولاۋشىلار تاسىمالىنىڭ نەگىزگى بولىگى جۇزەگە اسىرىلادى. «تەمىرجول – ەل ەكونوميكاسىنىڭ كۇرەتامىرى» دەپ سوندىقتان دا بەكەر ايتىلماسا كەرەك.
مەملەكەت باسشىسى قاسىم-جومارت توقايەۆتىڭ قازاقستان حالقىنا ارناعان العاشقى جولداۋىندا دا بۇل ماسەلەگە ايرىقشا نازار اۋدارىلدى. بۇگىندە جامبىل وبلىسىندا دا بۇل تۇرعىدا جەمىستى جۇمىستار اتقارىلۋدا. جامبىل جۇك تاسىمالى بولىمشەسىنىڭ ديرەكتورى بەرىك اقشالوۆتىڭ ايتۋىنشا، جولداۋ جۇكتەگەن مىندەتتەر ءقازىردىڭ وزىندە ىسكە اسرىلۋدا.
«قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا تەمىر جول سالاسىنا توقتالىپ ءوتتى. مەملەكەت باسشىسى تەمىر جول سالاسىنداعى قولدان جاسالاتىن بيلەت تاپشىلىعىن جويۋدى جانە ونى تەز ارادا قولعا الۋدى تاپسىردى. مۇنىمەن قوسا، پرەزيدەنت بۇگىندە باسىم باعىتتىڭ ءبىرى بولىپ وتىرعان «قاراپايىم زاتتار ەكونوميكاسىن» دا ۇمىتپاۋدى ەسكەرتتى»، - دەپ اتاپ ءوتتى بولىمشە باسشىسى.
ب.اقشالوۆتىڭ ايتۋىنشا، جالپى، سالاداعى كەمشىلىكتەردى جويىپ، جۇمىستى جەتىلدىرۋ باعىتىندا اتقارىلىپ جاتقان جۇمىستار از ەمەس. سونىڭ ءبىرىن اتاپ ايتار بولساق، «جولاۋشىلار تاسىمالى» پويىزىنا بيلەت الۋ بيىل 1 شىلدەدەن باستاپ اۆتوماتتاندىرىلعان جۇيە ارقىلى ىسكە اسىرىلىپ كەلەدى.
«ەلەكتروندى تەمىرجول بيلەتتەرى فيسكالدى چەك رەتىندە سانالىپ، جولاۋشىلاردى ەسەپكە الۋ مەن وتىرعىزۋعا نەگىز بولادى. بۇل ءوز كەزەگىندە مۇنداعى الىپساتارلاردىڭ زاڭسىز ارەكەتتەرى مەن وزگە دە ءبىرقاتار قيتۇرقىلىقتاردىڭ الدىن الۋعا سەپ بولۋدا. ايتكەنمەن، كەيبىر كەمشىلىكتەر تۇپ-تامىرىمەن جويىلدى دەپ تە ايتا المايمىز. سوندىقتان الداعى ۋاقىتتا پرەزيدەنت جولداۋى اياسىندا وسى باعىتتا جۇمىسىمىزدى جەتىلدىرىپ، جانداندىرا تۇسەتىن بولامىز»، - دەدى سالانىڭ جاۋاپتى مامانى.
