ەلىمىز ەگەمەندىك العالى بەرى اۋىل شارۋاشىلىعىن دامىتۋ ماسەلەسى كۇن تارتىبىنەن تۇسكەن ەمەس. ەلباسى-قازاقستان رەسپۋبليكاسىنىڭ تۇڭعىش پرەزيدەنتى ن.نازاربايەۆ قازاقستان حالقىنا جىل سايىنعى جولداۋلارىندا اگروونەركاسىپ كەشەنىن دامىتۋ ماسەلەسىن نازاردان تىس قالدىرعان جوق. مەملەكەت باسشىسى قاسىم-جومارت توقايەۆ تا سالاعا سەرپىلىس سىيلاۋ ماقساتىندا ستراتەگيالىق ماقساتتار قويىپ وتىر.

بۇل تۇرعىدا پرەزيدەنت: «اۋىل شارۋاشىلىعى – ءبىزدىڭ نەگىزگى رەسۋرسىمىز، ءبىراق ونىڭ الەۋەتى تولىق پايدالانىلماي وتىر.

ەل ىشىندە عانا ەمەس، شەتەلدە دە سۇرانىسقا يە ورگانيكالىق جانە ەكولوگيالىق تازا ءونىم ءوندىرۋ ءۇشىن زور مۇمكىندىكتەر بار.

ءبىز سۋارمالى جەر كولەمىن كەزەڭ-كەزەڭمەن 2030 جىلعا قاراي 3 ميلليون گەكتارعا دەيىن ۇلعايتۋىمىز كەرەك.

بۇل اۋىل شارۋاشىلىعى ءونىمىنىڭ كولەمىن 4،5 ەسە ارتتىرۋعا مۇمكىندىك بەرەدى.

ساۋدا جانە ينتەگراسيا، اۋىل شارۋاشىلىعى مينيسترلىكتەرى فەرمەرلەرگە ءوز ءونىمىن سىرتقا شىعارىپ ساتۋ ءۇشىن بارىنشا قولداۋ كورسەتۋى ءتيىس.

وسىعان وراي ۇكىمەتكە ءتيىستى تاپسىرما بەرىلدى. بۇل – ماڭىزدى مىندەت،

اۋىل شارۋاشىلىعى ءونىمىن ەكسپورتتاۋ ىسىندە شيكىزاتقا نەگىزدەلۋدەن باس تارتۋ كەرەك» دەپ اتاپ كورسەتتى.

قازىرگى تاڭدا جامبىل وبلىسىندا مال شارۋاشىلىعىن دامىتۋدا بىرنەشە ءىرى ينۆەستيسيالىق جوبالار ىسكە اسىرىلۋدا.

مىسالى، قورداي اۋدانىندا «Kazmeat Kordai» ءجشس-نىڭ بورداقىلاۋ الاڭى قايتا قۇرۋ ارقىلى جىلىنا 8،0 مىڭ باس ءمۇيىزدى ءىرى قارا بورداقىلاۋعا قاۋقارلى ءىرى كەشەنگە اينالادى. ءسۇت باعىتىنداعى مال شارۋاشىلىعىن دامىتۋعا ارنالعان ۇزاق مەرزىمدى كونسەپسيا قابىلدانىپ وبلىستا 2018-2027 جىلدار ارالىعىندا جاڭا 61 ءسۇت-تاۋار فەرماسى ىسكە قوسىلادى، وسىدان 12 ءسۇت تاۋارلى فەرماسى ساۋىن سيىر سانى 400 باستى قۇرايتىن ءىرى كەشەندەر.

2019 جىلى 4 فەرمانىڭ قۇرىلىسى جوسپارلانعان. سولاردىڭ قاتارىندا ءبىر فەرما 1 200 باسقا ارنالعان كەشەن. ونى «گامبۋرگ» ج ش س سالۋدا.

جامبىل وبلىسى بويىنشا، 2019 جىلعا اسىل تۇقىمدى مال شارۋاشىلىعىن دامىتۋدى، مال شارۋاشىلىعىنىڭ ونىمدىلىگىن جانە ءونىم ساپاسىن ارتتىرۋدى قولداۋ باعدارلاماسىنا 3،65 ميلليارد تەڭگە ءبولىنىپ تولىق يگەرىلدى.

سونىمەن قاتار جامبىل وبلىسىندا قۇس شارۋاشىلىعىن دامىتۋ بويىنشا كەشەندى شارالار اتقارىلۋدا. تاعامدىق جۇمىرتقا، ەتىن ءوندىرۋدى ارتتىرۋ ماقساتىندا «اسا دامۋ» ج ش س، «اۋليە-اتا فەنيكس» ج ش س قۇس فابريكالارى كەڭەيتۋ، مودەرنيزاسيادان وتۋدە. بايزاق اۋدانىندا «اللەل اگرو» ج ش س قۇس فابريكاسىن ىسكە قوسۋ جۇمىستارى جالعاسىن تابۋدا.وسى شارالاردىڭ ارقاسىندا وبلىستا وندىرىلەتىن قۇس ەتىنىڭ كولەمى 2 ەسەگە ارتادى دەپ كۇتىلۋدە، اعىمداعى جىلدىڭ وزىندە 224،7 توننا قۇس ەتى ەكسپورتتالدى.